ខេត្តស្វាយរៀង ៖ បញ្ហាចំណីអាហារ និងទឹកភេសជ្ជៈនៅតាមទៅផ្សារ និងតូបលក់ដូរតាមផ្ទះ គឺនៅតែព្រួយបារម្ភដោយខ្វះការយល់ដឹងរបស់អាជីវករ ហើយខ្វះការត្រួតពិនិត្យពេលឈ្មួញនាំចូលមកពីប្រទេសជិតខាង ដែលធ្វើឲ្យប៉ះពាល់ដល់សុខមាលភាពប្រជាពលរដ្ឋដែលយកទៅបរិភោគ ។ ដោយនៅថ្ងៃទី០២ ខែមេសា ឆ្នាំ២០១៩នេះ មន្ត្រីសាខាកាំកុងត្រូលខេត្តស្វាយរៀងដឹកនាំដោយលោកផឹងនិល ប្រធានសាខាកាំកុងត្រូលខេត្តសហការជាមួយមន្ទីពាណិជ្ជខេត្ត និងអាជ្ញាធរដែនដីបានចុះពិនិត្យទំនិញនៅផ្សារដូនសស្រុក ស្វាយជ្រុំ រកឃើញទំនិញខូចគុណភាពចំនួន២៥០គីឡូក្រាម ។
បើតាមលោកផឹង និល ប្រធានសាខាកាំកុងត្រូលខេត្តស្វាយរៀងបានឲ្យដឹងថា សកម្មភាពការងារចុះត្រួតពិនិត្យមន្ត្រីជំនាញយើងបានពិនិត្យទំនិញវេចខ្ចប់ស្រាប់ ដើម្បីរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារនៅផ្សារដូនស និងតាមគេហដ្ឋានតាំងលក់ទំនិញ និងតាមម៉ាតមួយចំនួន ស្ថិតនៅឃុំដូនស ស្រុកស្វាយជ្រុំ ខេត្តស្វាយរៀង រកឃើញទំនិញខូចគុណភាពចំនួន២៥០គីឡូក្រាម ។
លោកផឹង និល បានបញ្ជាក់ថា ជាលទ្ធផលក្រោយការចុះអនុវត្តការងារមន្ត្រីជំនាញរកឃើញទំនិញខូចគុណភាព និងទំនិញហួសកាលបរិច្ឆេទប្រើប្រាស់មានដូចជា ស្ករគ្រាប់ចំនួន១៥កំប៉ុង ស្ពៃកំប៉ុង០៦កំប៉ុង ទឹកដោះគោខាប់៦កំប៉ុង ត្រីខ០៧កំប៉ុង និងមានផ្សេងៗទៀត សរុបរួមស្មើ២៥០គីឡូក្រាម ។
ក្រោយពីត្រួតពិនិត្យរួចមកមន្ត្រីជំនាញបានធ្វើកំណត់ហេតុដកហូតទំនិញទាំងនោះយកមករក្សាទុកនៅសាខាកាំកុងត្រូលខេត្ត ដើម្បីធ្វើការដុតកម្ទេចចោលផងដែរ ។ ចំពោះមហាជនបានលើកឡើងថា ចំណីអាហាទឹកភេសជ្ជៈ ខូចគុណភាព និងហួសកាលកំណត់អ្នកលក់ដូរនៅតែដាក់តាំងលក់ឲ្យអតិថិជនបរិភោគ ដោយមិនខ្វល់ពីផលប៉ះពាល់ដល់សុខភាពអ្នកបរិភោគ មន្ត្រីជំនាញគួរតែចាប់ផាកពិន័យដល់អ្នកលក់ទំនិញខូចគុណភាព និងហួសកាលបរិច្ឆេទទាំងនេះ ដើម្បីឲ្យរាង្គចាលកុំឲ្យបន្តលក់ទំនិញខូចគុណភាពទៀត ពីព្រោះអ្នកបរិភោគមានជំនឿលើអ្នកលក់ហើយ ជាពិសេសក្មង និងមនុស្សចាស់ គាត់មិនបានដឹងពីទំនិញខូចគុណភាព ឬហួសកាលបរិច្ឆេទនោះទេ ដោយមនុស្សចាស់នៅជនបទមួយចំនួនគាត់សូវចេះអក្សរដូច្នេះអ្នកលក់ត្រូវតែលក់ទំនិញល្អមិនលើសកាលបរិច្ឆេទ ៕
ចែករំលែកព័តមាននេះ