ខេត្តកំពង់ចាម ៖ ក្រុមឃាតកដ៏សាហាវបានលើកដៃសម្លាប់ជីដូន និងចៅស្រីតូចម្នាក់អាយុ៦ឆ្នាំ រួចបានកាត់ក្បាលយកទៅបាត់ទាំង២នាក់រកមិនទាន់ឃើញរហូតមកដល់ព្រឹកថ្ងៃទី០៤ មេសា ២០១៩ ជាមួយនោះក៏មានកិច្ចអន្តរាគមន៍ ពីសំណាក់នគរបាលអូស្ត្រាលី បានស្វះស្វែងមកចូលរួមជួយរុករកទាំងនៅក្រោមដំណក់ទឹកភ្លៀង។ ក្នុងដីចម្ការស្វាយចន្ទីក្រោយផ្ទះប្រមាណ៣៥០ម៉ែត្រ នៅភូមិត្រពាំងបឹង ឃុំថ្មពូន ស្រុកព្រៃឈរ ដោយឡែកប្រជាពលរដ្ឋ ប្រជាការពារ សមត្ថកិច្ចគ្រប់លំដាប់ថ្នាក់បានកំពុងតែបន្តតាមស្វែងរក ក្បាលជីដូន និងចៅ ដោយម្នាក់ៗបានប្តេជ្ញាចិត្តថានឹងប្រឹងប្រែងរកឲ្យទាល់តែឃើញ។
លោក ស្តើង ទូច អាយុ២៩ឆ្នាំ ជាកូនរបស់សពបានប្រាប់ថា រាល់ថ្ងៃគាត់បានចាកចេញពីផ្ទះទៅរស់នៅស្រុកកំពង់ស្វាយ ខេត្តកំពង់ធំ ហើយជីវភាពក៏ខ្វះខាតដែរ ទើបយូរៗមកលេងម្តាយឈ្មោះ វង្ស អូន អាយុ៥៦ឆ្នាំ នៅស្រុកព្រៃឈរ បានតែក្នុងរដូវបុណ្យទានប៉ុណ្ណោះ។ លុះមកដល់រសៀលថ្ងៃទី០៣ មេសា ត្រូវបានប្អូនស្រីផ្តល់ដំណឹងថា ម្តាយ និងចៅ ត្រូវបានគេសម្លាប់នៅក្រោយផ្ទះ ហើយក៏ប្រញាប់ធ្វើដំណើរមកបុណ្យម្តាយ។ លោក ស្តើង ទូច ជាកូនបានប្រាប់បន្តថា ម្តាយរបស់គាត់ជាមនុស្សស្លូត ដោយបានរស់នៅលើផ្ទះឈើជញ្ជាំងស្លឹក ប្រក់ស័ង្កសី ជាមួយនឹងចៅស្រីតូចឈ្មោះ ខេង សាវឿន អាយុ៦ឆ្នាំ និងប្អូនស្រីពៅ។
ករណីឃាតកម្មដ៏សាហាវខាងលើនេះ រូបលោកសំណូមពរដល់សមត្ថកិច្ចគ្រប់លំដាប់ថ្នាក់ មេត្តាជួយស្រាវជ្រាវតាមប្រមាញ់ចាប់ក្រុមឃាតកដៃដល់ មកផ្តន្ទាទោសតាមច្បាប់។ និងសូមឲ្យបន្តតាមរកក្បាលម្តាយ និងចៅស្រីតូចនៅក្នុងព្រៃចម្ការក្រោយផ្ទះបន្តទៀត តាមរយៈកិច្ចខិតខំប្រឹងប្រែងនោះមិនយូរទេអាចនឹងត្រូវរកឃើញជាក់ជាមិនខានឡើយ។ សពម្តាយ និងចៅត្រូវបានដង្ហែតាមរថយន្តយកទៅបញ្ចុះនៅវត្តថ្មពូននាព្រឹកថ្ងៃទី០៤ មេសា ហើយនៅរសៀលថ្ងៃដដែល រូបលោក និងសមត្ថកិច្ចជាច្រើននាក់បាននាំគ្នាបន្តចុះទៅក្រោយផ្ទះតាមរកក្បាលម្តាយ និងចៅស្រី តាមព្រៃឫស្សី និងក្នុងចម្ការស្វាយចន្ទីរហូតដល់វេលាម៉ោង៣ និង៣០នាទីរសៀល នៅមិនទាន់រកឃើញនូវឡើយទៀត។
អ្នកស្រី ផាត់ ពៅ អាយុ៦៤ឆ្នាំ ក្រុមប្រឹក្សាឃុំថ្មពូន ប្រាប់ថាស្ត្រីដែលត្រូវបានឃាតកសម្លាប់នោះបានមករស់នៅក្នុងភូមិត្រពាំងបឹង ឃុំថ្មពូន ស្រុកព្រៃឈរ មានរយៈពេលប្រមាណ២៦ឆ្នាំមកហើយ កាលនៅរស់គាត់ជាមនុស្សស្លូត និងចូលចិត្តធ្វើបុណ្យដាក់ទាន។ ឲ្យតែមានអ្នកភូមិមានរវល់បុណ្យផ្សេងៗគាត់ (វង្ស អូន ) តែងតែទៅជួយលាងចានរហូតដល់រួចបុណ្យបានត្រឡប់មកផ្ទះវិញ នៅក្នុងភូមិមនុស្សផងរបងជាមួយបានចូលចិត្ត និងរាប់អាន មិនមានអ្នកណាស្អប់ឡើយ។ នៅរសៀលថ្ងៃទី០៣ មេសា២០១៩ ក្រោយពីបានប្រទះឃើញសព២នាក់ ពិតជាគួរឲ្យសង្វេគណាស់ហើយក្នុងគ្រួសារនេះមានជីវភាពក្រីក្រ ដោយគាត់ឃើញអាណិតក៏បានមកជួយរៀបចំចាត់ចាត់បុណ្យ រហូតដល់ពេលយកសពទៅបញ្ចុះនៅវត្តថ្មពូន។
