ខេត្តបន្ទាយមានជ័យ ៖ យ៉ាងហោចណាស់ក៏មានមនុស្សម្នាក់បានស្លាប់ និង២នាក់ផ្សេងទៀតរងរបួសធ្ងន់ ដោយសារករណីគ្រោះថ្នាក់ចរាចរណ៍ដែលបង្កដោយខ្លួនឯងបើកម៉ូតូវង្វេងផ្លូវជាតិធ្លាក់ចូលស្នាមភ្លោះទៅបុកនឹងបង្គោលខ្សែកាបអុបទិច ហេតុការណ៍នេះបានកើតឡើងនៅចន្លោះម៉ោង១ទៅម៉ោង ៣ទៀបភ្លឺឈានចូលថ្ងៃទី១៤ ខែមេសា ឆ្នាំ២០១៩ នៅលើកំណាត់ផ្លូវជាតិលេខ៦ ក្រៅទីប្រជុំជន ត្រង់ចំណុចចន្លោះបង្គោលខ្សែភ្លើងលេខ០៣៩៣-០៣៩៤ ដែលស្ថិតនៅភូមិរហាល ឃុំរហាល ស្រុកព្រះនេត្រព្រះ ខេត្តបន្ទាយមានជ័យ។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា ជនេងគ្រោះដែលបានបាត់បង់ជីវិតឈ្មោះ ឈូក សុវ៉ាត ភេទប្រុស អាយុ៣៨ឆ្នាំ នៅភូមិគោកលុន(ភូមិថ្មី) ឃុំជប់វារី ស្រុកព្រះនេត្រព្រះ ជាអ្នករួមដំណើរ និងត្រូវជាបងថ្លៃ បស់អ្នកបើកបរម៉ូតូឈ្មោះ ចិ ថាវី ភេទប្រុស អាយុ២៥ឆ្នាំ នៅភូមិគោកលុន(ភូមិថ្មី) ឃុំជប់វារី ស្រុកព្រះនេត្រព្រះ រងរបួសធ្ងន់ បានបើកម៉ូតូម៉ាក Honda Click ពណ៌ស ពាក់ផ្លាកលេខ ប.មានជ័យ1M-4145 និងអ្នករួមដំណើរម្នាក់ទៀតត្រូវជាក្មួយឈ្មោះ វ៉ាន់ សាវឿត ភេទស្រី អាយុ១២ឆ្នាំ នៅភូមិជាមួយរបួសស្រាល ។
លោកអធិការបានបន្តថា មុនពេលកើតហេតុ អ្នកបើកម៉ូតូបានធ្វើដំណើរក្នុងទិសដៅពីខាងកើតទៅទិសលិច សង្ស័យមានសារជាតិស្រវឹងពេលមកដល់ចំណុចចន្លោះបង្គោលខ្សែភ្លើងលេខ០៣៩៣-០៣៩៤ ស្ថិតនៅភូមិរហាល ឃុំរហាល ស្រុកព្រះនេត្រព្រះ បានធ្លាក់ពីលើទ្រូងផ្លូវទៅបុកនឹងបង្គោលខ្សែកាបអុបទិចនៅស្នាមភ្លោះខាងជើងផ្លូវ បណ្ដាលឲ្យស្លាប់ម្នាក់ និងរងរបួសធ្ងន់-ស្រាល២នាក់ ចំណែកម៉ូតូខូចខាតធ្ងន់ផ្នែកខាងមុខ ។ ចំពោះអ្នករងរបួសត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកព្រះនេត្រព្រះ ចំណែកជនរងគ្រោះដែលស្លាប់ត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី៕
ចែករំលែកព័តមាននេះ