រដ្ឋធានីវ៉ាស៊ីនតោន ៖ ភ្នាក់ងារសារព័ត៌មាន Reuters បានរាយការណ៍មកថា សហរដ្ឋអាមេរិក និងប្រទេសចិនបានសម្រេចការចរចាដំណាក់កាលថ្មីកាលពីថ្ងៃសុក្រ ហើយនឹងបន្តការចរចាសាជាថ្មីទៀតនៅសប្តាហ៍នេះដើម្បីសម្រេចបានកិច្ចព្រមព្រៀងមួយដែលអាចបញ្ចប់សង្គ្រាមពាណិជ្ជកម្ម ។ ភាគីទាំងពីរមិនបានផ្តល់ព័ត៌មានលម្អិតទាក់ទិននឹងដំណើរការនៃការចរចាទេ…
រដ្ឋធានីវ៉ាស៊ីនតោន ៖ ភ្នាក់ងារសារព័ត៌មាន Reuters បានរាយការណ៍មកថា សហរដ្ឋអាមេរិក និងប្រទេសចិនបានសម្រេចការចរចាដំណាក់កាលថ្មីកាលពីថ្ងៃសុក្រ ហើយនឹងបន្តការចរចាសាជាថ្មីទៀតនៅសប្តាហ៍នេះដើម្បីសម្រេចបានកិច្ចព្រមព្រៀងមួយដែលអាចបញ្ចប់សង្គ្រាមពាណិជ្ជកម្ម ។
ភាគីទាំងពីរមិនបានផ្តល់ព័ត៌មានលម្អិតទាក់ទិននឹងដំណើរការនៃការចរចាទេ ខណៈដែលលោកឧប្បនាយករដ្ឋមន្ត្រី Liu He របស់ប្រទេសចិនបញ្ចប់កិច្ចប្រជុំជាមួយនឹងអ្នកតំណាងពាណិជ្ជកម្មអាមេរិកគឺលោក Robert Lighthizer និង លោក Steven Mnuchin ដែលជារដ្ឋមន្ត្រីរតនាគារ ។ កាលពីថ្ងៃព្រហស្បត្តិ៍កន្លងមកនេះ លោកប្រធានាធិបតីដូណាល់ត្រាំ បាននិយាយថាកិច្ចព្រមព្រៀងអាចនឹងត្រូវបានប្រកាសក្នុងកំឡុងពេល៤សប្តាហ៍ទៀត។
កាលពីឆ្នាំមុន សហរដ្ឋអាមេរិកនិងប្រទេសចិនបានដាក់ពន្ធលើផលិតផលគ្នាទៅវិញទៅមកដែលបានបង្កឲ្យភាគីទាំងពីរខាតបង់ថវិការាប់ប៊ីលានដុល្លារ និងបានបង្កឲ្យមានការរអាក់រអន់នៃផលិតកម្មនិងខ្សែសង្វាក់ផ្គត់ផ្គង់ផងដែរ។
សហរដ្ឋអាមេរិកកំពុងតែទាមទារឲ្យប្រទេសចិនកែទម្រង់សកម្មភាពដែលបង្កឲ្យមានការលួចកម្មសិទ្ធិបញ្ញារបស់សហរដ្ឋអាមេរិក និងការបង្ខំឲ្យផ្ទេរបច្ចេកវិទ្យាពីក្រុមហ៊ុនអាមេរិកទៅកាន់ក្រុមហ៊ុនចិន។
ការិយាល័យអ្នកតំណាងពាណិជ្ជកម្មអាមេរិកបាននិយាយក្នុងសេចក្តីថ្លែងការណ៍មួយថា «នៅមានការងារច្រើនទៀតដែលនៅសល់ ហើយប្រធាន អនុរដ្ឋមន្ត្រី និងសមាជិកគណៈប្រតិភូនឹងបន្តទាក់ទងគ្នាដើម្បីដោះស្រាយបញ្ហាធំៗ»។ ការចរចាបានគ្របដណ្តប់លើកម្មសិទ្ធិបញ្ញា ការបង្ខំឲ្យមានការផ្ទេរបច្ចេកវិទ្យា ពន្ធក្រៅពីពន្ធ ការទិញកសិផល និងសេវាកម្ម រួមជាមួយនឹងការអនុម័តកិច្ចព្រមព្រៀងផងដែរ ។
លោក Larry Kudlow ដែលជាទីប្រឹក្សារបស់ White House បាននិយាយថា លោក Liu នឹងធ្វើដំណើរទៅកាន់ប្រទេសចិនវិញបន្ទាប់ពីការចរចា ប៉ុន្តែភាគីទាំងពីរនឹងបន្តខិតខំប្រឹងប្រែងដើម្បីដោះស្រាយកន្លែងដែលមានការខ្វែងគំនិតគ្នា។
សហរដ្ឋអាមេរិកក៏ទាមទារឲ្យប្រទេសចិនកាត់បន្ថយការផ្តល់ឧបត្ថម្ភធនដល់វិស័យឧស្សាហកម្ម បើកទូលាយសេដ្ឋកិច្ច និងបង្កើនការទិញផលិតផលពីសហរដ្ឋអាមេរិកផងដែរ ៕
ចែករំលែកព័តមាននេះ