គាត់មានចម្ងល់ថា ចុះហេតុអីបានជាឃាតកមិនស្គាល់អត្តសញ្ញាណមកប្រល័យជីវិតជីដូន និងចៅស្រីតូចយ៉ាងដូច្នេះទៅវិញ ពិតជាគួរឲ្យអាណិតបំផុតដោយទប់ទឹកភ្នែកមិនបាន។ ហើយក៏សូមឲ្យសមត្ថកិច្ចនៅគ្រប់លំដាប់ថ្នាក់ មេត្តាជួយស្រាវជាវតាមស្វែងរកក្រុមឃាតកដៃ
ដល់ដែលជាក្រុមឧក្រិដ្ឋមកផ្តន្ទាទោសតាមច្បាប់។ ក្នុងករណីរកក្បាលសពម្តាយ និងចៅឃើញនៅពេលណាមួយនោះនឹងត្រូវគាស់ផ្នូរយកក្បាលទៅដាក់បន្តុបពីលើដងខ្លួនវិញ។ អ្នកស្រុកវិញបានប្រាប់ថា នៅថ្ងៃទី២ មេសា ជីដូននៅចៅបានចេញពីផ្ទះទៅដាំដើមស្វាយចន្ទីនៅក្រោយផ្ទះដោយដាំបានចំនួន២ដើម នៅលើដីដែលមានថ្មដុះរដិបរដុបច្រើន ហើយដីនោះតាមឮថាបានចែកឲ្យទៅកូនហើយ តែដោយសារកូនជាប់រវល់រកស៊ីនៅឆ្ងាយទើបម្តាយមកដាំជំនួសឲ្យ។
នៅឃ្លាតពីដើមស្វាយចន្ទីប្រមាណ ២០ទៅ៣០ម៉ែត្រ ជាដីចម្ការរបស់អ្នកផ្សេងដែលមិនទាន់បានដាំដុះនោះគេបានឃើញស្នាមជើងមនុស្ស ទំនងជារត់ដេញចៅស្រីអាយុ៦ឆ្នាំ ដែលរត់សំដៅមកផ្ទះដោយសារដោយឃើញមនុស្សធ្វើបាបជីដូនខំប្រឹងរត់គេច តែរត់មិនរួចត្រូវបានក្រុមឃាតកតាមទាន់សម្លាប់ទាំង២នាក់បំបិទមាត់រួចកាត់ក្បាលយកទៅបាត់រកមិនឃើញ ខ្លះថាជាដានជើងរបស់មនុស្សដែលតាមរកសពទៅវិញ។
នៅព្រឹកថ្ងៃទី០៤ មេសា មនុស្សជាច្រើនបាននាំគ្នាបន្តតាមរកនៅកន្លែងប្រទះឃើញសព ដោយមានខ្លះថា បានយល់សប្តិថា ក្បាលមនុស្សត្រូវបានឃាតបោះចោលប្រមាណ២ទៅ៣ម៉ែត្រ ដោយជីកកប់ដីម្នាក់ៗបាននាំគ្នាតាមរក ដោយមានកំណាត់ឈើដើរចាក់លើដីដែលសើមក្រោយពីភ្លៀងរួច នូវតែមិនឃើញដដែល សូម្បីតែក្លិន ក៏មិនបានភាយចេញពីកន្លែងណាមួយក៏អត់ទៀត។
លោកវរសេនីយ៏ឯក កែវ ស៊ាងហ៊ន់ អធិការនគរបាលស្រុកព្រៃឈរ បានឲ្យដឹងថា នៅព្រឹកថ្ងៃទី០៤ មេសា លោក គួច ចំរើន អភិបាលខេត្ត លោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្ត និងកម្លាំងមកពីភ្នំពេញ បានបន្តបើកកិច្ចប្រតិបត្តិការ តាមរុករកក្រុមឃាតកដ៏សាហាវឃោរឃៅដែលបានសម្លាប់ជីដូន និងចៅរួចកាត់ក្បាលយកទៅបាត់ នៅព្រៃចម្ការស្វាយចន្ទីក្រោយផ្ទះរបស់អ្នករងគ្រោះ។
ពិសេសមានការចូលរួមពីនគរបាលបច្ចេកទេស អូស្ត្រាលី និងសហការីជាច្រើននាក់ក៏បានមកចូលរួមសកម្មភាពយ៉ាងផុលផុសដោយម្នាក់ៗបានប្តេជ្ញាបន្តរករហូតដល់ពេលល្ងាច ក្រែងប្រទះឃើញក្បាលជីដូន និងចៅស្រីតូចនៅក្នុងព្រៃ។ សមត្ថកិច្ចគ្រប់លំដាប់ថ្នាក់កំពុងតែដុតដៃដុតជើងប្រើប្រាស់គ្រប់បច្ចេកទេស និងជំនាញចុងក្រោយរហូតដល់បានហៅមនុស្សចំនួន៣នាក់មកសួរនាំក្រែងមានការជាប់ពាក់ព័ន្ធទៅនឹងអំពើរឃាតកម្ម៕ ដោយ ៖ យ៉ាន់ ចាន់ថេត
ចែករំលែកព័តមាននេះ