ខេត្តប៉ៃលិន ៖ បញ្ហាទំនាស់ដីធ្លីអស់រយ:ពេល១៧ឆ្នាំ រវាងប្រជាពលរដ្ឋមួយគ្រួសារជាមួយនឹងមន្ត្រីគយម្នាក់ ដែលគេចាត់ទុកថា វាជាបញ្ហាដ៏រ៉ាំរ៉ៃមួយ ដែលរហូតមកដល់ពេលនេះត្រូវបានអាជ្ញាធរខេត្តស្ទុះស្ទារ នាំគ្នាចុះទៅត្រួតពិនិត្យ ដើម្បីបន្តធ្វើការដោះស្រាយឆាប់ៗ ក្រោយពីបែកធ្លាយសារព័ត៌មានចេញផ្សាយកាលពីពេលថ្មីៗកន្លងទៅនេះ ។
បញ្ហាទំនាស់ដីធ្លីនេះ គឺស្ថិតនៅលើដែនដីតំបន់អភិរក្សរដ្ឋបាលព្រៃឈើប៉ៃលិន ក្នុងចំណោមផ្ទៃដីជាង២០០ហិកតា ។ គេឆ្ងល់ថា តើប្រជាពលរដ្ឋទាំងនេះ បានដីពីក្នុងដែនតំបន់អភិរក្សរដ្ឋបាលព្រៃឈើ ដោយរបៀបណា? ហេតុការណ៍អាជ្ញាធរខេត្តចុះត្រួតពិនិត្យដីធ្លីទំនាស់រ៉ាំរ៉ៃនេះ បានធ្វើឡើងកាលពីម៉ោង៣និង៣០នាទីរសៀល ថ្ងៃទី០៣ ខែមេសា ឆ្នាំ២០១៩ ស្ថិតនៅជាប់ជើងភ្នំកែស ក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ដោយមានការចូលរួមពីមន្ត្រីនៃមន្ទីរពាក់ព័ន្ធ និងភ្នាក់ងារសារព័ត៌មានជាច្រើនស្ថាប័នផងដែរ ។
បើតាមប្រភពព័ត៌មានពីលោក ធូ ភា អភិបាលរងខេត្ត បានឱ្យដឹងថា មិនមែនទាល់តែសារព័ត៌ មានចុះផ្សាយពាក់ព័ន្ធនឹងបញ្ហាទំនាស់ដីធ្លីខាងលើ ទើបអាជ្ញាធរស្ទុះស្ទារទៅត្រួតពិនិត្យនោះទេ គឺអាជ្ញាធរបានខិតខំប្រឹងប្រែងធ្វើការដោះស្រាយអស់រយ:ពេលជាច្រើនឆ្នាំមកហើយ តែមិនទាន់ចប់សព្វគ្រប់ ដោយជំហានដំបូងខាងខេត្តចុះធ្វើការសិក្សាទំហំដីរបស់រដ្ឋបាលព្រៃឈើ ដែលមន្ត្រីគយម្នាក់ឈ្មោះ យស់ សារ៉ាវុធ បានរំលោភយកនៅត្រង់ផ្នែកមួយ ។ ចំណែកឯផ្នែកមួយទៀត ត្រូវបានប្រជាពលរដ្ឋម្នាក់ឈ្មោះ ទេព វ៉ារី បានកាន់កាប់នៅជាប់នឹងជើងភ្នំកែស ដែលជាដីរដ្ឋបាលព្រៃឈើដែរ ដោយយកទៅធ្វើកម្មសិទ្ធិផ្ទាល់ខ្លួន។
លោកបញ្ជាក់ទៀតថា លើសពីនេះ ក៏មានប្រជាពលរដ្ឋចំនួន១១គ្រួសារទៀត ដែលបានយកដីរដ្ឋបាលព្រៃឈើធ្វើជាកម្មសិទ្ធិផ្ទាល់ខ្លួន ហើយខាងរដ្ឋបាលសាលាខេត្ត នឹងសម្រេចថា តើគួរយកដីទាំងនោះមកវិញប៉ុណ្ណា ហើយត្រូវទុកឱ្យប៉ុណ្ណា?
ព័ត៌មានពិស្តារមានផ្សាយនៅកាសែតកោះសន្តិភាព
ចែករំលែកព័តមាននេះ