តើអ្នកបានធ្វើអំពើបុណ្យអ្វីខ្លះ ហើយតើអ្នកបានធ្វើអំពើបាបអ្វីខ្លះកាលពីមួយឆ្នាំកន្លង? វាជាសំនួរដែលនឹង អាចធ្វើឱ្យយើងឆ្លុះបញ្ចាំងខ្លួនឯង ដើម្បីឱ្យឃើញរូបភាពដ៏ពិតប្រាកដបំផុតរបស់យើងម្នាក់ៗ និងដើម្បីដឹងថា តើយើងមានចំណុចខ្វះខាតអ្វីខ្លះដែលត្រូវកែលម្អនៅក្នុងឆ្នាំថ្មី?
យើងបាននាំគ្នាឈានចូលឆ្នាំថ្មីជាមួយការរំពឹងទុកអ្វីៗថ្មី និងល្អប្រសើរសម្រាប់យើង ប៉ុន្តែភាពល្អប្រសើរទាំងឡាយ គឺជាលទ្ធផលនៃទង្វើរបស់យើងម្នាក់ៗដែលគប្បីត្រូវតែធ្វើអ្វីៗដែលល្អសម្រាប់ខ្លួន សម្រាប់មិត្តភក្តិ សម្រាប់គ្រួសារ និងសម្រាប់ប្រទេសជាតិ។
ការចាកចេញពីឆ្នាំចាស់ជាឱកាសម្រាប់យើងឆ្លុះបញ្ចាំងអ្វីដែលបានកើតឡើងនៅក្នុងឆ្នាំចាស់ ហើយឆ្លុះបញ្ចាំងខ្លួនឯងថា បានធ្វើអ្វីខ្លះនៅក្នុងឆ្នាំចាស់ជាអំពើល្អសម្រាប់ខ្លួនឯង សម្រាប់មិត្តភក្តិ សម្រាប់ក្រុមគ្រួសារ និងប្រទេសជាតិទាំងមូល។ ទន្ទឹមនោះវាក៏ជាពេលវេលាដ៌ល្អមួយដើម្បីឆ្លុះបញ្ចាំងអ្វីដែលជាការខ្វះខាត ឬជាកំហុសឆ្គងដែលយើងបានធ្វើដោយចេតនា ឬអចេតនានាពេលមួយឆ្នាំកន្លងមកហើយ យើងចៀសវាងចេញឆ្ងាយពីវាទាំងអស់នោះ។
ការយល់ដឹងច្បាស់អំពីខ្លួនឯងនឹងអាចឱ្យ យើងកែលម្អខ្លួនឯងឱ្យកាន់តែប្រសើរនៅឆ្នាំថ្មី។ យើងត្រូវលាងជម្រះខ្លួនយើងចេញពីភាពខ្ជិលច្រអូស ចេញពីភាពលោភលន់ ចេញពីភាពប្រមឹក ចេញពីការឈ្នានីស ចេញពីការប្រព្រឹត្តអំពើពុករលួយ ចេញពីការប្រព្រឹត្តភាពអយុត្តិធម៌ ចេញពីការប្រព្រឹត្តិអំពើហិង្សា ចេញពីការប្រើគ្រឿងញៀនចេញ និងចេញពីអំពើអាក្រក់ ឬបាបទាំងឡាយ។
យើងត្រូវនាំគ្នាចាប់យកអំពើល្អដែលជួយដល់ខ្លួនឯង ជួយដល់មិត្តភក្តិ ជួយដលកូនចៅ និងឪពុកម្តាយ ជួយដល់ក្រុមគ្រួសារទាំងអស់ និងជួយដល់សង្គមជាតិទាំងមូល។
យើងនាំគ្នាបណ្តុះបេះដូងប្រកបដោយមេត្តា បេះដូងពោរពេញដោយក្តីស្រឡាញ់ បេះដូងយុត្តិធម៌ បេះដូងសប្បុរស បេះដូងដែលពោរពេញដោយតែអំពើល្អ ហើយជម្រះចោលអំពើអាក្រក់ និងបាបទាំងឡាយ។
ការនាំគ្នាប្រព្រឹត្តតែអំពើល្អជាអ្វីដែលយើងម្នាក់ៗអាចធ្វើបាន។ នៅពេលយើងគ្រប់គ្នាក្លាយជាមនុស្សល្អ សង្គមកម្ពុជាទាំងមូលនឹងល្អផូរផង់ជាស្វ័យប្រវត្តិ។ ដូច្នេះយើងមិនគួរចំណាយពេលអត់ប្រយោជន៍បន្ទោសសង្គមជាតិ ដោយខ្លួនយើងផ្ទាល់មិនបានធ្វើខ្លួនក្លាយជាមនុស្សកាន់តែប្រសើរពីមួយឆ្នាំទៅមួយឆ្នាំនោះឡើយ។
សម្រាប់កោះសន្តិភាព យើងនឹងធ្វើសេចក្តីរាយការណ៍ក្នុងទិសដៅដ៏ប្រាកដប្រជាដោយធ្វើសេចក្តីរាយការណ៍ព័ត៌មានដែល និងលើកទឹកចិត្តដល់អំពើល្អទាំងឡាយក្នុងសង្គម ហើយផ្ទុយមកវិញជីកកកាយអំពើអាក្រក់ខុសច្បាប់ទាំងឡាយក្នុងសង្គម ដើម្បីឱ្យ មានការផ្លាស់ប្តូរជាវិជ្ជមានសម្រាប់សង្គមជាតិ។
កោះសន្តិភាពនឹងរួមចំណែកតាមការទទួលខុសត្រូវរបស់ខ្លួននៅក្នុងការសាបព្រួសអំពើល្អ ហើយកំចាត់ចោលរាល់អំពើអសកម្មក្នុងសង្គម ដើម្បីបំពេញបេសកកម្មរបស់ខ្លួនជាអ្នកបម្រើសាធារណជនជាធំ។
ឆ្នាំថ្មីនឹងក្លាយជាឆ្នាំដែលកាន់តែប្រសើរសម្រាប់ពលរដ្ធកម្ពុជាគ្រប់រូបដែលនឹងជម្រុះចោលរាល់អំពើបាប ហើយធ្វើអោយចម្រើនដល់អំពើបុណ្យ។
កោះសន្តិភាពប្រសិទ្ធិពរជ័យដល់ប្រជាពលរដ្ឋកម្ពុជាគ្រប់រូបអោយមានសុខភាពល្អ សម្រស់ផូរផង់ សុខកាយសប្បាយចិត្ត សមិទ្ធផលថ្មីៗ សុភមង្គល សម្ព័ន្ធភាពស្នេហារឹងមាំ សក្តិយសឡើងធំ និង សម្បត្តិសម្បូររុងរឿង។
អ្នកអានទាំងអស់អាចរួមជាមួយកោះសន្តិភាពនៅក្នុងការចម្រើនបុណ្យ និងជម្រុះបាបតាមរយៈការចែករំលែកអត្ថបទនេះ ទៅកាន់មិត្តភក្តិ និងក្រុមគ្រួសារ និងមនុស្សទាំងអស់៕
ចែករំលែកព័តមាននេះ