ខេត្តព្រះសីហនុ ៖ សមត្ថកិច្ចអោយដឹងថា គ្រោះថ្នាក់ចរាចរណ៍រវាងរថយន្តមិនស្គាល់ម៉ាកបានកៀរម៉ូតូមួយគ្រឿងក្នុងក្នុងទិសដៅស្របគ្នា បណ្តាលឱ្យអ្នកបើកបរម៉ូតូបានរងរបួសធ្ងន់ ក្រោយមកក៏បានស្លាប់ពេលបញ្ជូនទៅសង្គ្រោះនៅមន្ទីរពេទ្យ ។
ហេតុកាណ៍ខាងលើនេះបានកើតឡើងកាលពីវេលា៩និង២០នាទីយប់ថ្ងៃទី២១ ខែមេសា ឆ្នាំ២០១៩ លើផ្លូវជាតិលេខ៤ ត្រង់ចន្លោះគីឡូម៉ែត្រ១៨៣-១៨៤ ស្ថិតនៅភូមិសំរុងកណ្ដាល ឃុំសំរុង ស្រុកព្រៃនប់ ខេត្តព្រះសីហនុ ។
ជនរងគ្រោះដែលស្លាប់ឈ្មោះ ឈុន រី ភេទប្រុស អាយុ៣១ឆ្នាំ មានទីលំនៅក្នុងភូមិត្រពាំងសុយ២ ឃុំអណ្ដូងថ្ម ស្រុកព្រៃនប់ ខេត្តព្រះសីហនុ ជាអ្នកបើកបរម៉ូតូមួយគ្រឿងម៉ាកហុងដាឌ្រីម ពណ៌ខ្មៅ គ្មានស្លាកលេខ ។
តាមប្រភពពីសមត្ថកិច្ចបានអោយដឹងថា មុនពេលកើតហេតុ ជនរងគ្រោះបានត្រឡប់មកពីចូលរួមមង្គលការគេ លុះធ្វើដំណើរមកដល់ចំណុចខាងលើ ស្រាប់តែមានរថយន្តមិនស្គាល់ម៉ាកមួយគ្រឿងបើកកៀរម៉ូតូរបស់ជនរងគ្រោះ ដែលកំពុងបើកបរក្នុងទិសដៅស្របគ្នា បណ្ដាលឲ្យជនរងគ្រោះដែលជាអ្នកបើកបរម៉ូតូដួលបោកនឹងថ្នល់រងរបួសយ៉ាងធ្ងន់ធ្ងន់ ហើយក៏បានស្លាប់ពេលបញ្ជូនទៅសង្គ្រោះនៅគ្លីនិកឯកជនវាលរេញ ។
ក្រោយកើតហេតុ រថយន្តបង្កបានបើកគេចបាត់ស្រមោល តែកម្លាំងជំនាញកំពុងតែស្រាវជ្រាវតាមរកអ្នកបើកបររថយន្តបង្កដើម្បីយកមកផ្តន្ទាទោសតាមច្បាប់ ។ រីឯម៉ូតូរបស់ជនរងគ្រោះត្រូវបានសមត្ថកិច្ចបានយកមករក្សាទុកនៅអធិដ្ឋាននគរបាលស្រុកព្រៃនប់ ។
ចែករំលែកព័តមាននេះ