ខេត្តកំពត ៖ តាមប្រភពពីនគរបាលចរាចរណ៍ស្រុកទឹកឈូបានឲ្យដឹងថា នៅថ្ងៃទី៥ ខែមេសា ឆ្នាំ ២០១៩នេះមានករណីគ្រោះថ្នាក់ចរាចរកើតឡើងពីរករណីនៅក្នុងស្រុកទឹកឈូ បណ្តាលឲ្យមនុស្សប្រុស ស្រីបួន នាក់រងរបួសធ្ងន់ និងពីរនាក់រងរបួសស្រាលមានទាំងជនបរទេសផងដែរ ។
ហេតុការទី១៖ កាលពីវេលាម៉ោង០២និង៣០នាទីរសៀលថ្ងៃទី៥ ខែមេសា ឆ្នាំ២០១៩ លើផ្លូវជាតិលេខ៣កំពត វាលរេញ ត្រង់ចំណុចផ្លូវបំបែកចូលផែគីឡូ១២ ស្ថិតក្នុងភូមិគីឡូ១២ ឃុំកោះតូច ស្រុកទឹកឈូ បង្កឡើងដោយម៉ូតូ២គ្រឿងបុកគ្នាក្នុងទិសដៅស្របគ្នាពីកើតទៅលិច ។
ប្រភពបានបន្តថា ម៉ូតូម៉ាកសង់កូរ៉េ ពណ៌ក្រហម គ្មានផ្លាកលេខ បើកបរក្នុងទិសដៅពីកើតទៅលិច លុះដល់ចំណុចផ្លូវបំបែកចូលផែគីឡូ១២ បានបង្អង់ល្បឿនបំរុងបត់ចូលទៅផែ ដោយម៉ូតូចាស់គ្មានភ្លើងស៊ីញ៉ូផង ក៏ស្រាប់មានម៉ូតូធំមួយគ្រឿងបើកបរដោយជនបរទេសក្នុងទិសដៅស្របគ្នា បានបុកពីក្រោយពេញទំហ៊ឹង បណ្តាលឲ្យអ្នកជិះម៉ូតូសង់កូរ៉េរងរបួសធ្ងន់២នាក់ និងស្រាលម្នាក់ រីឯជនបរទេសក៏រងរបួសធ្ងន់ម្នាក់ និងស្រាលម្នាក់ដែរ ។
អ្នករងរបួសខាងម៉ូតូសង់កូរ៉េពីរនាក់មានឈ្មោះ ១ – ស៊ុយ សង្វាត ភេទប្រុស អាយុ៣៥ ឆ្នាំអ្នកបើកបរ (របួសស្រាល) និង២- ឈ្មោះទុយ ចន្លី ភេទស្រី អាយុ៣២ ឆ្នាំ អ្នករួមដំណើរ(របួសធ្ងន់) ទី៣- ឈ្មោះធី ភេទប្រុស បានរងរបួសធ្ងន់ ត្រូវបានបញ្ជូនទៅមន្ទីរពេទ្យឯកជន(ស៊ុនយ៉ាគៀល) ។ ចំណែកអ្នកបើកម៉ូតូធំ ពណ៌ខ្មៅ គ្មានផ្លាកលេខដូចគ្នា បើកបរដោយជនជាតិរស្ស៊ី រួមដំណើរជាមួយប្រពន្ឋប្តីរងបួសធ្ងន់ ប្រពន្ឋរបួសស្រាល ។ ម៉ូតូទាំងពីរគ្រឿងត្រូវបានយកទៅរក្សាទុកនៅប៉ុស្តិ៍រដ្ឋបាលកោះតូចរង់ចាំដោះស្រាយតាមច្បាប់នៅពេលក្រោយ ។
ហេតុការណ៍ទី២ ៖ កាលពីវេលា០៧និង១៥នាទីយប់ ថ្ងៃទី៥ ខែមេសា ឆ្នាំ២០១៩ មានករណីគ្រោះថ្នាក់ចរាចរមួយបានកើតឡើងនៅចំណុចមុខផ្ទះឈ្មោះ ភីន ស្ថិតក្នុងភូមិកំពង់ត្នោត ឃុំកូសត្វ ស្រុកទឹកឈូ ដែលបង្កឡើងដោយរថយន្តរ៉ឺយ៉ែថយមិនបានមើលក្រោយ ខណៈចេញពីកម្មវិធីឡើងគេហដ្ឋានថ្មី ហើយបុករានទេវតាបណ្តាលឲ្យរលំកិនជើង ស្ត្រីម្នាក់ឈ្មោះ ហ៊ន លីណាយ អាយុ២២ឆ្នាំ បណ្តាលឲ្យដាច់ម្រាមជើងចំនួន៣ ត្រូវបានដឹកទៅសង្គ្រោះនៅគ្លីនិចឯកជនភូមិ កំពង់ត្នោត ឃុំកូនសត្វ ។
ចំណែករថយន្តបង្កម៉ាកកាមរីឆ្លាម ពណ៌ទឹកប្រាក់ ពាក់ផ្លាកលេខ ព្រះស៊ីហនុ ២A-៣៣២៤ បើកបរដោយឈ្មោះ ញឹម ចិន្តា ភេទប្រុស អាយុ៣២ ឆ្នាំ រស់នៅភូមិអូរលួស ឃុំដំណាក់កន្ទួត ស្រុកកំពង់ត្រាច ខេត្តកំពត ។ រថយន្តត្រូវបានយកទៅរក្សាទុកនៅអធិការដ្ឋាននគរបាលស្រុកទឹកឈូរង់ចាំដោះស្រាយគ្នានៅពេលក្រោយ ៕
ចែករំលែកព័តមាននេះ