ប្រទេសលីប៊ី ៖ ប្រមុខរដ្ឋាភិបាលរួបរួមជាតិលីប៊ី លោកFAYEZ AL SARRAJកាលពីថ្ងៃទី៦មេសា បានព្រមានពីទស្សនវិស័យ ដែលសង្គ្រាមគ្មានអ្នកឈ្នះនៅលីប៊ី ដែលនៅទីនោះកងកម្លាំងរបស់គូប្រឆាំងលោក គឺរបស់សេនាប្រមុខKHALIFA HAFTAR បន្តការវាយលុកលើរដ្ឋធានីក្រុងទ្រីប៉ូលី។
លោកFAYEZ AL SARRAJបានព្រមានថា យើងឈោងដៃឆ្ពោះទៅរកសន្តិភាព ប៉ុន្តែ ក្រោយការឈ្លានពានមួយពីសំណាក់កងកម្លាំងរបស់លោកHAFTAR និងការប្រកាសសង្គ្រាមប្រឆាំងបណ្ដាទីក្រុងរបស់យើងនិងរដ្ឋធានីរបស់យើង នោះគ្មានអ្វីក្រៅពីការប្រើកម្លាំងតបតនិងភាពម៉ឺងម៉ាត់ឡើយ។
ការផ្ទុះឡើងវិញនូវការប្រទូស្តរា៉យគ្នា រវាងកងទ័ពរំដោះជាតិALN របស់សេនាប្រមុខHAFTAR ដែលត្រួតត្រាភាគខាងកើតលីប៊ី ហើយបើកការវាយលុកមួយលើរដ្ឋធានីពីថ្ងៃទី៤មេសាមក និងកងកម្លាំងរបស់រដ្ឋាភិបាលរួបរួមជាតិ ទទួលស្គាល់ដោយសហគមន៍អន្តរជាតិ មានមូលដ្ឋាននៅក្រុងទ្រីប៉ូលី អាចធ្វើឲ្យប្រទេសនេះធ្លាក់ក្នុងសង្គ្រាមស៊ីវិលជាថ្មីទៀត។
លោកFAYEZ AL SARRAJបានចោទប្រកាន់លោកHAFTARថា បង្កសង្គ្រាមដែលគ្មានអ្នកឈ្នះ ហើយបំផ្លាញការខិតខំប្រឹងប្រែងរបស់ពលរដ្ឋលីប៊ិនិងសហគមន៍អន្តរជាតិ សំដៅស្វែងរកដំណាះស្រាយដោយសន្តិវិធីមួយ។
ដោយមិនអើពើដល់ការអំពាវនាវរបស់សហគមន៍អន្តរជាតិឲ្យមានការអត់ធ្មត់ កងកម្លាំងរបស់លោកHAFTAR កាលពីថ្ងៃទី៦មេសាបន្តការវាយលុក ឆ្ពោះមកកាន់ក្រុងទ្រីប៉ូលី តែការរុលទៅមុខរបស់ពួកគេត្រូវបានបង្អាក់ដោយកងកម្លាំងស្មោះត្រង់នឹងរដ្ឋាភិបាលរួបរួមជាតិ។ កងកម្លាំងនោះបានវាយប្រហារតាមអាកាសយ៉ាងខ្លាំងក្លា ប្រឆាំងកងកម្លាំងលោកHAFTAR។ នៅលើដីកងកម្លាំងទាំង២បានបង្កើនការប្រយុទ្ធគ្នានៅភាគខាងត្បូងរដ្ឋធានី៕
ចែករំលែកព័តមាននេះ