ខេត្តកំពង់ចាម ៖ ក្រោមការស្រាវជ្រាវយ៉ាងក្តៅគគុករបស់សមត្ថកិច្ចគ្រប់លំដាប់ថ្នាក់ ទីបំផុតជនសង្ស័យម្នាក់ឈ្មោះ ស៊ីម ខេង ភេទប្រុស អាយុ៥៥ឆ្នាំ មានទីលំនៅក្នុងភូមិត្រពាំងបឹង ឃុំថ្មពូន
ស្រុកព្រៃឈរ បានត្រូវឃាត់ខ្លួនជាប់ចោទជា ឃាតករដ៏ឃោរឃៅ សម្លាប់ជីដូននិងចៅ រួច
កាត់ក្បាលបោះចោលបាត់រកមិនឃើញក្នុងដីចម្ការស្វាយចន្ទីក្រោយផ្ទះប្រមាណ៣៥០ម៉ែត្រ ។
សំណុំរឿងសម្លាប់ជីដូននិងចៅស្រីរួចកាត់ក្បាលយកទៅបាត់នេះ បង្កឲ្យមានការភ្ញាក់ផ្អើល
ជាទូទៅព្រោះការសម្លាប់នេះមានភាពសាហាវព្រៃផ្សៃបំផុត ដែលមហាជនបានថ្កោលទោសពេញផ្ទៃប្រទេស ហើយករណីបែបនេះក៏មិនធ្លាប់មានដែរនៅក្នុងខេត្តកំពង់ចាម ។
កូនស្រីរៀបរាប់ពីបុរសចំណាស់២នាក់តាមស្រឡាញ់ម្តាយស្រី្តឈ្មោះ ស្តើង ចន្ថា អាយុ២៤ឆ្នាំ ជាកូនស្រីរបស់ស្ត្រីរងគ្រោះ បានប្រាប់ឲ្យដឹងនៅល្ងាចថ្ងៃទី៦ ខែមេសាថា ក្រោយពីឪពុកស្លាប់ដោយជំងឺ ម្តាយនាងឈ្មោះ វង្ស អូន អាយុ៥៦ឆ្នាំ បានក្លាយជាស្ត្រីមេម៉ាយមានកូន៤នាក់ តែមិនបានរស់នៅជុំគ្នានទេ ព្រោះសុទ្ធតែមានប្តីប្រពន្ធរៀងៗខ្លួនទៅរស់នៅខេត្តឆ្ងាយៗ ប្រកបរបរផ្សេងៗដើម្បីដោះស្រាយជីវភាពគ្រួសារ តែមិនមានអ្នកណាធូរធារទេ ដូចជារូបនាងនិងប្តីជាដើមគឺរស់នៅស៊ីឈ្នួលគេរស់ទាំងលំបាក ។
កូនស្រីជនរងគ្រោះរៀបរាប់ទៀតថា កាលពី១ទៅ២ឆ្នាំមុនមានបុរសពោះម៉ាយម្នាក់ រស់នៅឃុំផ្អាវ ស្រុកបាធាយ បានមកសួរនាំចង់បានម្តាយនាងធ្វើជាប្រពន្ធ ដោយប្រគល់លុយចំនួន១លាន
រៀលសិន ចំណែកនៅសល់ប៉ុន្មានទៀតនឹងប្រគល់ឲ្យតាមក្រោយ ។ ក្នុងពេលប្រគល់លុយឲ្យនោះ ម្តាយនាងនិយាយថា គាត់ពិតជាស្រឡាញ់ និងពេញចិត្តបុរសពោះម៉ាយនោះ ហើយគិតថានឹងផ្សំផ្គុំនៅពេលណាមួយខាងមុខតាមការគួរ ។ ស្រាប់តែស្អែកឡើងបាត់ម្តាយប្រហែល១ម៉ោង និងឃើញដើរមកពីចម្ការនៅក្រោយផ្ទះ ដោយមានទឹកមុខស្រពាប់ស្រពោន និងមិននិយាយស្តីអ្វីទាំងអស់ ។
កូនស្រីរូបនេះរៀបរាប់បន្តថា លុះពេលសួរនាំម្តាយរកមូលហេតុផ្សេងៗ ត្រូវបានគាត់តបថា«កូនឯងកុំចេះអី រឿងមនុស្សចាស់ទុកឲ្យមនុស្សចាស់ជាអ្នកដោះស្រាយ» ។ ក្រោយមកក៏បាន
