ខេត្តកំពង់ឆ្នាំង ៖ កាលពីព្រឹកថ្ងៃទី១៤ ខែមេសា ឆ្នាំ២០១៩ ភ្លៀងធ្លាក់មួយមេយ៉ាងធំក្នុងក្រុងកំពង់ឆ្នាំង បណ្ដាលឲ្យមានការជន់លិចចូលផ្ទះប្រជាពលរដ្ឋ ហើយមូលហេតុទី១គឺមកពីការធ្វើផ្លូវមិនមានដាក់លូបង្ហូរទឹក និងទី២មកពីម្ចាស់ដីចាក់ដីលុបលូបង្ហូរទឹក ចូលស្រះដែលជាផ្លូវទឹក ។
ចាប់ពីព្រលឹមស្រាងៗមានភ្លៀងធ្លាក់យ៉ាងខ្លាំងក្នុងក្រុងកំពង់ឆ្នាំង បណ្តាលឱ្យលិចនៅតាមផ្លូវមួយចំនួន គឺដោយសារតែគ្មានប្រព័ន្ធលូបង្ហូរទឹកអោយធ្លាក់ទៅក្រោម ទើបលិចចូលក្នុងផ្ទះប្រជាពលរដ្ឋ បណ្ដាលឱ្យរងការខូចខាតសម្ភារៈទំនិញមួយចំនួនដែលនៅតាមដងផ្លូវពីផ្សារលើទៅផ្សារក្រោម ។ ប្រជាពលរដ្ឋបានលើកឡើងថាដោយសារតែការកសាងផ្លូវថ្មីចាក់កៅកៅស៊ូ គ្មានលូបង្ហូរទឹកចេញ ទើបធ្វើឲ្យលិច និងដក់ទឹកគ្រប់ទីកន្លែងចាប់ពីចំណុចផ្សារលើទៅផ្សារក្រោម ។ ជាមួយគ្នានេះប្រជាពលរដ្ឋសំណូមពរដល់មន្ទីរពាក់ព័ន្ធសូមមេត្តាធ្វើលូបង្ហូរទឹកចេញឲ្យបានត្រឹមត្រូវ ។
ដោយឡែកនៅចំណុចផ្លូវបែកជា៤ក្រោយមន្ទីរដែនដីនគររូបនីយកម្ម សំណង់ និងសុរិយោដីឯណោះវិញក៏មានការជន់លិចដូចគ្នានេះដែរ មូលហេតុគឺដោយសារលោកឧត្តមសេនីយ៍ទោ ធន ធឿន ដែលមានដីស្រះមួយកន្លែងនៅជិតចំណុចនោះ ហើយគាត់បានចាក់ដីលុបលូបង្ហូរទឹកចូលស្រះរបស់គាត់ ទើបធ្វើឲ្យជន់លិចផ្ទះជាច្រើនខ្នង និងខូចខាតទ្រព្យសម្បត្តិជាច្រើនផងដែរ ក្នុងនោះមានទាំងកុំព្យូទ័រយួរដៃទៀតផង។
ប្រជាពលរដ្ឋនៅតំបន់នោះបានលើកឡើងថា ដីនៅចំណុចនោះ មានប្រព័ន្ឋលូជាច្រើនបានធ្លាក់ចូលលូតែមួយ ហើយលូនោះបានហូរធ្លាក់ចូលស្រះរបស់លោក ធន់ ធឿន ហើយបន្តហូរចេញទៅមុខទៀត ។ ប៉ុន្តែនៅពេលដែលលោក ធន់ ធឿន ចាក់ដីទប់មុខលូជាប់ ធ្វើឲ្យទឹកច្រាលឡើង និងលិចគ្រប់ទីកន្លែង ។ ប្រជាពលរដ្ឋ សំណូមពរ ដល់ម្ចាស់ដី លោក ធន់ ធឿន សូមមេត្តាកាយដីបើកផ្លូវទឹកនោះវិញផង។
ជុំវិញបញ្ហានេះ លោកឧត្តមសេនីយ៍ទោ ធន ធឿន មេបញ្ជាការតំបន់ប្រតិបត្តិការសឹករងកំពង់ឆ្នាំង ក៏បានឲ្យដឹងដែរថា មូលហេតុដែលលោកចាក់ដី គឺលោកមានបំណងដាក់លូ ស្របតាមមាត់ស្រះរបស់គាត់ ប៉ុន្តែនៅពេលដែលគាត់ចាក់ដីបម្រុងនឹងធ្វើដាក់លូម្តងៗ ត្រូវបានប្រជាពលរដ្ឋស្រែកថា គាត់ចាក់ដីលុបបឹង លុបត្រពាំង ឬថាជាដី៥ធាន ដែលជាកន្លែងរំដោះទឹកជាដើម ។ ម្ល៉ោះហើយគាត់បានចាក់ដីបន្តិច លុះធ្វើអី្វមិនកើត ក៏ទុកដីនោះចោល បណ្តាលអោយស្ទះបែបនេះទៅ តើនរណាជាអ្នកទទួលខុសត្រូវ គាត់ថា ដីនោះគឺជាដីរបស់គាត់ជាអ្នកជីកនៅឆ្នាំ១៩៨០សោះ បែរជាថាដីបឹងរំដោះទឹកទៅវិញ ។ ទោះបីជាយ៉ាងនេះក្តី លោកថា នឹងអោយគេទៅកាយចេញ ។
ជុំវិញការបកស្រាយរបស់លោក ធន ធឿន ថាធ្វើអ្វីមិនបាននេះ គឺមិនមែនត្រឹមតែរឿងចោទថា ចាក់ដីលុបស្រះស្តុកទឹក ប៉ុណ្ណោះទេ អាជ្ញាធរមូលដ្ឋានបានដឹងរឿងនេះច្បាស់ គឺលោកឧត្តមសេនីយ៍ទោ ធន់ ធឿន នៅមានទំនាស់ដីជាមួយប្រជាពលរដ្ឋ មួយគ្រួសារទៀត ទើបលោកធ្វើអ្វីមិនបានត្រូវអាជ្ញាធរហាមឃាត់។
ទោះបីជាយ៉ាងនេះក្តី ក្រោយពេលភ្លៀងចាប់ផ្តើមធ្លាក់មួយមេយ៉ាងធំ ឃើញមានចំណុចអវិជ្ជមានជាច្រើនកន្លែង ដែលទាំងអស់នេះ អាជ្ញាធរខេត្ត និងមន្ទីរពាក់ពន្ឋ័គួរគិរគួពិចារណាថា តើត្រូវដោះស្រាយរបៀបណា ជូនប្រជាពលរដ្ឋ ដែលកំពុងជួបការលំបាកបែបនេះ ៕
ចែករំលែកព័តមាននេះ