ខេត្តបាត់ដំបង ៖ យ៉ាងហោចណាស់ក្រុមក្មេងទំនើងចំនួន៥នាក់បានរងរបួសធ្ងន់និងស្រាល ដោយសារច្បាំងចាញ់ភាគីម្ខាងទៀតដែលមានកម្លាំងប្រហាក់ប្រហែលគ្នា តែសមត្ថកិច្ចបានស្រាវជ្រាវចាប់ខ្លួនភាគីដែលឈ្នះបានម្នាក់ កាលពីវេលាម៉ោង៥និង២០នាទីល្ងាចថ្ងៃទី១៨ មេសា នៅចំណុចរោងកាត់សក់មួយកន្លែង ដែលស្ថិតភូមិសាំងរាំង ឃុំបវេល…
ខេត្តបាត់ដំបង ៖ យ៉ាងហោចណាស់ក្រុមក្មេងទំនើងចំនួន៥នាក់បានរងរបួសធ្ងន់និងស្រាល ដោយសារច្បាំងចាញ់ភាគីម្ខាងទៀតដែលមានកម្លាំងប្រហាក់ប្រហែលគ្នា តែសមត្ថកិច្ចបានស្រាវជ្រាវចាប់ខ្លួនភាគីដែលឈ្នះបានម្នាក់ កាលពីវេលាម៉ោង៥និង២០នាទីល្ងាចថ្ងៃទី១៨ មេសា នៅចំណុចរោងកាត់សក់មួយកន្លែង ដែលស្ថិតភូមិសាំងរាំង ឃុំបវេល ស្រុកបវេល។ នេះបើតាមសេចក្ដីរាយការណ៏របស់សមត្ថកិច្ច។
សេចក្ដីរាយការណ៍បានឲ្យដឹងថា ភាគីដែលឈ្នះមានបក្ខពួកប្រមាណពី៦នាក់ទៅ៧នាក់ ប្រហាក់ប្រហែលនឹងភាគីដែលចាញ់ដែរ ប៉ុន្តែក្រោយកើតហេតុ កម្លាំងអធិការស្រុកបវេលបានធ្វើការស្រាវឃាត់ភាគីដែលច្បាំងឈ្នះបានម្នាក់ឈ្មោះយ៉ុន កែវ ភេទប្រុស អាយុ៣៥ឆ្នាំ រស់នៅចំណុចភូមិ-ឃុំកើតហេតុ ខណ:បក្ខពួកជាច្រើននាក់ទៀតកំពុងរត់គេចខ្លួន។
ដោយឡែកអ្នករបួសចំនួន៥នាក់ដោយសារគួសត្រូវកាប់គ្មានប្រណីនោះ រួមមាន ១-ឈ្មោះម៉ាប់ ទុំ ភេទប្រុស អាយុ២៣ឆ្នាំ នៅភូមិសាំងរាំង ឃុំបវេល របួសជើងខាងឆ្វេងធ្ងន់ ២-ឈ្មោះ សំ កឿន ហៅ ត្រា ភេទប្រុស អាយុ២៦ឆ្នាំ នៅភូមិរូងអំពិល ឃុំខ្នាចរមាស ស្រុកបវេល របួសជង្គង់ខាងឆ្វេងធ្ងន់ ៣-ឈ្មោះព្រឹត វិរះ ភេទប្រុស អាយុ២៧ឆ្នាំ នៅភូមិសាំងរាំង ឃុំបវេល របួសត្រចៀកខាងឆ្វេងស្រាល ៤-ឈ្មោះព្រឹត ណារិន ភេទប្រុស អាយុ២១ឆ្នាំ នៅភួមិសាំងរាំង ឃុំបវេល របួសកំភួនជើងខាងឆ្វេងស្រាល និង៥-ឈ្មោះឆន ផា ភេទស្រីអាយុ៤៧ឆ្នាំ នៅភូមិសាំងរាំង ឃុំបវេល របួសស្មាខាងឆ្វេងស្រាល។ ប៉ុន្តែបើតាមសមត្ថកិច្ចបានប្រាប់ថា ស្ត្រីឈ្មោះឆន ជា នេះបានរងគ្រោះដោយសារគាត់ស្ទុះទៅជួយកូន ទើបត្រូវក្រុមជនដៃដល់កាប់ត្រូវទាំងម្ដាយទាំងកូនតែម្ដង។
ជុំវិញករណីហិង្សាដែលបង្កឡើងដោយក្រុមក្មេងទំនើងខាងលើនេះ បើតាមលោកឧត្តមសេនីយត្រី ជេត វណ្ណនី ស្នងការរងខេត្តបានមានប្រសាសន៏ថា ក្រុមជនដៃដល់ដែលមានគ្នាយ៉ាងតិចចំនួន៧នាក់ ប្រដាប់ដោយដាវសាំម៉ូរៃនិងដំបង បានលើកគ្នាជិះម៉ូតូទៅកាប់ និងវាយក្រុមម្ខាងទៀត ខណៈដែលកំពុងអង្គុយជជែកគ្នានៅក្នុងរោងកាត់សក់មួយកន្លែង នៅចំណុចកើតហេតុខាងលើ។
បើតាមការសាកសួរព័ត៌មានបឋមដែលកម្លាំងជំនាញទទូលបាន ក្រុមក្មេងទាំង២ក្រុមនេះទំនងធ្លាប់មានការប៉ះទង្គិចគ្នាកន្លងមក ទើបក្រុមម្ខាងតាមឆ្មក់ទៅកាប់ទាំងកំរោលតែម្ដង។ ទោះបីជាយ៉ាងណា លោកស្នងការរងបានបញ្ជាក់ថា កម្លាំងអធិការស្រុកបវេលបានតាមឃាត់ខ្លួនក្រុមដៃដល់បានម្នាក់ ហើយក៏កំពុងតាមស្រាវជ្រាវចាប់ខ្លួនបក្ខពួកជាច្រើននាក់ទៀតដែលកំពុងរត់គេចខ្លួនផងដែរ ព្រោះមន្ត្រីជំនាញបានស្គាល់សាវតាពួកគេបានខ្លះៗហើយ៕
ចែករំលែកព័តមាននេះ