ដឹងថា បុរសកូន២ឈ្មោះ សុីម ខេង នៅភូមិត្រពាំងបឹង មានផ្ទះឃ្លាតពីគ្នាប្រមាណ១.៥០០ម៉ែត្រលួចស្រឡាញ់ម្តាយនាង ។ ការដែលមានទឹកមុខស្រពាប់ស្រពោននោះ សង្ស័យតែម្តាយនាងទទួលការព្រមានណាមួយ ទើបក្រោយពីទទួលលុយបាន១ថ្ងៃ ម្តាយនាងក៏យកលុយនោះទៅប្រគល់ឲ្យបុរសពោះម៉ាយនៅផ្អាវ ស្រុកបាធាយវិញ ហើយចាប់តាំងពីពេលនោះមកក៏មិនមានការទាក់ទងគ្នាជាមួយអ្នកនៅផ្អាវនោះទៀតដែរ ។
ចាប់ខ្លួនបុរសពោះម៉ាយដែលលួចស្រឡាញ់ម្តាយនៅព្រឹកថ្ងៃទី៣ ខែមេសា ឆ្នាំ២០១៩ ស្រាប់
បាត់ម្តាយនិងក្មួយស្រីតូចរកមិនឃើញ លុះពេលដើររកក៏ប្រទះឃើញសពនៅក្រោយផ្ទះចម្ងាយ
ប្រមាណ៣៥០ម៉ែត្រ ដោយត្រូវគេកាត់ក្បាលទាំង២នាក់ និងបង្កឲ្យមានការភ្ញាក់ផ្អើលពេញភូមិ ។ ក្រោយមក សមត្ថកិច្ចគ្រប់លំដាប់ថ្នាក់មានស្នងការនគរបាលខេត្ត ស្នងការរង ដោយមានការចូលរួមពីនគរបាលអូស្ត្រាលីផង បានធ្វើការស្រាវជ្រាវរហូតឃាត់ខ្លួនជនម្នាក់ឈ្មោះ ស៊ឹម
ខេង ដែលលួចស្រឡាញ់ម្តាយនាងដោយជាប់សង្ស័យជាអ្នកសម្លាប់ម្តាយនាងនិងក្មួយស្រី ។
ព្រឹកថ្ងៃទី៦ ខែមេសា សមត្ថកិច្ចបាននាំបុរសសង្ស័យរូបនេះទៅក្រោយផ្ទះ ហើយឲ្យវាស់
ស្នាមជើងនៅក្នុងដីចម្ការដែលសមត្ថកិច្ចរក្សាទុក ឃើញថាត្រូវគ្នា ។ មួយទៀតមានក្រមាមួយប្រ
ឡាក់ឈាម ក៏បានរកឃើញនៅកន្លែងកើត ហេតុដែរកាលពីថ្ងៃទី៥ ខែមេសា តែជនសង្ស័យបានបដិសេធថាមិនមែនជាក្រមារបស់ខ្លួនទេ ។
កូនស្រីជនរងគ្រោះរៀបរាប់ទៀតថា ក្រោយពីបានរៀបចំបុណ្យខួប៧ថ្ងៃឲ្យសពម្តាយ និងក្មួយ
ស្រីរួចរាល់ហើយ រូបនាងនិងប្តីត្រូវនាំគ្នាចេញទៅស៊ីឈ្នួលគេដើម្បីចិញ្ចឹមជីវិត ឯផ្ទះដែលម្តាយនាងរស់នៅរាល់ថ្ងៃ ដោយសារអ្នកភូមិមានការភ័យខ្លាចក៏សំណូមពរឲ្យរុះជញ្ជាំងមួយចំហៀងចេញ ហើយនាងនឹងធ្វើតាមសំណូមពរនេះ ដូច្នេះផ្ទះនេះលែងមានអ្នកណារស់នៅទៀតហើយ ។ កន្លងមក នាងនៅជាមួយនឹងម្តាយ តែបើគាត់ស្លាប់ចោលនាងនៅម្នាក់ឯងមិនហ៊ាននៅទេ ព្រោះផ្ទះនៅដាច់ពីគេទៀត ចំណែកប្តីចេញទៅស៊ីឈ្នួលគេនៅស្រុកឆ្ងាយ ដូច្នេះដើម្បីសុវត្ថិភាពមានតែនាងទៅតាមប្តី ។
គួររំឭកថា លោក ស្តើង ទូច អាយុ២៩ឆ្នាំជាកូនរបស់សពបានប្រាប់ថា បច្ចុប្បន្នគាត់បាន
