ខេត្តព្រៃវែង ៖ បុរសចំណាស់ម្នាក់ត្រូវកូនប្រុសបង្កើតកាប់4ពូថៅ បណ្តាលឱ្យប្រកាច់ស្លាប់ភ្លាមៗនៅនឹងកន្លែង ដោយសារខឹងឪពុកបោកទូរស័ព្ទគេចោល បង្កឱ្យមានការភ្ញាក់ផ្អើលកាលពី ម៉ោង៤និង៣៥នាទីទៀបភ្លឺ ឈានចូលថ្ងៃទី១៩ ខែមេសា ឆ្នាំ២០១៩ នៅនឹងផ្ទះជនរងគ្រោះ ស្ថិតក្នុងភូមិព្រៃរូង ឃុំដំរីពួន ស្រុកស្វាយអន្ទរ ខេត្តព្រៃវែង។
កូនដែលជាជនបង្កខាងលើឈ្មោះ ឡេង ហន ភេទប្រុស អាយុ២៣ឆ្នាំ ចំណែកបុរសជាឪពុក ដែលត្រូវកូនកាប់ស្លាប់ឈ្នោះ ឡេង សៅ អាយុ៥០ឆ្នាំ អ្នកទាំង2រស់នៅក្នុងផ្ទះជាមួយគ្នាក្នុងភូមិ-ឃុំកើតហេតុខាងលើ។
ប្រភពព័ត៌មានពីលោក អ៊ុង ផាន អធិការនគរបាលស្រុកស្វាយអន្ទរ បានឱ្យដឹងថា នៅយប់កើតហេតុនោះ ជនរងគ្រោះ និងកូនប្រុស រួមជាមួយអ្នកជិតខាងម្នាក់ទៀតបានអង្គុយផឹកស៊ីជុំគ្នានៅផ្ទះកើតហេតុ លុះផឹកដល់កណ្តាលយប់ អ្នកជិតខាងក៏ទៅផ្ទះវិញបាត់ នៅសល់តែឪពុកនិងកូននៅផឹកបណ្តើរនិយាយគ្នាបណ្តើរ រហូតដល់ម៉ោង4ទៀបភ្លឺ មិនដឹងមូលហេតុអ្វី ស្រាប់តែបុរសជាឪពុកឡើងទៅលើផ្ទះយកទូរស័ព្ទកូនប្រុសបោកបែកអស់។
លោកអធិការបន្តថា ភ្លាមៗនោះកូនបានសួរថា »ម៉េចក៏បោកទូរស័ព្ទខ្ញុំបែកអស់ចឹង» ឪពុកក៏តបថា «អញបោកកុំឱ្យហ្អែងមានអីមើលទៀត»។ លឺបែបនេះ កូនប្រុសឆេះដុំ តែមិនដឹងធ្វើអីបាន ក៏យកព្រនុងទៅវាយក្របីនៅមុខផ្ទះ ចំណែកឪពុកឃើញបែបនេះ ក៏ចុះពីលើផ្ទះស្ទុះទៅធាក់កូនប្រុស1ជើងចំកណ្តាលមុខ ទើបធ្វើឱ្យកូនប្រុសខឹងកាន់តែខ្លាំង ក៏ស្ទុះទៅយកពូថៅ កាប់ឪពុកចំនួន4ពូថៅ ដោយ1ពូថៅត្រូវជង្គង់ 1ពូថៅត្រូវដើមទ្រូង 1ពូថៅត្រូវក្រោមក្លៀកស្តាំ និង1ពូថៅទៀតត្រូវកញ្ចឹងក បណ្តាលឱ្យប្រកាច់ស្លាប់ភ្លាមៗនៅនឹងកន្លែង រួចកូនប្រុសក៏រត់ឡើងទៅសំងំនៅលើផ្ទះ ដោយមិនបានរត់ទៅណាទេ រហូតទាល់តែសមត្ថកិច្ចទៅដល់ និងធ្វើការឃាត់ខ្លួនតែម្តង។
ដោយឡែកប្រភពពីអ្នកជិតខាង ក៏ដូចជាក្រុមគ្រួសារជនរងគ្រោះផងដែរ បានឱ្យដឹងថា បុរសជាឪពុកក៏ជាមនុស្សខូចណាស់ដែរ ដោយកន្លងមកឱ្យតែស្រវឹង គឺតែងតែជេរបញ្ចោរ និងវាយធ្វើបាបប្រពន្ធកូនជានិច្ច ហើយលើកនេះទំនងជាកូនប្រុសទ្រាំលែងបានហើយមើលទៅ ទើបដាច់ចិត្តកាប់សម្លាប់ឪពុកបែបនេះ៕
ចែករំលែកព័តមាននេះ