រាជធានីភ្នំពេញ ៖ យុវជនមួយក្រុមមានឈ្មោះថា «យុវជនសំរាម» ដែលតែងតែនាំគ្នាធ្វើសកម្មភាពប្រមូលសំរាម ដោយស្ម័គ្រចិត្តពីក្នុងប្រឡាយទឹកស្អុយបឹងត្របែក ទាំងយប់ទាំងថ្ងៃនាពេលកន្លងមក បានធ្វើឱ្យសាធារណមតិចូលរួមលើកទឹកចិត្តចំពោះការងារសង្គមមួយ ដែលកម្រមានអ្នកស្ម័គ្រចិត្តធ្វើបែបនេះ ។
ទោះបីជាបែបណាក្ដីការប៉ុនប៉ងរៀបចំធ្វើពិធីសង្ក្រាន្តឆ្នាំថ្មីមួយឈុត លើប្រឡាយបឹងត្របែក ក្នុងគោលបំណងដើម្បីបំផុសបំផុលទៅដល់ប្រជាពលរដ្ឋ ដែលរស់ក្បែរខាងកុំឱ្យនាំគ្នាបោះសំរាមចោលពាសវាលពាសកាលតទៅទៀត និងមានបំណងប្រែក្លាយតំបន់នេះ អោយមានសោភ័ណភាព មានសម្រស់ស្រស់ស្អាតមួយនោះ ។
ប៉ុន្តែក៏ត្រូវបានកម្លាំងអាជ្ញាធរមូលដ្ឋានខណ្ឌចំការមនរារាំងដោយអះអាងថា (ការធ្វើសង្ក្រាន្ត)នៅទីនេះ គឺធ្វើឡើងដោយគ្មានច្បាប់អនុញ្ញាតិ និងបានណែនាំអោយពួកគេធ្វើការរុះរើចេញវិញ ដោយមានកម្លាំងសមត្ថកិច្ចមួយចំនួនជួយរុះរើចេញអស់វិញភ្លាមៗផងដែរ កាលពីវេលាម៉ោង៦និង៣០នាទីល្ងាច ថ្ងៃទី៦ មេសា នៅចំណុចមាត់ប្រឡាយបឹងត្របែក ដែលមានទីតាំងនៅចំណុចភូមិ៤ សង្កាត់ផ្សារដើមថ្កូវ ខណ្ឌចំការមន ។
តាមប្រភពព័ត៌មានពីសមត្ថកិច្ចមូលដ្ឋានបានប្រាប់ឱ្យដឹងថា កាលពីថ្ងៃទី៦ មេសា មានយុវជនមួយក្រុមដែលមានឈ្មោះថា (យុវជនសំរាម) បាននាំគ្នារៀបចំធ្វើកម្មវិធីសង្ក្រាន្តយុវជននៅលើមាត់ប្រឡាយទឹកស្អុយបឹងត្របែក ។ តែការនាំគ្នាមកធ្វើសង្ក្រាន្តចូលឆ្នាំថ្មី នៅលើមាត់ប្រឡាយបឹងត្របែកខាងលើនេះ គឺពួកគេធ្វើឡើងដោយមិនបានប្រាប់ ឬសុំច្បាប់អនុញ្ញាត្តិ អំពីសំណាក់អាជ្ញាធរមូលដ្ឋាន អោយបានដឹងពីរឿងនេះឡើយ ។
តាមប្រភពដដែលបានប្រាប់បន្តទៀតថា ដេាយសារតែការនាំគ្នាមកធ្វើសង្ក្រាន្តនៅទីតាំងខាងលើ របស់ក្រុមយុវជនដោយមិនបានជូនដំណឹង ឬសុំច្បាប់ការអនុញ្ញាតិ ទើបក្នុងល្ងាចនេះដែរកម្លាំងមានសមត្ថកិច្ចមូលដ្ឋាន ក៏បានចុះមកអោយរុះរើចេញវិញបែបនេះតែម្តង គឺនាំគ្នារុះរើទម្លាក់ចេញវិញយ៉ាងតក់ក្រហល់ ។
ពាក់ព័ន្ធទៅនឹងការចុះមករុះរើទីតាំងសង្ក្រាន្ត របស់ក្រុមយុវជនដែលមានឈ្មោះថា (យុវជនសំរាម) នៅចំណុចមាត់ប្រឡាយទឹកស្អុយបឹងត្របែកខាងលើនេះដែរ ក្រុមយុវជនទាំងនោះមិនមានការប្រឆាំងតវ៉ាអ្វីឡើយ បានយល់ព្រមទៅតាមចំណាត់ការរបស់កម្លាំងអាជ្ញាធរមូលដ្ឋាន ឱ្យធ្វើការរុះរើចេញវិញដោយសន្តិវិធី។
ទោះបីជាបែបណា សាធារណមតិបានយល់ថា អាជ្ញាធរគួរតែអនុគ្រោះ ឬណែនាំដល់ពួកគេ ដែលការយល់ដឹងពីច្បាប់ទម្លាប់ក្នុងសង្គមនៅមានកម្រិត ។ ពួកគេជាធនធានមួយដែលប្រើប្រាស់ថាមពលរបស់ខ្លួន ដើម្បីប្រយោជន៍សង្គមគួរតែមានការលើកទឹកចិត្ត ជាជាងរារាំងលើសកម្មភាពអ្វីមួយ ដែលពួកគេបង្កើតឡើង មិនមានការប៉ះពាល់ដល់សន្តិសុខ ឬសណ្ដាប់ធ្នាប់សង្គម ដែលអាជ្ញាធរគួរតែជួយសម្រួល និងលើកទឹកចិត្ត នោះទើបប្រសើរជាងប្រើអំណាចបែបនេះដែលអត់ចំណេញ មានតែការរិះគន់ទៅ វិញ ៕
ចែករំលែកព័តមាននេះ