រាជធានីភ្នំពេញ ៖ បុរសជាជនសង្ស័យម្នាក់ ព្រមទាំងភាគីខាងនារីរងគ្រោះ២នាក់ ត្រូវសមត្ថកិច្ចប៉ុស្តិ៍នគរបាលបឹងកេងកង៣ ហៅទៅធ្វើការសាកសួរ បន្ទាប់ពីមានការយល់ច្រលំរឿងបាត់ទូរស័ព្ទមួយសប្តាហ៍មកហើយ ហេតុការណ៍នេះបានកើតឡើងនៅម៉ោង១១យប់ ថ្ងៃទី៣ ខែមេសា ឆ្នាំ២០១៩ ជិតនឹងសាលារៀនជ័យជំនះ ផ្លូវ៣៨០ សង្កាត់បឹងកេងកង៣ ខណ្ឌចំការមន ។ ជនសង្ស័យ និងជនរងគ្រោះ សមត្ថកិច្ចមិនបានឱ្យដឹងឈ្មោះនោះទេ ។
តាមប្រភពពីភាគីនារីរងគ្រោះបានឱ្យដឹងថា កាលពីមួយសប្តាហ៍មុន បងប្អូនរបស់ពួកនាង មានទំនាស់ពាក្យសម្តីនៅក្នុងរថយន្ត ហើយពេលនោះពួកគេទាំងនោះបានង៉ក់ងរនាំគ្នាចុះពីលើរថយន្ត ដោយមិនបានយកទូរស័ព្ទស៊េរីទំនើបចំនួន២គ្រឿងចេញពីក្នុងរថយន្តនោះទេ ។ ពេលនោះដែរ ទូរស័ព្ទចំនួន២គ្រឿងនោះត្រូវបានបាត់ពីក្នុងរថយន្ត ហើយក៏មិនដឹងអ្នកណាលួចនោះដែរ ហើយពួកគាត់ក៏មិនបានដាក់ពាក្យបណ្តឹងទៅសមត្ថកិច្ចដែរ ។
ប្រភពបានបន្តទៀត រហូតមកដល់ពេលកើតហេតុ ពួកនាងបាននាំគ្នាសប្បាយក្នុងកម្មវីធី ខួបកំណើតនៅមុខផ្ទះ ស្រាប់តែបុរសដែលជាជនសង្ស័យម្នាក់ ហើយក៏ជាអ្នកស្គាល់គ្នាបានយកស៊ីមទូរស័ព្ទមកឱ្យពួកគាត់ ។ បុរសជាជនសង្ស័យរូបនោះនិយាយថា បើចង់បានទូរស័ព្ទមកវិញ ទាល់តែឱ្យលុយមករូបគេខ្លះមក ទើបសួរនាំបុរសជាជនសង្ស័យមិនទាន់ដឹងអ្វីផង ស្រាប់តែមានអ្នកទូរស័ព្ទទៅបញ្ជាអគ្គស្នងការនគរបាលជាតិថា មានករណីចាប់បានចោរឆក់ទូរស័ព្ទ ទើបផ្អើលសមត្ថកិច្ចទៅធ្វើការឃាត់ខ្លួន ហៅពួកគេទាំងបីនាក់ គឺទាំងជនសង្ស័យ និងភាគីខាងរងគ្រោះ យកទៅសាកសួរនៅប៉ុស្តិ៍នគរបាលបឹងកេងកង៣តែម្តង។
នៅពេលទៅដល់ប៉ុស្តិ៍សមត្ថកិច្ច ភាគីខាងនារីរងគ្រោះត្រូវបានសមត្ថកិច្ចធ្វើការសាកសួរ មិនដឹងយ៉ាងម៉េចនោះទេ ក៏ស្រាប់តែខឹងមេប៉ុស្តិ៍បាននាំគ្នាដើរចេញមកក្រៅដោយនិយាយថា ពួកគាត់មិនបានប្តឹងសមត្ថកិច្ចឱ្យទៅហៅពួកគាត់មកប៉ុស្តិ៍នគរបាលនោះទេ ហើយពួកគាត់ក៏មិនបានដាក់ពាក្យបណ្តឹងអីដែរ និយាយរួចក៏នាំគ្នាជិះម៉ូតូកង់បីឥណ្ឌាត្រឡប់ទៅផ្ទះវិញបាត់ទៅ ។
ក្រោយពេលកើតហេតុ នៅសល់តែបុរសជាជនសង្ស័យត្រូវបានសមត្ថកិច្ចធ្វើកំណត់ហេតុទុក ព្រោះអត់មានវត្ថុតាំងច្បាស់លាស់ រួចហើយក៏ឱ្យត្រលប់ទៅផ្ទះវិញ ខណៈអត់មានជនរងគ្រោះដាក់ពាក្យបណ្តឹង ៕
ចែករំលែកព័តមាននេះ