ចាកចេញពីផ្ទះទៅរស់នៅឯស្រុកកំពង់ស្វាយ ខេត្តកំពង់ធំ ហើយជីវភាពក៏ខ្វះខាតដែរ យូរៗម្តងទើបមកលេងម្តាយនៅស្រុកព្រៃឈរនេះ ភាគច្រើនតែក្នុងរដូវបុណ្យទានប៉ុណ្ណោះ ។ នារសៀលថ្ងៃទី៣ ខែមេសា ស្រាប់ប្អូនស្រីផ្តល់ដំណឹងថាម្តាយនិងក្មួយស្រីត្រូវបានគេសម្លាប់នៅក្រោយផ្ទះ ក៏ប្រញាប់ធ្វើដំណើរមកបុណ្យសពម្តាយ ។
លោក ស្តើង ទូច និយាយទៀតថា ម្តាយគាត់ជាមនុស្សស្លូត រស់នៅលើផ្ទះឈើ ជញ្ជាំងស្លឹកប្រក់សង្កសីជាមួយនិងក្មួយស្រីតូចឈ្មោះ ខេង សាវឿន អាយុ៦ឆ្នាំ និងប្អូនស្រីពៅ ។ ករណីឃាតកម្មដ៏សាហាវនេះ រូបគាត់សំណូមពរដល់សមត្ថកិច្ចគ្រប់លំដាប់ថ្នាក់ សូមស្រាវជ្រាវតាមប្រមាញ់ចាប់ក្រុមឃាតករដៃដល់មកផ្តន្ទាទោសតាមច្បាប់ឲ្យខាងតែបាន ។ ជាមួយនេះ សូមតាមរកក្បាលម្តាយនិងក្មួយស្រីតូចនៅក្នុងចម្ការក្រោយផ្ទះបន្តទៀត ហើយតាមរយៈការខិខំប្រឹងប្រែងនេះ មិនយូរទេអាចនឹងរកឃើញជាក់ជាមិនខានឡើយ ។
សពម្តាយនិងក្មួយស្រីត្រូវបានដង្ហែតាមរថយន្តយកទៅបញ្ចុះនៅវត្តថ្មពូន នាព្រឹកថ្ងៃទី៤ ខែមេ
សា ទាំងគ្មានក្បាលនិងរំពឹងថា ពេលណារកក្បាលឃើញនឹងគាស់ផ្នូរតក្បាលជាមួយខ្លួនសពវិញ ។ លុះនៅរសៀលថ្ងៃដដែលរូបគាត់និងសមត្ថកិច្ចជាច្រើននាក់បាននាំគ្នាបន្តទៅក្រោយផ្ទះតាមរកក្បាលម្តាយនិងក្មួយស្រីនៅតាមព្រៃឫស្សី និងក្នុងចម្ការស្វាយចន្ទី ប៉ុន្តែរហូតដល់វេលាម៉ោង៣និង៣០នាទីរសៀលថ្ងៃដដែល មិនទាន់រកឃើញនៅឡើយទេ ។
រហូតមកដល់ពេលនេះ សពនៅតែរង់ចាំតក្បាលអ្នកស្រី ផាត់ ពៅ អាយុ៦៤ឆ្នាំ ក្រុមប្រឹក្សាឃុំថ្ម
ពូន ប្រាប់ថា ស្ត្រីដែលត្រូវឃាតករសម្លាប់នេះបានមករស់នៅក្នុងភូមិត្រពាំងបឹង ឃុំថ្មពូន ស្រុក
ព្រៃឈរ រយៈពេល២៦ឆ្នាំមកហើយ ។ នៅក្នុងស្រុកភូមិ គាត់ជាមនុស្សស្លូត និងចូលចិត្តធ្វើ
បុណ្យដាក់ទានណាស់ ។ អ្នកស្រីមានចម្ងល់ថា ចុះហេតុអី្វបានជាឃាតករប្រល័យសង្ខារជីដូននិងចៅស្រីតូចយ៉ាងដូច្នេះទៅវិញ ហើយដែលកាន់តែតក់ស្លុតទៀតនោះ គឺកាត់ក្បាលយកទៅបាត់ទៀត ។
អ្នកភូមិនិយាយថា នៅថ្ងៃទី២ ខែមេសា ជីដូននិងចៅស្រី បានចេញពីផ្ទះទៅដាំដើមស្វាយចន្ទីនៅក្រោយផ្ទះដោយដាំបាន២ដើម នៅលើដីដែលមានថ្មដុះរដិបរដុបច្រើន ហើយដីនោះតាមឮថាគាត់បានចែកឲ្យទៅកូនហើយ តែដោយសារកូនជាប់រវល់ទៅរកស៊ីនៅឆ្ងាយទើបម្តាយមកដាំឲ្យ ។ ឯនៅឃ្លាតពីដើមស្វាយចន្ទីប្រមាណ២០ទៅ៣០ម៉ែត្រ ជាដីចម្ការរបស់អ្នកផ្សេងដែលមិន
