ខេត្តប៉ៃលិន ៖ ដោយព្រួយបារម្ភពីសុវត្ថិភាពចរាចរណ៍នៅតាមដងផ្លូវនានាដែលអាចនឹងកើត មានឡើងទើបនៅឱកាសមុនបុណ្យចូលឆ្នាំថ្មីប្រពៃណីជាតិនេះនគរបាលចរាចរណ៍ជើងគោក ខេត្តសហការជាមួយនឹងមន្ត្រីជំនាញមន្ទីរសាធារណការ និងដឹកជញ្ជូនខេត្តប៉ៃលិនបានចុះណែនាំដល់ប្រជាពលរដ្ឋឱ្យយកចិត្តទុកដាក់គោរពច្បាប់ចរាចរណ៍ទាំងអស់ ដើម្បីរក្សាសុវត្ថិភាព ។
ហេតុការណ៍នគរបាលចុះណែនាំពីច្បាប់ចរាចរណ៍ដល់ប្រជាពលរដ្ឋនេះបានធ្វើឡើង កាលពីវេលាម៉ោង៧និង៣០នាទីព្រឹក ថ្ងៃទី១០ ខែមេសា ឆ្នាំ២០១៩ ស្ថិតនៅបណ្តោយផ្លូវជាតិលេខ៥៧ ត្រង់ចំណតរថយន្តថ្មី ក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ។ ប្រភពព័ត៌មានពីលោកវរសេនីយត្រី ប្រាក់ វិគុណ នាយរងការិយាល័យចរាចរណ៍ជើងគោកខេត្តប៉ៃលិនបានឱ្យដឹងថា គោលបំណងដែលក្រុមនគរបាលចរាចរណ៍ចុះណែនាំដល់ប្រជាពលរដ្ឋបើកបរម៉ូតូ និង រថយន្តនៅលើដងផ្លូវជាតិពេលនេះ គឺដើម្បីឱ្យពួកគាត់គោរពច្បាប់ចរាចរណ៍ក្នុងការរក្សាអាយុជីវិតរបស់ខ្លួន និងអ្នកដទៃ ។
លោកបន្តទៀតថា គ្រប់ម៉ូតូទាំងអស់ត្រូវបិទស្លាកចំណាំងផ្លាតផ្នែកខាងក្រោយ ដើម្បីឱ្យការបើកបរនាពេលយប់ ងាយស្រួលដល់អ្នកដទៃមើល ហើយមិនត្រូវដឹកសំពីងសំពោងជាហេតុបង្កឱ្យកើតករណីគ្រោះថ្នាក់ចរាចរណ៍ជាយថាហេតុនោះទេ ។ លោកបញ្ជាក់ថា អ្នកបើកបរទាំងអស់ត្រូវប្រកាន់ក្រមសីលធម៌ទាំង១០ចំណុច គឺទី១- មិនត្រូវបើកបរលើសល្បឿនកំណត់ជាដាច់ខាត ទី២-មិនត្រូវបើកបរស្ថិតក្រោមឥទ្ធិពលគ្រឿងស្រវឹងដាច់ខាត ទី៣- មិនត្រូវបើកបរស្ថិតក្រោមឥទ្ធិពលគ្រឿងញៀនដាច់ខាត ទី៤- មិនត្រូវបើកបរស្ថិតក្រោមស្ថានភាពងងុយដឹកដាច់ខាត ទី៥-ត្រូវចេះបើកបរឱ្យបានត្រឹមត្រូវដាច់ខាត ទី៦ – ត្រូវពាក់មួកសុវត្ថិភាពជានិច្ច ទី៧- ត្រូវពាក់ខ្សែក្រវាត់សុវត្ថិភាពជានិច្ច ទី៨- ត្រូវប្រកាន់ស្តាំជានិច្ច ទី៩- ត្រូវពិនិត្យលក្ខណ:បច្ចេកទេសយានយន្តជានិច្ច និងទី១០- ត្រូវប្រុងប្រយ័ត្នជានិច្ច ។
ចំណែកអ្នកបើកបររថយន្តឈ្នួលបានឱ្យដឹងដែរថា នៅរដូវបុណ្យចូលឆ្នាំថ្មីប្រពៃណីជាតិនេះ គឺមានម៉ូយច្រើនងាយស្រួលក្នុងការដឹក ហើយការដឹកជញ្ជូនលើសចំណុះក៏មិនមានជាបញ្ហាអ្វីដែរ ជាពិសេសការដឹកសំពីងសំពោងពីលើដំបូលរថយន្តអត់មានការហាមឃាត់នោះទេ គឺគ្រាន់តែបង់លុយឱ្យទៅខាងនគរបាលចរាចរណ៍តាមគោលដៅដោយ១កន្លែងចាប់ពី៥០០០រៀលទៅ១០០០០រៀលនោះជាការស្រេច ៕
ចែករំលែកព័តមាននេះ