រាជធានីភ្នំពេញ ៖ យុវជនមួយក្រុមដែលមានឈ្មោះថា «យុវជនសំរាម» ដែលនាំគ្នាធ្វើសកម្មភាពប្រមូលសំរាមពីក្នុងប្រឡាយទឹកស្អុយបឹងត្របែកទាំងយប់ទាំងថ្ងៃនាពេលកន្លងមកនោះ បាននាំគ្នារៀបចំធ្វើពិធីសង្ក្រាន្តលើប្រឡាយបឹងត្របែក ក្នុងគោលបំណងដើម្បីបំផុសដល់ប្រជាពលរដ្ឋដែលរស់ក្បែរខាងកុំឱ្យនាំគ្នាបោះសំរាមចោលពាសវាលពាសកាល និងចង់ប្រែក្លាយតំបន់នោះអោយមានសោភ័ណ្ឌភាពស្រស់ស្អាតផងនោះ តែត្រូវបានកម្លាំងអាជ្ញាធរមូលដ្ឋានខណ្ឌចំការមនអះអាងថា ការរៀបចំធ្វើពិធីសង្ក្រាន្តនៅទីនេះ គឺធ្វើឡើងដោយគ្មានច្បាប់អនុញ្ញាត ហើយអាជ្ញាធរបានណែនាំអោយរុះរើចេញវិញ ដោយមានកម្លាំងសមត្ថកិច្ចមួយចំនួន ជួយធ្វើការរុះរើចេញអស់ភ្លាមៗផងដែរ។
ការចុះរុះរើទីតាំងធ្វើពិធីសង្ក្រាន្តខាងលើនេះបានធ្វើឡើងកាលពីវេលាម៉ោង៦និង៣០នាទីយប់ថ្ងៃទី៦ ខែមេសា ឆ្នាំ២០១៩ នៅចំណុចមាត់ប្រឡាយបឹងត្របែក ដែលមានទីតាំងនៅចំណុចភូមិ៤ សង្កាត់ផ្សារ ដើមថ្កូវ ខណ្ឌចំការមន។
តាមប្រភពព័ត៌មានពីសមត្ថកិច្ចមូលដ្ឋានបានប្រាប់ឱ្យដឹងថា កាលពីថ្ងៃទី៦ ខែមេសា ឆ្នាំ ២០១៩ នេះមានយុវជនមួយក្រុមឈ្មោះថា «យុវជនសំរាម» បាននាំគ្នារៀបចំធ្វើពិធីសង្ក្រាន្តយុវជននៅលើមាត់ប្រឡាយទឹកស្អុយបឹងត្របែកខាងលើនេះ តែការនាំគ្នាមកធ្វើពិធីសង្ក្រាន្តចូលឆ្នាំថ្មីនៅលើមាត់ប្រឡាយបឹងត្របែកខាងលើនេះ គឺក្រុមយុវជនធ្វើឡើងដោយមិនបានប្រាប់ ឬសុំច្បាប់ពីសំណាក់អាជ្ញាធរមូលដ្ឋានអោយបានដឹងនោះឡើយ។
តាមប្រភពដដែលបានប្រាប់បន្តថា ដោយសារតែការនាំគ្នាមកធ្វើពិធីសង្ក្រាន្តនៅទីតាំងខាងលើរបស់ក្រុមយុវជន ដោយមិនបានជូនដំណឹង ឬសុំច្បាប់ពីអាជ្ញាធរមូលដ្ឋានអោយបានដឹងនោះ ទើបនៅវេលាខាងលើ កម្លាំងមានសមត្ថកិច្ចមូលដ្ឋានក៏បានចុះមកអោយរុះរើចេញវិញបែបនេះតែម្តង។
គួរបញ្ជាក់ថា កាលពីពេលកន្លងមកនេះ ដោយសារតែនៅក្នុងប្រឡាយទឹកស្អុយបឹងត្របែកពោរពេញទៅដោយសំរាមនោះ ត្រូវបានយុវជនមួយក្រុមមានទាំងប្រុស មានទាំងស្រីបាននាំគ្នាចុះមកធ្វើសកម្មភាពរើសសំរាម និងប្រមូលសំរាមចេញពីប្រឡាយទឹកស្អុយបឹងត្របែក ក្នុងគោលបំណងបំផុសអោយប្រជាពលរដ្ឋដែលរស់នៅក្បែរខាងកុំឱ្យបោះសំរាមចោលពាសវាលពាសកាល និងចងើប្រែក្លាយតំបន់នេះអោយមានសោភ័ណ្ឌភាពស្រស់ស្អាតឡើងវិញផងដែរ។
ពាក់ព័ន្ធទៅនឹងការចុះមករុះរើទីតាំងធ្វើពិធីសង្ក្រាន្តរបស់ក្រុមយុវជនដែលមានឈ្មោះថា «យុវជនសំរាម» នៅចំណុចមាត់ប្រឡាយទឹកស្អុយបឹងត្របែកខាងលើនេះដែរ ក្រុមយុវជនទាំងនោះមិនមានការប្រឆាំងតវ៉ាអ្វីឡើយ និងយល់ព្រមតាមចំណាត់ការរបស់កម្លាំងអាជ្ញាធរមូលដ្ឋានធ្វើការរុះរើចេញវិញដោយសន្តិវិធី ៕
ចែករំលែកព័តមាននេះ