រាជធានីភ្នំពេញ ៖ បើតាមសេចក្តីរាយការណ៍បឋមបានឲ្យដឹងថា កម្លាំងសមត្ថកិច្ចនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានសហការជាមួយនគរបាលរាជធានីភ្នំពេញ និងស្នងការដ្ឋាននគរបាលខេត្តព្រះសីហនុ តាមចាប់ឧក្រិដ្ឋជនជនជាតិចិនដែលចាប់នារីខារ៉ាអូខេជនជាតិដូចគ្នា៥នាក់ យកទៅរំលោភសេពសន្ថវៈ និងជំរិតទារប្រាក់នោះ គឺចាប់បាន៣នាក់ហើយ រួមទាំងរំដោះជនរងគ្រោះ២នាក់មកវិញផង ។
សេចក្តីរាយការណ៍បន្តទៀតថា ការតាមចាប់ខ្លួនក្រុមឧក្រិដ្ឋជនពីសំណាក់កម្លាំងសមត្ថកិច្ចនោះ បានធ្វើឡើងកាលពីទៀបភ្លឺចូលថ្ងៃទី២២ ខែមេសា នៅសណ្ឋាគារមួយក្នុងក្រុងព្រះសីហនុ ដែលជនសង្ស័យបានចាប់ជនរងគ្រោះទៅលាក់ទុកនៅទីនោះ ។ ក្រោយចាប់ខ្លួនឧក្រិដ្ឋជន៣នាក់ (មានម្នាក់ស្ថិតក្នុងការសង្ស័យ) ហើយសមត្ថកិច្ចបានធ្វើការនាំខ្លួនពួកគេមកកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ក្នុងនោះក៏មានរថយន្ត១គ្រឿងម៉ាស្តារិច ជាមធ្យោបាយសម្រាប់ធ្វើសកម្មភាពបានបញ្ជូនមកជាមួយដែរ រួមទាំងជនរងគ្រោះ ។
ហើយនៅវេលាល្ងាចនេះ ក្បួននាំឧក្រិដ្ឋជនចេញពីក្រុងព្រះសីហនុ ទើបចូលដល់ទឹកដីខេត្តកំពង់ស្ពឺទេ ។
គួររំលឹកថា ស្ត្រីជនជាតិចិន៣នាក់ ក្នុងចំណោម៥នាក់ជាប់ជាចំណាប់ខ្មាំងដែលជនជាតិចិនដូចគ្នាចាប់យកទៅជំរិតទារប្រាក់ ឧក្រិដ្ឋជនបានដោះឲ្យត្រឡប់មកវិញហើយកាលពីវេលាម៉ោង៥និង៣០នាទីទៀបភ្លឺឈានចូលថ្ងែទី២១ មេសា នៅលើទឹកដីខេត្តកំពត ហើយនៅ២នាក់ទៀតមិនដោះលែង ពួកគេសុទ្ធតែជាស្ត្រីបំរើខារ៉ាអូខេ
គួររំលឹកទៀតថា កាលពីយប់ថ្ងៃទី២០ មេសា មានបុរសជាជនជាតិចិន១ក្រុមមាន៥នាក់ បានចាប់នារីជនជាតិចិន៥ ចេញពីហាងបាយ ថាងទីង ស្ថិតនៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ។ ពេលនោះជនសង្ស័យប្រាប់ពួកនាងថានាំទៅច្រៀងខារ៉ាអូខេ ។ បន្ទាប់មកនារីទាំង៥នាក់ឡើងជិះរថយន្តម៉ាកហ៊ីយ៉ាន់ដាយ ពណ៌ខ្មៅ ហើយជនសង្ស័យដឹកពួកនាងចេញពីភ្នំពេញឡើងភ្នំដែលពួកគេមិនអត់ស្គាល់ រួចគំរាមកំហែង ដកយកប្រាក់ពួកនាងអស់ពីខ្លួនសរុបជាង៤.០០០ដុល្លារអាមេរិក ។
ជាងនេះទៀតជនសង្ស័យបានបង្ខំលើរូបរាងកាយ ដោយរំលោភសេពសន្ថវៈលើពួកនាង៤នាក់នៅក្នុងរថយន្ត ដែលនៅក្បែរស្រះទឹកមួយ ចំណែកម្នាក់ទៀតមិនត្រូវបានរំលោភទេ ។ នៅពេលនោះជនល្មើសដឹកពួកនាងដល់ក្រុងកំពតម៉ោងប្រមាណជា៥ភ្លឺ ជនសង្ស័យបានទាញជនរងគ្រោះ៣នាក់ទម្លាក់ចុះ ចំណែកនារី២នាក់ទៀតកំពុងស្ថិតក្នុងកណ្តាប់ដៃឧក្រិដ្ឋជន រហូតមកដល់រសៀសថ្ងៃទី២១ ខែមេសា នេះ៕
ចែករំលែកព័តមាននេះ