ខេត្តស្វាយរៀង ៖ ឈ្មួញទុច្ចរិតនៅតែលួចនាំជ្រូកពីប្រទេសវៀតណាមចូលមកកម្ពុជាតាមច្រករបៀងដំបូកកោះស្ថិតនៅភូមិព្រែកពក ឃុំថ្នាធ្នង់ ស្រុករំដួល ដោយមហាជនរិះគន់ថា មានមន្ត្រីប៉ូលិសប្រចាំការនៅច្រករបៀងឃប់ឃិតគ្នាបើកឲ្យឈ្មួញនាំជ្រូកវៀតណាមចូលមកតាមស្រុករំដួល ក៏ប៉ុន្តែត្រូវប្រជាពលរដ្ឋប្រទះឃើញរាយការជូនសមត្ថកិច្ចនគបាលប៉ុស្តិ៍រដ្ឋបាលឃុំអង្គប្រស្រែចុះបង្ក្រាប និងចាប់ឃាត់ទុកហើយបញ្ជូនឲ្យមន្ត្រីជំនាញការិយាល័យផលិតកម្ម និងបសុព្យាល នៃមន្ទីរកសិកម្ម រុក្ខាប្រមាញ់ និងនេសាទ ខេត្តស្វាយរៀងចាត់ការតាមនីតិវិធី ។
ជនសង្ស័យដឹកជ្រូកពីប្រទេសវៀតណាមមានឈ្មោះ ឯក សុខ ភេទប្រុស អាយុ៤០ឆ្នាំ មានទីលំនៅភូមិរាមសេនា ឃុំអណ្តូងពោធិ៍ ស្រុករមាសហែក ។
បើតាមលោក ប៉ែន ចន្ធី ប្រធានការិយាល័យផលិតកម្ម និងបសុព្យាបាលមន្ទីរកសិកម្មរុក្ខា ប្រមាញ់ និងនេសាទខេត្តបានឲ្យដឹងថា ករណីឈ្មួញនាំជ្រូកពីប្រទេសវៀតណាមនេះគឺនាំចូលតាមច្រករបៀងដំបូកកោះស្ថិតក្នុងភូមិព្រែកពក ឃុំថ្នាធ្នង់ ស្រុករំដួល ហើយបានដឹកឆ្ពោះទៅឃុំអណ្តូងពោធិ ស្រុករមាសហែក ក៏ប៉ុន្តែត្រូវប្រជាពលរដ្ឋប្រទះឃើញក៏រាយការណ៍ជូនសមត្ថកិច្ចនគបាលប៉ុស្តិ៍រដ្ឋបាលឃុំអង្គប្រស្រែចុះស្ទាក់ចាប់ឃាត់ឈ្មួញដឹកជ្រូក និងកូនជ្រូក១១ក្បាលកាលពីវេលាម៉ោង៣និង០០នាទីព្រឹកទៀបភ្លឺ ថ្ងៃទី១៨ ខែមេសា ឆ្នាំ២០១៩ នៅចំណុចផ្លូវលំស្ថិតនៅភូមិត្រពាំងធំ ឃុំអង្គប្រស្រែ ស្រុករមាសហែក ។
លោក ប៉ែន ចន្ទី បន្តទៀតថា ជ្រូកទាំ១១ក្បាលនេះមន្ត្រីជំនាញបានបញ្ជូនមករក្សាទុកនៅមន្ទីរកសិកម្ម រុក្ខាប្រមាញ់ និងនេសាទខេត្ត ហើយបានបូមឈាមជ្រូកយកទៅពិនិត្យនៅមន្ទីរពិសោធន៍អគ្គនាយកដ្ឋានសុខភាពសត្វ និងសុខភាពសត្វក្រសួងកសិកម្ម រុក្ខាប្រមាញ់ និងនេសាទ ។ ហើយបើរកឃើញថា មានផ្ទុកជម្ងឺប៉ែស្តអាហ្វ្រិក ឬជ្រូកត្រជៀកខៀវ នឹងត្រូវកម្ទេចចោល ក៏ប៉ុន្តែបើគ្មានផ្ទុកមេរោគទេមន្ត្រីជំនាញនឹងធ្វើការផាកពិន័យទៅតាមច្បាប់ពេទ្យសត្វ ៕
ចែករំលែកព័តមាននេះ