រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ថា កម្ពុជាគាំទ្រគំនិតផ្តួតផ្តើមអនាគតនៃការងាររបស់អង្កការសហប្រជាជាតិ (UN) ដើម្បីត្រៀមខ្លួនដោះស្រាយបញ្ហាប្រឈមដែលកើតមានពីបដិវត្តន៍នៃបច្ចេកវិទ្យា ។ លោករដ្ឋមន្ត្រីនាឱកាសថ្លែងក្នុងកិច្ចប្រជុំជាន់ខ្ពស់នៃមហាសន្និបាតអង្គការសហប្រជាជាតិ (UN) ដើម្បីប្រារព្ធខួប១០០ឆ្នាំនៃការបង្កើតអង្គការអន្តរជាតិខាងការងារ (ILO) នៅទីក្រុញូយ៉ក ។
លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានថ្លែងថា កម្ពុជាគាំទ្រគំនិតផ្ដួចផ្ដើមអនាគតនៃការងារ ដើម្បីត្រៀមដោះស្រាយបញ្ហាប្រឈមដែលកើតមានពីការវិវត្តនៃបច្ចេកវិទ្យា ។ កិច្ចប្រជុំជាន់ខ្ពស់នៃមហាសន្និបាតអង្គការសហប្រជាជាតិនេះត្រូវបានធ្វើឡើងនៅទីស្នាក់ការអង្គការសហប្រជាជាតិ ក្នុងទីក្រុងញូវយ៉កសហរដ្ឋអាមេរិក នាថ្ងៃទី១០ ខែមេសា ឆ្នាំ២០១៩ ។ ក្នុងឱកាសនោះលោក អ៊ិត សំហេង បានថ្លែងឱ្យដឹងថា ការប្រារព្ធខួប១០០ឆ្នាំ នៃភ្នាក់ងារឯកទេសខាងការងាររបស់អង្គការសហប្រជាជាតិ ដែលមានវ័យចំណាស់មួយនេះជាការឆ្លុះបញ្ចាំងអំពីតួនាទីដ៏សំខាន់របស់អង្គការ ILO ក្នុងការលើកកម្ពស់យុត្តិធម៌សង្គម និងបង្កើតឱកាសការងារសម្រាប់ជនគ្រប់រូបនាពេលកន្លងមក ។
លោករដ្ឋមន្ត្រីបានបន្តថា កម្ពុជាក៏បានរៀបចំព្រឹត្តិការណ៍ និងសកម្មភាពជាច្រើនក្នុងឆ្នាំ២០១៩នេះ ដើម្បីចូលរួមអបអរសាទរខួប១០០ឆ្នាំ របស់អង្គការ ILO ដែលវាក៏ស្របគ្នានឹងខួប៥០ឆ្នាំ នៃសមាជិកភាពកម្ពុជាក្នុងអង្គការ ILO ក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីពេលថ្មីៗកន្លងទៅ ។ កម្ពុជានឹងសហការយ៉ាងជិតស្និទ្ធជាមួយអង្គការ ILO ដើម្បីបន្តបេសកកម្មរបស់អង្គការ ILO ក្នុងបរិបទថ្មីនៃបដិវត្តឧស្សាហកម្ម ៤.០ ។
លោក អ៊ិត សំហេង បានថ្លែងយ៉ាងដូច្នេះថា «ខណៈដែលយើងកំពុងឈានចូលទសវត្សទី២ នៃការលើកកម្ពស់យុត្តិធម៌សង្គម និងការងារសមរម្យសម្រាប់ជនគ្រប់រូបកម្ពុជាគាំទ្រគំនិតផ្ដួចផ្ដើមអនាគតនៃការងារ (Future of Work Initiative) ដែលជាគន្លឹះរួមសម្រាប់រដ្ឋជាសមាជិក និងដៃគូអភិវឌ្ឍនានាត្រូវយកចិត្តទុកដាក់ ដើម្បីត្រៀមក្នុងការគ្រប់គ្រងបញ្ហាប្រឈមនានា ពិសេសការផ្លាស់ប្ដូរជំនាញ ដែលកើតមានឡើងពីការវិវត្តនៃបច្ចេកវិទ្យា»។
នៅក្នុងឱកាសជាប្រវត្តិសាស្ត្រនោះ លោករដ្ឋមន្ត្រី បានសម្ដែងនូវការប្ដេជ្ញាចិត្តយ៉ាងមុតមាំ ក្នុងការសហការជាមួយអង្គការ ILO ជាក់ស្ដែងកាលពីថ្ងៃទី២៨ ខែមីនា កន្លងទៅថ្មីៗនេះ កម្ពុជាបានចុះអនុស្សរណៈជាមួយអង្គការ ILO និងដៃគូត្រីភាគីផ្សេងទៀត ក្នុងការអនុវត្តកម្មវិធីការងារសមរម្យ សម្រាប់ឆ្នាំ២០១៩-២០២៣ ដោយផ្តោតលើគោលបំណងធំៗចំនួន ៣ចំណុច៖ ទី១៖ បន្តអភិវឌ្ឍមុខរបរ និងការងារ និងសហគ្រាសឱ្យស្របតាមការវិវត្តសង្គម និងបច្ចេកវិទ្យា។ ទី២៖ ការពង្រឹង និងពង្រីកកិច្ចគាំពារសង្គមដល់ស្ត្រី យុវជន និងក្រុមជនងាយរងគ្រោះ។ ទី៣៖ បន្តធ្វើឱ្យប្រសើរឡើងនូវទំនាក់ទំនងវិជ្ជាជីវៈ និងសិទ្ធិការងារស្របតាមបទដ្ឋានអន្តរជាតិខាងការងារ ដោយរួមទាំងពលករទេសន្តប្រវេសន៍ផងដែរ ៕
ចែករំលែកព័តមាននេះ