ខេត្តកោះកុង ៖ ប្រភពពីមជ្ឈដ្ឋានខាងក្រៅខ្សឹបតៗគ្នាថា ដីកម្មសិទ្ធិរបស់ខ័ណ្ឌរដ្ឋបាលព្រៃឈើកោះកុងចំនួន២ប្លង់ ត្រូវបានលោកប្រធានមន្ទីរចាត់ចែងវ៉ៃចេញលក់ហ្មត់ដូចអាចម៍ទីទុយឱ្យឧត្តមសេនីយ៍ទោទា ហានម្នាក់ពុះឡូតិ៍លក់ស្រេចបាត់ទៅហើយ មានទំហំ១៤ហិកតា បានតម្លៃដល់ទៅរាប់លានដុល្លារឯណោះ។
ទំនងលោកប្រធានស្មានតែសុីហើយជូតមាត់ស្អាត ដឹងអីបែកការធ្លាយដល់ឋានលើ ព្រោះតែឋានទេវតាមិនឯកភាពក៏បានចាត់តាំងមន្ត្រីឱ្យចុះមកបើកកកាយរឿងនេះសាជាថ្មី ព្រោះហេតុអីក៏ថ្លើមពាសមេឃហ៊ានយកដីរដ្ឋទៅលក់ស្រេចតែចិត្តបែបនេះកំពុងធ្វើឱ្យរញ្ជួយពិភពខេត្ត និងរសើបមិនទាន់បាត់នៅឡើយ។
តាមន្ត្រីរដ្ឋបាលព្រៃឈើម្នាក់សុំមិនចេញឈ្មោះ បានបង្ហើបថា ជុំវិញការលក់ដីរដ្ឋនេះ លោកប្រធានមន្ទីរបានចាត់ឱ្យមន្ត្រីផ្នែករដ្ឋបាលព្រៃឈើក្រុងខេមរៈភូមិន្ទម្នាក់ ឈរឈ្មោះជាអ្នកលក់ដីរដ្ឋនេះជំនួសលោកប្រធាន ។ ប៉ុន្តែបន្ទាប់ពីដឹងថា ថ្នាក់លើមិនឯកភាពឱ្យលក់ មិនចូលហ៊ុនហយជាមួយ ខ្លាចជាប់រឿងបែកពាងប្រហុកជាមួយក៏សុំផ្ទេរចេញពីខេត្តកោះកុងយ៉ាងតក់ក្រហល់។
បន្ទាប់មកនៅថ្ងៃទី៧ មីនា ២០១៩ ក្រសួង ដែលជាឋានលើបានចេញលិខិតមួយច្បាប់ ព្រមាននិងបញ្ជាឱ្យប្រធានមន្ទីរអនុវត្តន៍ជាបន្ទាន់នូវកំហុសឆ្គង១០ចំណុច ក្នុងនោះមានចំណុចសំខាន់គួរកត់សម្គាល់ គឺរឿងបាត់ដីរបស់រដ្ឋ ដែលត្រូវតែប្រមូលទីតាំងដីរដ្ឋរបស់មន្ទីរដែលបានលួចលក់ឬជួល យកមកគ្រប់គ្រងជាសម្បត្តិរដ្ឋវិញជាកំហិត ។
ប៉ុន្តែរហូតមកដល់ពេលនេះមានដំណឹងមិនច្បាស់សោះថា លោកប្រធានមន្ទីរនៅមិនទាន់អនុវត្តតាមការណែនាំរបស់ឋានលើនៅឡើយទេ ទំនងអាងខ្នងណាមួយហើយ។ តើខ្នងណាមួយទៅហ្ន៎…ដែលលោកប្រធានយកមកផ្អែកជាប់ខ្នងនោះ ?
កោះសន្តិភាពបានព្យាយាមទំនាក់ទំនងទៅលោក អុី ម៉េងលាង ប្រធានមន្ទីរកសិកម្មខេត្តកោះកុងដើម្បីសុំការបំភ្លឺជុំវិញរឿងអាស្រូវខាងលើនេះតាមរយៈមន្ត្រីរដ្ឋបាល របស់មន្ទីរដែរតែលោកប្រធានមន្ទីរមិនបានឆ្លើយតបមកវិញឡើយ ធ្វើឱ្យការផ្សាយរបស់កោះសន្តិភាពមិនទាន់បានគ្រប់ជ្រុងជ្រោយនៅឡើយដែលអ្នកខ្លះគិតថា ធ្វើជ្រូកមិនគួររាទឹកក្តៅបែបនេះសោះដូចពាក្យថា ហ៊ានស៊ីតែមិនហ៊ានសង ។
មជ្ឈដ្ឋាននានាលើកឡើងថា ពាងប្រហុកបែកជះក្លិនស្អុយអាសោចបែបនេះទៅហើយ ហេតុអីសាមុីក្រសួងនៅតែមិនហ៊ានកាត់សាច់ស្អុយនេះចោលឬក៏ចង់យកសាច់ស្អុយនេះមកធ្វើគ្រឿងក្លែមដែរ ? ពេលណាមានព័ត៌មានប្លែក ឬបានទទួលការបំភ្លឺលើបញ្ហាដ៏រសើបនេះ កោះសន្តិភាពនឹងផ្សាយជូនបន្តទៀតដើម្បីកុំឱ្យមជ្ឈដ្ឋាននានាយល់ច្រឡំថាលោកប្រធានស៊ីច្រើនមិនបែកពោះសោះ។ ល ។
ចែករំលែកព័តមាននេះ