រាជធានីភ្នំពេញ ៖ តាមប្រភព Khmer Share បានឱ្យដឹងថា ពលរដ្ឋបានរអ៊ូរទាំកាន់តែច្រើនឡើងៗរឿងភ្លើងដាច់ បែរជាកុងទ័រភ្លើងឡើងគីឡូ ហើយបើនិយាយឱ្យច្បាស់ទៅ ត្រូវអស់លុយច្រើនជាងពេលភ្លើងមិនដាច់ថែមទៀតផង…
រាជធានីភ្នំពេញ ៖ តាមប្រភព Khmer Share បានឱ្យដឹងថា ពលរដ្ឋបានរអ៊ូរទាំកាន់តែច្រើនឡើងៗរឿងភ្លើងដាច់ បែរជាកុងទ័រភ្លើងឡើងគីឡូ ហើយបើនិយាយឱ្យច្បាស់ទៅ ត្រូវអស់លុយច្រើនជាងពេលភ្លើងមិនដាច់ថែមទៀតផង ។ ប្រជាពលរដ្ឋមួយចំនួនរស់នៅរាជធានីភ្នំពេញ បានចាប់ផ្តើមបញ្ចេញប្រតិកម្ម បណ្តើរៗហើយទៅនឹងរឿងភ្លើងអគ្គិសនីដែលដាច់ព្រឹកដាច់ល្ងាចរៀងរាល់ថ្ងៃ តែបែរជាកើនគីឡូ និងអស់លុយច្រើនជាងកាលពីមិនទាន់ដាច់ភ្លើង នាដើមខែមីនា ។
អ្នកប្រើប្រាស់ភ្លើងអគ្គិសនីរបស់ EDC នៅភ្នំពេញម្នាក់ បានលើកឡើងថា «ខ្ញុំដូចជាឆ្ងល់ ក្នុងមួយខែនេះដាច់ភ្លើង២ដងទៅ៣ដងក្នុងមួយថ្ងៃៗ ប៉ុន្តែគីឡូបែរជាឡើងទៅវិញ ។ សុំសួរត្រង់ៗថា តើមន្ត្រី EDC ឆ្លើយបានទេថា កាលពីប្រើមួយខែពេញ អស់ជាង១៧ម៉ឺនរៀល ដល់ពេលប្រើបានត្រឹមកន្លះខែ បែរជាឡើងដល់២២ម៉ឺនរៀល ? បងៗជួយគិតបន្តិច តើយើងគួរធ្វើយ៉ាងណា ខ្ញុំដូចជាមិនយល់ទាល់តែសោះ ( ខាង EDC ជួយបំភ្លឺ )» ។
ចំណែកអ្នកប្រើប្រាស់ភ្លើងអគ្គិសនីម្នាក់ទៀត នៅភ្នំពេញបានលើកឡើងថា «ខ្ញុំយល់បង ប៉ុន្តែដំណោះ ស្រាយខាង EDC បែរជាគាត់ Comment លើ Page Facebook អ្នកបង្ហោះឱ្យលុបចោល ហើយមកពិនិត្យនេះ ពិនិត្យនោះ រួចឲ្យពួកគាត់ចុះហត្ថលេខាទទួល ។ ខ្ញុំដូចជាមិនយល់ទេ ។ មន្ត្រី EDC ធ្វើបែបនេះ ។ ជួយបកស្រាយ» ។
ចាប់តាំងពីដើមខែមីនា ឆ្នាំ២០១៩ ភ្លើងអគ្គិសនីនៅទូទាំងប្រទេស ពិសេសនៅភ្នំពេញ ត្រូវបានកាត់ផ្តាច់ឆ្លាស់វេនគ្នា ។ មួយថ្ងៃដាច់ព្រឹក និងមួយថ្ងៃដាច់ល្ងាច ។ មូលហេតុដោយសារតែខ្វះភ្លើងអគ្គិសនីនៅរដូវប្រាំងនេះ ដោយសារទឹកនៅតាមវារីអគ្គិសនីទាំងអស់រីងស្ងួតមិនអាចផលិតថាមពលអគ្គិសនីបានពេញលេញ ។
យ៉ាងណាក៏ដោយចំពោះគីឡូភ្លើងឡើងខ្ពស់ជាងកាលពីមិនទាន់ដាច់ភ្លើង មិនទាន់មានការបកស្រាយឲ្យឡូស៊ិកណាមួយពីអគ្គិសនីកម្ពុជា (EDC)នៅឡើយទេ ។ មហាជនកំពុងរង់ចាំមើលថ្លៃភ្លើងខែនេះ តើវាយ៉ាងមេ៉ច ? សង្ឃឹមថាមិនមានរឿងនេះកើតឡើងទៅចុះ ។
បញ្ហាភ្លើងដាច់ច្រើន បែរជាកុងទ័រភ្លើងឡើងវិញនេះ តែងតែកើតមានការចោទប្រកាន់ដែលតាមពិតទៅ EDC គួរតែបកស្រាយជាសាធារណៈតាម Page Facebook ជាផ្លូវការដើម្បីឱ្យច្បាស់ថាវាឡើងដោយសារអ្វី ? ហើយណែនាំឱ្យមានការអនុវត្តទៅតាមបច្ចេកទេស ។ បើធ្វើបានដូចនេះប្រហែលជាមានការយោគយល់ ច្រើនជាងការរិះគន់ ។
ពិតជាចៀសមិនផុតទេពីប្រតិកម្ម ដោយសារតែអ្នកប្រើប្រាស់ភ្លើងមិនគ្រប់គ្រាន់ តែផ្ទុយទៅវិញតម្លៃនៃការប្រើប្រាស់បែរជាកើនឡើងវិញនោះ ៕
ចែករំលែកព័តមាននេះ