ខេត្តកោះកុង ៖ ប្រភពពីមជ្ឈដ្ឋានខាងក្រៅខ្សឹបតៗគ្នាថា ដីកម្មសិទ្ធិរបស់ខណ្ឌរដ្ឋបាលព្រៃឈើកោះកុង ចំនួន២ប្លង់ ត្រូវបានលោកប្រធានមន្ទីរចាត់ចែងវ៉ៃចេញឱ្យឧត្តមសេនីយ៍ទោ ទាហានម្នាក់ពុះឡូតិ៍ស្រេចបាត់ទៅហើយ មានទំហំ១៤ហិកតា បានតម្លៃដល់ទៅរាប់លានដុល្លារឯណោះ ប៉ុន្តែលោកប្រធានស្មានតែស៊ីហើយជូតមាត់ស្អាត ដឹងអីបែកការណ៍ដល់ទេវតា ព្រោះតែសំណែនទេវតាតិចពេក ជាហេតុធ្វើឱ្យទេវតាក្តៅក្រហល់ក្រហាយចាត់ក្រុមអាម៉ាតឱ្យចុះមកបើកកកាយរឿងនេះសាជាថ្មី ។
តាមមន្ត្រីរដ្ឋបាលព្រៃឈើម្នាក់សុំមិនចេញឈ្មោះបានបង្ហើបថា ជុំវិញការលួចលក់ដីរដ្ឋនេះ លោកប្រធានមន្ទីរ បានចាត់ឱ្យមន្ត្រីផ្នែករដ្ឋបាលព្រៃឈើ ក្រុងខេមរៈភូមិន្ទម្នាក់ឈរឈ្មោះជាអ្នកលក់ដីរដ្ឋនេះជំនួសលោកប្រធាន ប៉ុន្តែបន្ទាប់ពីដឹងថា ខ្លួនយកសំណែនតិចតួចទៅសែនទេវតាមិនត្រូវ កើតក្តីក្តៅក្រហាយ ហើយលោកប្រធានបានជួយអន្តរាគមន៍ ផ្ទេរមន្ត្រីផ្នែករដ្ឋបាលព្រៃឈើគ្រាប់ល្ពៅម្នាក់នោះចេញពីខេត្តកោះកុងយ៉ាងតក់ក្រហល់។
បន្ទាប់មកនៅថ្ងៃទី០៧ មីនា ឆ្នាំ២០១៩ ឋានទេវតាបានចេញលិខិតមួយច្បាប់ ព្រមាន និងបញ្ជាឱ្យប្រធានមន្ទីរអនុវត្តន៍ជាបន្ទាន់នូវកំហុសឆ្គង10ចំណុច ក្នុងនោះចំណុចសំខាន់ត្រូវប្រមូលទីតាំងដីរដ្ឋរបស់មន្ទីរដែលបានលួចលក់ ឬជួលយកមកគ្រប់គ្រងជាសម្បត្តិរដ្ឋវិញជាកំហិត។ តែរហូតមកដល់ពេលនេះ លោកប្រធានមន្ទីរនៅមិនទាន់អនុវត្តតាមការណែនាំរបស់ឋានទេវតានៅឡើយទេ ។
កោះសន្តិភាព បានព្យាយាមទំនាក់ទំនងទៅលោក អុី ម៉េងលាង ប្រធានមន្ទីរកសិកម្មខេត្តកោះកុង ដើម្បីសុំការបំភ្លឺជុំវិញរឿងអាស្រូវខាងលើនេះតាមរយៈមន្ត្រីរដ្ឋបាលរបស់មន្ទីរដែរ តែលោកប្រធានមន្ទីរមិនបានឆ្លើយតបមកវិញឡើយ ។ មជ្ឈដ្ឋាននានាលើកឡើងថា ពាងប្រហុកបែកជះក្លិនស្អុយអាសោចបែបនេះទៅហើយ ហេតុអីសាម៉ីក្រសួងនៅតែមិនហា៑នកាត់សាច់ស្អុយនេះចោល ឬក៏ចង់យកសាច់ស្អុយនេះមកធ្វើគ្រឿងក្លែមដែរ ៕
ចែករំលែកព័តមាននេះ