ខេត្តបន្ទាយមានជ័យ ៖ ស្ត្រីម្នាក់ទើបរៀបការបាន៤ទៅ៥ខែត្រូវរថយន្តសណ្តោងរ៉ឺម៉កដឹកស៊ីម៉ង់ត៍របស់ថៃកិនបែកក្បាលស្លាប់យ៉ាងអាណោចអាធ័មលើដងផ្លូវនៅច្រកទ្វារអន្តរជាតិប៉ោយប៉ែត មុខកាស៊ីណូក្រែនដាយម៉ិនស៊ីធី ខណៈកំពុងជិៈម៉ូតូជាមួយប្តីហើយត្រូវបានគេសង្ស័យថាដៃចង្កូតម៉ូតូជនរងគ្រោះប៉ះជាមួយរទេះ ខ្លះសង្ស័យថាដៃចង្កូតម៉ូតូជនរងគ្រោះប៉ះជាមួយដៃចង្កូតម៉ូតូអ្នកផ្សេងពេលផ្លូវកំពុងចង្អៀត។ ហេតុ
ការណ៍ខាងលើនេះបានកើតឡើងកាលពីរសៀលថ្ងៃទី៦ មេសា ២០១៩ ។
ស្ត្រីរងគ្រោះដែលស្លាប់ឈ្មោះឆាយ គឹមណេង អាយុ២៤ឆ្នាំ ស្នាក់នៅម្តុំដើមស្រល់ទឹកដីកាស៊ីណូ ភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត (មកលេងបងបង្កើត និងបងថ្លៃ) និងមានទីលំនៅភូមិ២ សង្កាត់កំពេញ ខណ្ឌស្ទឹងហាវ ខេត្តព្រះសីហនុ។
តាមប្រភពព័ត៌មាននៅកន្លែងកើតហេតុបានឱ្យដឹងថា មុនកើតហេតុ គេឃើញស្ត្រីរងគ្រោះជិះម៉ូតូមួយគ្រឿងម៉ាកSpacy ពណ៌ក្រហម គ្មានស្លាកលេខ ដែលបើកបរដោយបុរសជាប្តីឈ្មោះស រាត្រី អាយុ២៨ឆ្នាំ ធ្វើដំណើរក្នុងទិសដៅពីលិចទៅកើត លុះដល់ចំណុចកើតហេតុ មិនដឹងថាបណ្តាលមកពីមូលហេតុអ្វីនោះទេ ស្រាប់តែស្ត្រីជាប្រពន្ធធ្លាក់ពីលើម៉ូតូ ហើយត្រូវបានគេសង្ស័យថាដៃចង្កូតម៉ូតូជនរងគ្រោះប៉ះនឹងអ្វីមួយ បណ្តាលឲ្យរថយន្តថៃមួយគ្រឿងម៉ាកអុីស៊ុយហ្សុ៊យចង្កូតស្តាំ សណ្តោងរ៉ឺម៉កដឹកស៊ីម៉ង់ត៍ ដែលកំពុងបើកបរស្របទិសគ្នាត្រូវកង់ក្រោយរថយន្តផ្នែកខាងឆ្វេងកិន បណ្តាលឱ្យស្ត្រីជាប្រពន្ធស្លាប់យ៉ាងអាណោចអាធ័ម ខណៈបុរសជាប្តីរួចផុតជីវិត។
សមត្ថកិច្ចជំនាញបានប្រាប់ឱ្យដឹងថា ក្រោយពេលកើតហេតុ អ្នកបើកបររថយន្តជាជនជាតិថៃបានគេចខ្លួនបាត់ហើយពេលនេះសមត្ថកិច្ចជំនាញពាក់ព័ន្ធកំពុងធ្វើការវាស់វែង និងសាកសួររកមូលហេតុ ហើយរថយន្តសណ្តោងដឹកស៊ីម៉ង់ត៍របស់ថៃ និងម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលក្រុងដើម្បីបន្តនិតិវិធី។
តាមប្រភពព័ត៌មានចុងក្រោយនៅម៉ោង៦ល្ងាចថ្ងៃដដែល សពស្ត្រីរងគ្រោះត្រូវបានសាច់ញាតិជួលរថយន្តដឹកទៅកាន់លំនៅដ្ឋានឯខេត្តព្រះសីហនុ ដើម្បីរៀបចំធ្វើបុណ្យតាមប្រពៃណីយ។
មុនចាកចេញពីក្រុងប៉ោយប៉ែត ប្តីរបស់ស្ត្រីរងគ្រោះបានប្រាប់សាច់ញាតិឱ្យដឹងថា មុនកើតហេតុ គឺដៃចង្កូតម៉ូតូរបស់គាត់បានប៉ះនឹងដៃរទេះដែលគេអូសកាត់កន្លែងកើតហេតុ ទើបបណ្តាលឲ្យមានគ្រោះថ្នាក់ដ៏រន្ធត់នេះកើតឡើង ។ តាមប្រភពពីសាច់ញាតិបានប្រាប់ឱ្យដឹងថា ស្ត្រីរងគ្រោះនិងប្តីទើបតែរៀបការបាន៤ទៅ៥ខែតែប៉ុណ្ណោះ៕
ចែករំលែកព័តមាននេះ