ខេត្តកណ្ដាល ៖ រថយន្តធុនធំ១គ្រឿងបានត្រូវភ្លើងឆេះ ខណៈជាងកំពុងផ្សារទ្រុងខាងក្រោយបណ្តាលឲ្យរងរបួសធ្ងន់ម្នាក់ កាលពីវេលាម៉ោង១និង១៥នាទីរសៀលថ្ងៃទី៣ ខែមេសា នៅចំណុចទល់មុខប៉េត្រូណាស់ ស្ថិតក្នុងភូមិស្ទឹង ឃុំសំរោងធំ ស្រុកកៀនស្វាយ…
ខេត្តកណ្ដាល ៖ រថយន្តធុនធំ១គ្រឿងបានត្រូវភ្លើងឆេះ ខណៈជាងកំពុងផ្សារទ្រុងខាងក្រោយបណ្តាលឲ្យរងរបួសធ្ងន់ម្នាក់ កាលពីវេលាម៉ោង១និង១៥នាទីរសៀលថ្ងៃទី៣ ខែមេសា នៅចំណុចទល់មុខប៉េត្រូណាស់ ស្ថិតក្នុងភូមិស្ទឹង ឃុំសំរោងធំ ស្រុកកៀនស្វាយ ។
រថយន្តដែលឆេះនេះ ម៉ាកហ៊ីយ៉ាន់ដាយ ចំណុះ៥តោន ពណ៌សលាយខៀវ ពាក់ផ្លាកលេខ ព្រះសីហនុ ៣A-២៤២៥ ជាកម្មសិទ្ធិរបស់ឈ្មោះ ហ្វៀង ហាំងវិន ជនជាតិវៀតណាម ភេទប្រុស អាយុ៤៨ឆ្នាំ ស្នាក់នៅភូមិព្រែកត្រែង ឃុំសំរោងធំ ។ ចំណែកអ្នករងរបួសជាអ្នកបើកបរឈ្មោះ វឿន កៅ ភេទប្រុស អាយុ២៤ឆ្នាំ បច្ចុប្បន្នស្នាក់នៅភូមិព្រែកត្រែង ឃុំសំរោងធំ ត្រូវភ្លើងឆេះរោលពេញខ្លួន រងរបួសធ្ងន់ ត្រូវបានដឹកយកទៅសង្គ្រោះនៅមន្ទីរពេទ្យឯរាជធានីភ្នំពេញ ។
តាមប្រភព័ត៌មានបានឲ្យដឹងថា មុនពេលកើតហេតុគេឃើញអ្នកបើកបរឈ្មោះ វឿនកៅ តខ្សែភ្លើងមកផ្សារទ្រុងរថយន្តផ្នែកខាងក្រោយ ។ ខណៈកំពុងផ្សារស្រាប់តែឆ្លងចរន្តទុស្សេ ទៅប៉ះនឹងក្រដាសនៅលើរថយន្តក៏បង្កទៅជាអណ្តាតភ្លើងឆាបឆេះយ៉ាងសន្ធោសន្ធៅនិងបណ្តាលឲ្យអ្នកបើកបររងរបួសតែម្តង ។
ក្រោយកើតហេតុ លោកអនុសេនីយ៍ឯក ហួត សីហា នាយប៉ុស្តិ៍នគរបាលរដ្ឋបាលសំរោងធំ បានដឹកនាំកម្លាំង សហការជាមួយកម្លាំងអាវុធហត្ថ និងប្រជាការពារភូមិ ទៅជួយអន្តរាគមន៍ ដោយហៅរថយន្តដឹកទឹកលក់តាមភូមិមកជួយបាញ់ទឹកពន្លត់អស់ចំនួន៤រថយន្ត ទើបគ្រប់គ្រងស្ថានការណ៍បាន ដោយរថយន្តខូចខាតរបកតែថ្នាំខាងក្រៅប៉ុណ្ណោះ ៕
ចែករំលែកព័តមាននេះ