ខេត្តកំពង់ស្ពឺ៖ បើតាមសេចក្តីរាយការណ៍បានឱ្យដឹងថា មានករណីគ្រោះថ្នាក់ចរាចរណ៍ដ៏រន្ធត់មួយកើតឡើងនៅលើផ្លូវជាតិលេខ៤ ចន្លោះគីឡូម៉ែត្រលេខ៣៨-៣៩ កាលពីម៉ោង៣និង២៥នាទីល្ងាច ថ្ងៃទី១៣ ខែមេសា ឆ្នាំ២០១៩ ស្ថិតក្នុងភូមិស្លា ឃុំវល្លិសរ ស្រុកសំរោងទង ខេត្តកំពង់ស្ពឺ។
សេចក្តីរាយការណ៍បានឱ្យដឹងថា ម៉ូតូជនរងគ្រោះខាងលើម៉ាកC125 ពណ៌ខ្មៅ ស៊េរីឆ្នាំ ២០១៤ ពាក់ស្លាកលេខកំពង់ស្ពឺ1G-1686 បើកបរដោយឈ្មោះ ទូច កុយ ភេទប្រុស អាយុ១៨ឆ្នាំ រស់នៅភូមិអង្គទន្លាប់ ឃុំសំរោងទង ស្រុកសំរោងទង បានឌុបព្រះសង្ឃ២អង្គ ព្រះនាម អៀង បញ្ញា ព្រះជន្ម១៧វស្សា និងមួយអង្គទៀតព្រះនាម ម៉ៅ រិទ្ធិកា ព្រះជន្ម១៦វស្សា គង់នៅវត្តអង្គទន្លាប់ ។
តាមប្រភពសមត្ថកិច្ចពីកន្លែងកើតហេតុបានឱ្យដឹងថា មុនពេលកើតហេតុ យុវជនម្នាក់ជិះម៉ូតូឌុបព្រះសង្ឃ២អង្គក្នុងល្បឿនលឿនមិនប្រយ័ត្ន ស្រាប់តែជ្រុលចង្កូតទៅបុកសត្វគោដែលកំពុងឆ្លងផ្លូវ បណ្តាឲ្យដួលម៉ូតូ ខណៈពេលនោះក៏មានរថយន្តដឹកប្រេងមួយគ្រឿងមកដល់ជាន់ហ្វ្រាំងមិនទាន់ក៏កិនជនរងគ្រោះទាំង៣នាក់ បណ្តាលឲ្យព្រះសង្ឃ២អង្គសុគត៌ និងយុវជនម្នាក់ជាអ្នកបើកម៉ូតូស្លាប់បាត់បង់ជីវិត ព្រមទាំងគោងាប់គោ១ក្បាលថែមទៀត ចំណែកអ្នកបើករថយន្តដឹកប្រេងភ័យពេករត់គេចបាត់ ។
ក្រោយកើតហេតុសាកសពត្រូវបានប្រគល់ជូនក្រុមគ្រួសារ និងគណៈកម្មការវត្ដទទួលយកធ្វើបុណ្យតាមទំនៀមទំលាប់សាសនា រីឯវត្ថុតាងយកមករក្សាទុកបណ្ដោះអាសន្ននៅអធិការដ្ឋាននគរបាលស្រុកសំរោងទង រង់ចាំចំណាត់ការតាមនីតិវិធីច្បាប់៕
ចែករំលែកព័តមាននេះ