ទាន់បានដាំដុះនោះ គេឃើញមានស្នាមជើងមនុស្ស ដែលទំនងជារត់ដេញចៅស្រីអាយុ៦ឆ្នាំ ដែលរត់សំដៅមកផ្ទះ ។ ស្នាមដានជើងនេះ ទំនងជាចៅស្រីឃើញមនុស្សធ្វើបាបជីដូនក៏ខំប្រឹងរត់គេច តែរត់មិនរួចហើយត្រូវឃាតករតាមទាន់សម្លាប់ទាំង២នាក់បំបិទមាត់ រួចកាត់ក្បាលយកទៅបាត់រកមិនឃើញ ។
ទោះបីជាបែបណា ស្នាមដានជើងនោះ ខ្លះថាជាដានជើងមនុស្សដែលតាមរកសពទៅវិញ ។ នៅព្រឹកថ្ងៃទី៤ ខែមេសា មនុស្សជាច្រើននាក់បាននាំគ្នាបន្តតាមរកនៅកន្លែងប្រទះឃើញសព ដោយមានខ្លះនិយាយថា បានយល់សប្តិថាក្បាលមនុស្សត្រូវឃាតករបោះចោលប្រមាណ២ទៅ៣ម៉ែត្រ ដោយជីកដីកប់ ។ ម្នាក់ៗនាំគ្នាតាមរក ដោយមានកំណាត់ឈើដើរចាក់ដីដែលសើមក្រោយពីភ្លៀងរួច ប៉ុន្តែនៅតែមិនឃើញដដែល សូម្បីតែក្លិនក៏មិនបានភាយចេញពីកន្លែងណាមួយដែរ ។
លោកវរសេនីយ៍ឯក កែវ ស៊ាងហ៊ន់ អធិការនគរបាលស្រុកព្រៃឈរ ថ្លែងថា ព្រឹកថ្ងៃទី៤ ខែមេសា លោក គួច ចំរើន អភិបាលខេត្ត លោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្ត និងកម្លាំងសមត្ថកិច្ចទៅពីភ្នំពេញ បានបន្តតាមរុករកឃាតករដ៏សាហាវឃោរឃៅ ដែលបានសម្លាប់ជីដូននិងចៅស្រី រួចកាត់ក្បាលយកទៅបាត់ នៅចម្ការស្វាយចន្ទីក្រោយផ្ទះជនរងគ្រោះ ។ ពិសេសនោះ នៅក្នុងប្រតិបត្តិការនេះ ក៏មានការចូលរួមពីនគរបាលបច្ចេទេសអូស្ត្រាលីនិងសហការីជាច្រើននាក់ផងដែរ ។
ជនសង្ស័យបដិសេធថាខ្លួនមិនមែនជាឃាតករក្រោយកើតហេតុ បុរសម្នាក់ឈ្មោះ ស៊ីម ខេង
អាយុ៥៥ឆ្នាំ នៅភូមិត្រពាំងបឹង ឃុំថ្មពូន ស្រុកព្រៃឈរ ត្រូវបានឃាត់ជាខ្លួនបណ្តោះអាសន្ន ពាក់ព័ន្ធនឹងករណីឃាតកម្មនេះ ស្របពេលដែលនាំខ្លួនមកពិនិត្យដានជើងនៅក្រោយផ្ទះជនរងគ្រោះបានទទួលស្គាល់ថាពិតជាដានជើងរបស់ខ្លួនមែន ។ ប៉ុន្តែជននេះឆ្លើយថា នៅថ្ងៃក្រោយកើតហេតុនោះកូនស្រីបានដើរមករកសពម្តាយឃើញក៏សន្លប់ ហើយគាត់បានយកប្រេងកូឡាទៅជួយរឺត ។ ចំណែកក្រមាដែលប្រឡាក់ឈាម គឺបុរសនេះបដិសេធថាមិនមែនរបស់ខ្លួនឡើយ ។ នៅព្រឹកថ្ងៃទី៧ ខែមេសា សមត្ថកិច្ចបន្តចុះទៅស្រាវជ្រាវនៅកន្លែងកើតហេតុទៀត៕
ចែករំលែកព័តមាននេះ