ខេត្តបាត់ដំបង ៖ យុវជនម្នាក់ត្រូវរថយន្តដែលគេមិនស្គាល់ម៉ាកបុក ហើយកិនដាច់ដៃម្ខាង កាលពីវេលាម៉ោង៩និង៣០នាទីយប់ ថ្ងៃទី១២ មេសានេះ នៅលើកំណាត់ផ្លូវមួយកន្លែងត្រង់ចំណុចភូមិបាណន់ ឃុំកន្ទឺ២ ស្រុកបាណន់ រីឯរថយន្តបង្កហេតុបានបើករត់បាត់ស្រមោលទាំងយប់ ។
លោកប៉ាន់ វ៉ាន់នី អធិការនគរបាលស្រុកបាណន់បានឲ្យដឹងថា រហូតមកដល់ពេលនេះគេនូវមិនទាន់មានតម្រុយពីភិនភាគរថយន្តបង្កហេតុនៅឡើយទេ ព្រោះក្រោយពេលបុកមនុស្សរថយន្តនោះបានគេចបាត់ ។ លោកអធិការបានប្រាប់ថា រថយន្តមិនស្គាល់ម៉ាកនោះបានបុកយុវជនឈ្មោះអឿន កំសាន្ត អាយុ២០ឆ្នាំ រស់នៅភូមិបាណន់ ឃុំកន្ទឺ២ ស្រុកបាណន់ ជិះម៉ូតូម៉ាកហុងដាឌ្រីម C125 ពណ៌ខ្មៅ (គ្មានស្លាកលេខ) របួសដាច់ដៃខាងឆ្វេង ហើយក្រុមគ្រួសារ និងសមត្ថកិច្ចបានបញ្ជូនទៅកាន់មន្ទីពេទ្យភ្លាមៗដែរ ។
បើតាមសាក្សីបាននិយាយថា រថយន្តបង្កហេតុ និងជនរងគ្រោះបានធ្វើដំណើរស្របទិសគ្នា ។ ប៉ុន្តែដល់ចំណុចកើតហេតុជនរងគ្រោះបានឈប់ដោយសារមានដើមឈើរលំលើផ្លូវស្របពេលនោះរថយន្តបើកទៅដល់មិនប្រយ័ត្នក៏បុកជនរងគ្រោះពីក្រោយតែម្ដង ។ ប្រភពដដែលបានបញ្ជាក់ថា ពេលដែលបុករថយន្តនោះមិនបានឈប់ទេ តែបែរជាបន្ថែមល្បឿនបើកកិនដៃជនរងគ្រោះដាច់ម្ខាង បណ្ដាលឲ្យរបួសយ៉ាងធ្ងន់ធ្ងរ ។
លោកប៉ាន់ វ៉ាន់នី អធិការស្រុកបាណន់ បានបញ្ជាក់ថា បើតាមការបំភ្លឺនានាពីប្រជាពលរដ្ឋថា រថយន្តបង្កគ្រោះថ្នាក់នោះជាប្រភេទរថយន្តតូច ។ ពេលនេះមន្ត្រីជំនាញកំពុងធ្វើការស្រាវជ្រាវស្វែងរករថយន្តបង្កនោះហើយ ៕
ចែករំលែកព័តមាននេះ