ខេត្តបន្ទាយមានជ័យ ៖ មកទល់ថ្ងៃទី០៤ មេសា នេះ ទីតាំងបែបបទចូលប្រទេស នៅមាត់ច្រកទ្វារអន្តរជាតិប៉ោយប៉ែត គឺមានសភាពស្ងប់ស្ងាត់ ពោលគឺពលករដែលធ្វើការងារតាមបណ្តាខេត្តនិងក្រុងបាងកកប្រទេសថៃ មិនទាន់ឃើញវិលត្រឡប់គគ្រឹកគគ្រេងដូចឆ្នាំមុនៗនោះឡើយ…
ខេត្តបន្ទាយមានជ័យ ៖ មកទល់ថ្ងៃទី០៤ មេសា នេះ ទីតាំងបែបបទចូលប្រទេស នៅមាត់ច្រកទ្វារអន្តរជាតិប៉ោយប៉ែត គឺមានសភាពស្ងប់ស្ងាត់ ពោលគឺពលករដែលធ្វើការងារតាមបណ្តាខេត្តនិងក្រុងបាងកកប្រទេសថៃ មិនទាន់ឃើញវិលត្រឡប់គគ្រឹកគគ្រេងដូចឆ្នាំមុនៗនោះឡើយ ។ ការវិលត្រឡប់តាមច្រកទ្វារអន្តរជាតិមួយនេះ គេឃើញមានតែពលករកាន់ប័ណ្ណព្រំដែន(Border Pass)ដែលចូលទៅធ្វើការតាមខេត្តជាប់ព្រំដែន ដូចជាកាប់អំពៅ/ដកដំឡូង/និងធ្វើចំការតែប៉ុណ្ណោះ ។
មានការកត់សម្គាល់ថា ឆ្នាំមុនៗរាល់ចុងខែមីនា ឬដើមខែមេសា គឺឃើញពលករវិលត្រឡប់ពីថៃ តាមច្រកទ្វារអន្តរជាតិប៉ោយប៉ែតច្រើនជាហូរហែ ដើម្បីមកចូលរួមពិធីបុណ្យចូលឆ្នាំថ្មីប្រពៃណីជាតិ ហើយឆ្នាំខ្លះស្ទើររករថយន្តជិះមិនបានទៀតផង។
មន្ត្រីនគរបាលអន្តោប្រវេសន៍ នៅច្រកទ្វារអន្តរជាតិប៉ោយប៉ែតម្នាក់ ប្រាប់តាមបណ្តាញសង្គមវ៉ាត់អាប់ថាគិតត្រឹមព្រឹកថ្ងៃទី០៤ មេសា នេះ ពលករកាន់លិខិតឆ្លងដែនការងារ ពុំទាន់មានការវិលត្រឡប់ច្រើនដូចពលករកាន់ប័ណ្ណព្រំដែនBorder Passឡើយ ។
តែយ៉ាងណាក៏ដោយ ពលករមួយក្រុមដែលវិលត្រឡប់ពីក្រុងបាងកកប្រទេសថៃ នៅព្រឹកថ្ងៃទី០៤ មេសា នេះ បាននិយាយថា ចាប់ពីថ្ងៃស្អែក ទី៥ ពលករវិលត្រឡប់ពីថៃនិងមានច្រើន ព្រោះអាជ្ញាធរនិងសមត្ថកិច្ចថៃ ពិសេសថៅកែរោងចក្រ និងសហគ្រាសនានាគេអនុញ្ញាត និងសម្រួលឲ្យវិលត្រឡប់តាមច្រកទ្វារអន្តរជាតិនៅព្រំដែន មិនយកប្រាក់លើសេវាប្រថាប់ត្រាផ្សេងៗឡើយ ។
ដោយឡែក ពលករខុសច្បាប់ ដែលភាគីថៃចាប់ និងបញ្ជូនដោយរថយន្តទ្រុងតាមច្រកទ្វារអន្តរជាតិខាងលើក៌មានចំនួនតិចដូចគ្នាមួយរយៈចុងក្រោយនេះៗបើតាមការឲ្យដឹងពីមន្ត្រីជំនាញនៅទីតាំងទទួលពលករបញ្ជូនពីថៃក្នុងក្រុងប៉ោយប៉ែត។
មន្ត្រីដដែលប្រាប់ថារយៈពេល3ថ្ងៃនៃដើមខែមេសានេះ ចំនួនពលករបញ្ជូនពីថៃសរុប65នាក់ ក្នុងនោះមានកុមា12នាក់ ដោយថ្ងៃទី០១ មេសា មានចំនួន15នាក់ ថ្ងៃទី០២ មានចំនួន១២នាក់ និងថ្ងៃទី០៣ មានចំនួន38នាក់ ដែលចំនួននេះមន្ត្រីអះអាងថា បើប្រៀបធៀបទៅនឹងដើមខែមេសាឆ្នាំមុនៗ គឺឆ្នាំនេះពលករខុសច្បាប់ ដែលភាគីថៃចាប់បញ្ជូនត្រឡប់ មានតិចបំផុត។
ចែករំលែកព័តមាននេះ