ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃចន្ទ កន្លងមកថា សិង្ហបុរី និងប្រទេសអាស៊ីអាគ្នេយ៍ដទៃទៀតនឹងរក្សាមានភាពរឹងមាំ ខណៈដែលមានមុខសញ្ញាកាន់តែច្រើនបង្ហាញថាសេដ្ឋកិច្ចពិភពលោកនឹងមានការអន់ថយ។ រដ្ឋមន្ត្រីការបរទេសសិង្ហបុរី Heng…
ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃចន្ទ កន្លងមកថា សិង្ហបុរី និងប្រទេសអាស៊ីអាគ្នេយ៍ដទៃទៀតនឹងរក្សាមានភាពរឹងមាំ ខណៈដែលមានមុខសញ្ញាកាន់តែច្រើនបង្ហាញថាសេដ្ឋកិច្ចពិភពលោកនឹងមានការអន់ថយ។
រដ្ឋមន្ត្រីការបរទេសសិង្ហបុរី Heng Swee Keat បាននិយាយប្រាប់ Bloomberg Television ថា សេដ្ឋកិច្ចរបស់ប្រទេសអាស៊ីអាគ្នេយ៍ទាំង ១០ និងអាស៊ានជាក្រុមប្រទេសបន្តលូតលាស់បានល្អទាំងក្នុងឆ្នាំនេះ និងឆ្នាំក្រោយ។ ប៉ុន្តែលោកបានបន្តថា ការលូតលាស់អាចនឹងមិនស្មើគ្នា ហើយក៏ទាបជាងមុនជាដើម។
ការលូតលាស់ជុំវិញពិភពលោកបានមានការអន់ថយតាំងពីដើមឆ្នាំនេះ។ បច្ចុប្បន្ននេះការលូតលាស់ក្នុងតំងបបន់ប្រៀបដូចជាមិនត្រូវបានប៉ះពាល់ច្រើនទេ ដោយមានធនាគារអភិវឌ្ឍន៍អាស៊ីព្យាករណ៍ថានឹងលូតលាស់បាន ៤.៩%ក្នុងឆ្នាំ ២០១៩នេះ។
ក្នុងប្រទេសសិង្ហបុរី មន្ត្រីជាប់ពាក់ព័ន្ធមើលឃើញការលូតលាស់អន់ថយមកស្មើប្រមាណពី១.៥% ទៅ ៣.៥% ក្នុងឆ្នាំនេះ បន្ទាប់ពីលូតលាស់បាន ៣.៣%កាលពីឆ្នាំមុន។
រដ្ឋមន្ត្រីការបរទេសខាងលើបានលើកឡើងសាជាថ្មីទៀតថាការធ្ងន់ធ្ងរឡើងនៃសង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិនគឺជាហានិភ័យសម្រាប់សេដ្ឋកិច្ចពិភពលោក។ ភាពមិនប្រាកដប្រជាទាក់ទិននឹងការចាកចេញរបស់អង់គ្លេសពីសហភាពអ៊ឺរ៉ុប និងបញ្ហាដែលពលករកំពុងជួបប្រទះក្នុងការសម្របខ្លួនខណៈដែលមានការផ្លាស់ប្តូរផ្នែកបច្ចេកវិទ្យាក៏ប៉ះពាល់ដល់ការលូតលាស់ពិភពលោកដែរ។
លោក Heng បានបន្តថា ក្នុងអាស៊ីអាគ្នេយ៍ សេដ្ឋកិច្ចក្នុងតំបន់កំពុងតែទទួលបានអត្ថប្រយោជន៍ខណៈដែលក្រុមហ៊ុនផ្លាស់ប្តូរខ្សែសង្វាក់ផលិតកម្មសម្រាប់កំណើនពន្ធក្នុងសហរដ្ឋអាមេរិកនិងប្រទេសចិន។
លោកបានបន្តថា មានទស្សនៈគិតថាខ្សែសង្វាក់ផ្គត់ផ្គង់ពិភពលោកកំពុងតែត្រូវបានផ្លាស់ប្តូរយ៉ាងលឿន ហើយបច្ចុប្បន្ននេះមនុស្សឲ្យសារៈសំខាន់លើភាពរឹងមាំនៃខ្សែសង្វាក់ផ្គត់ផ្គង់ដែលមានន័យថាអាចបង្កឲ្យមានការផ្ទេរដំណើរការមកកាន់ប្រទេសក្នុងអាស៊ាន។
លោកបានបន្ថែមថា ជម្លោះពាណិជ្ជកម្មរវាងសហរដ្ឋអាមេរិកនិងប្រទេសចិនមិនមែនជាជម្លោះដែលអាចបញ្ចប់បានងាយស្រួលទេព្រោះសិទ្ធិកម្មសិទិ្ធបញ្ញា និងការប្រកួតប្រជែងទាក់ទិននឹងបច្ចេកវិទ្យានឹងបន្តកើតមានឡើង ៕
ចែករំលែកព័តមាននេះ