រាជធានីភ្នំពេញ ៖ តារាសម្តែង និងច្រៀងលោក អេន ឌី បានបញ្ចេញនូវអត្តសញ្ញាណស្ត្រីម្នាក់ដែលលោកបានចាត់ទុកថា ជាជនបោកប្រាស់រឿងធានាចេញទៅសម្តែងនៅប្រទេសបារាំង។ ការបញ្ចេញនូវមុខមាត់ពិតចំពោះស្ត្រីខាងលើជាសាធារណៈបានធ្វើឡើង ក្រោយពីស្ត្រីម្នាក់នេះបានព្យាយាមគេចវេសមិនព្រមសងលុយដែលលោកបានបង់ខាត។…
រាជធានីភ្នំពេញ ៖ តារាសម្តែង និងច្រៀងលោក អេន ឌី បានបញ្ចេញនូវអត្តសញ្ញាណស្ត្រីម្នាក់ដែលលោកបានចាត់ទុកថា ជាជនបោកប្រាស់រឿងធានាចេញទៅសម្តែងនៅប្រទេសបារាំង។ ការបញ្ចេញនូវមុខមាត់ពិតចំពោះស្ត្រីខាងលើជាសាធារណៈបានធ្វើឡើង ក្រោយពីស្ត្រីម្នាក់នេះបានព្យាយាមគេចវេសមិនព្រមសងលុយដែលលោកបានបង់ខាត។
យ៉ាងណាក៏រឿងរ៉ាវខាងលើនេះលោក អេន ឌី មិនមានបំណងចាត់ការតាមផ្លូវច្បាប់ណាមួយឡើយ ប៉ុន្តែការទម្លាយរឿងនេះឡើង លោកគ្រាន់តែចង់ឲ្យតារាផ្សេងទៀតកុំមានការចាញ់បោកចំពោះស្ត្រីរូបនេះទៀត។ អេន ឌី បានបង្ហោះរូបថតរបស់ស្ត្រីខាងលើតាមបណ្តាញសង្គមហ្វេសប៊ុកអមជាមួយពាក្យពេចន៍ឲ្យតារាផ្សេងទៀត កុំមានការចាញ់បោកពីស្ត្រីរូបនេះ។
ពាក់ព័ន្ធបញ្ហាខាងលើនេះលោក អេន ឌី បានអះអាងប្រាប់កោះសន្តិភាពតាមសារអេឡិចត្រូនិចថា លោក និងតារា៣នាក់ផ្សេងទៀតត្រូវបានស្ត្រីរូបនេះធានាអះអាងថា នឹងដឹកនាំទៅសម្តែងនៅប្រទេសបារាំងនៅអំឡុងខែមីនាកន្លងទៅ។ លោកបញ្ជាក់ថា ដើម្បីបានចេញទៅបារាំងស្ត្រីខាងលើបានតម្រូវឲ្យលោក និងតារាផ្សេងទៀតយកលុយចំនួន១០០ដុល្លារទៅឲ្យស្ត្រីម្នាក់ផ្សេងទៀត ដើម្បីបកប្រែរត់ឯកសារ។ លុះដល់ពេលពួកលោកបានធ្វើតាមសំណើរនោះហើយ គាត់បានសន្យាថា យ៉ាងយូរ១សប្តាហ៍គាត់នឹងយកលុយនោះមកឲ្យវិញ។
បើតាមលោក អេន ឌី បានឱ្យដឹងថា រហូតមកដល់ពេលនេះលោកបានរង់ចាំមិនមែន១សប្តាហ៍នោះទេ ពោលគឺរយៈពេល៣ខែហើយ នៅមិនឃើញស្ត្រីខាងលើមកទូទាត់សងពួកលោកនៅឡើយទេ។ លោកបន្ថែមថា ស្ត្រីរូបនេះកំពុងមានវត្តមាននៅស្រុកខ្មែរ ប៉ុន្តែគាត់បានគេចវេស និងបានផ្តាច់ទំនាក់ទំនងជាមួយលោកគ្រប់វិធីទាំងអស់។
យ៉ាងណាក៏ដោយ លោកមិនស្តាយលុយ 100$ នោះទេ តែលោកស្តាយពេលវេលា និងការងារដែលបាត់បង់ដោយសារដែលរង់ចាំ និងស្អប់ពាក្យសំដីក្រឡិចក្រឡុចរបស់គាត់ចំពោះលោកប៉ុណ្ណោះ៕
ចែករំលែកព័តមាននេះ