ខេត្តប៉ៃលិន ៖ ពលករខ្លះនាំទាំងកូនតូចៗជិះតាមរថយន្តមកចតឈប់នៅក្បែរច្រកទ្វារដើម្បីបន្តដំណើរទៅតាមបណ្តាខេត្តផ្សេងៗ ដោយចាប់ផ្តើមតាំងពីដើមខែមេសានេះរហូតដល់កៀកចូលឆ្នាំតែម្តង ។ ហេតុការណ៍ពលករនាំគ្នាឆ្លងដែនច្រកទ្វារអន្តរជាតិព្រំនេះបានកើតឡើងកាលពីព្រឹកថ្ងៃទី០៩ ខែមេសា ឆ្នាំ២០១៩ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានបានឱ្យដឹងថា ដោយសាររដូវបុណ្យចូលឆ្នាំខ្មែរប្រពៃណីជាតិកាន់តែកៀកខិតជិតមកដល់រហូតមកដល់ពេលនេះពលករក្មេងចាស់ប្រុសស្រីជាច្រើននាក់កំពុងសម្រុកឆ្លងដែនចូលមកក្នុងទឹកដីប្រទេសខ្មែរដោយអ្នកខ្លះមានទាំងឥវ៉ាន់សម្ភារប្រើប្រាស់ឆ្នាំងចាន គ្រឿងបំពងសម្លេងជាដើម ដោយវេចខ្ចប់យ៉ាងល្អក្នុងគោលបំណងយកទៅរាំលេងកម្សាន្តនាថ្ងៃបុណ្យចូលឆ្នាំខ្មែរ ។
ប្រភពបន្តទៀតថា ការឆ្លងដែនចូលមកក្នុងទឹកដីប្រទេសកម្ពុជាវិញមិនមានការបង់លុយនៅនឹងច្រកទ្វារនោះទេ គ្រាន់តែអស់ថ្លៃជិះរថយន្តធ្វើដំណើរពីប្រទេសថៃចូលមកក្នុងទឹកដីខ្មែរប៉ុណ្ណោះ ។
ពាក់ព័ន្ធនឹងបញ្ហានេះលោក សុខ សាវុធ ប្រធានការិយាល័យច្រកទ្វារអន្តរជាតិព្រំបានឱ្យដឹងថា រហូតមកដល់ឥឡូវនេះមានពលករជាច្រើនដែលរស់នៅតាមបណ្តាខេត្តនានាក្នុងប្រទេសកម្ពុជាបាននាំគ្នាធ្វើដំណើរឆ្លងកាត់ច្រកទ្វារអន្តរជាតិព្រំដែលក្នុង១ថ្ងៃៗប្រជាពលរដ្ឋខ្មែរចូលមកចំនួន២០០នាក់ ជូនកាល៣០០នាក់ ហើយថ្ងៃខ្លះទៀតរហូតដល់៤០០នាក់ ជាបន្តបន្ទាប់ឥតដាច់ តាមរយៈក្រុមហ៊ុនដឹកជញ្ជូនមួយប្រចាំនៅក្បែរនោះតែម្តង ។
លោកបន្តទៀតថា ការឆ្លងដែនមិនមានការបង់ថ្លៃច្រកទ្វារអ្វីនោះទេ គឺមានការសម្របសម្រួលពីខាងរដ្ឋាភិបាលខ្មែរយើងដើម្បីធ្វើយ៉ាងណាឱ្យប្រជាពលរដ្ឋឆ្លងដែនចេញចូលទៅមកដោយសុវត្ថិភាព និងមានភាពកក់ក្តៅ ។ លោកបញ្ជាក់ទៀតថា ទោះបីជាយ៉ាងណា ក៏ខាងសមត្ថកិច្ចប្រចាំនៅច្រកទ្វារ ធ្វើចរាចរណ៍យ៉ាងណាឱ្យពលរដ្ឋរបស់ខ្លួន ឆ្លងចូលមកដោយគ្មានការភ័យបារម្ភ និងឆាប់រហ័សដើម្បីបន្តដំណើរទៅស្រុកកំណើតរបស់ខ្លួន ៕
ចែករំលែកព័តមាននេះ