ខេត្តកំពង់ឆ្នាំង ៖ បន្ទាប់ពីសារព័ត៌មានកោះសន្តិភាព បានផ្សាយស្តីអំពីប្រជាពលរដ្ឋក្នុងខេត្តកំពង់ឆ្នាំង កំពុងជួបការខ្វះខាតទឹកស្អាតប្រើប្រាស់ ហើយចោទក្រុមហ៊ុនផលិតទឹកស្អាតអានកូ ថា គ្មានលទ្ធភាពទិញម៉ាស៊ីនភ្លើងផ្ទាល់ខ្លួន ដើម្បីផលិតទឹកស្អាតជូនប្រជាពលរដ្ឋប្រើប្រាស់រួចមក នៅរសៀលថ្ងៃទី២ ខែមេសា ឆ្នាំ២០១៩ មានភ្នាក់ងារចែកចាយទឹកស្អាតម្នាក់ បានបញ្ជូន (តាមរយៈ Messenger) តារាងកម្មវិធី ស្ដីពីការបិទបើកទឹកស្អាតរបស់ក្រុមហ៊ុនអានកូ ខេត្តកំពង់ឆ្នាំង មកឲ្យភ្នាក់ងារយើងប្រចាំខេត្តកំពង់ឆ្នាំង ដែលយើងគិតថា គួរតែក្រុមហ៊ុនផ្សព្វផ្សាយឱ្យទូលំទូលាយផង ។
សូមបញ្ជាក់ដែរថា ក្នុងលិខិតរបស់ក្រុមហ៊ុនខាងលើ គឺបានធ្វើឡើងនៅថ្ងៃទី29 ខែមីនា ឆ្នាំ 2019 គឺចេញមុនការផ្សាយចំនួន៣ថ្ងៃ ប៉ុន្តែសេចក្តីជូនដំណឹងនេះមិនត្រូវបានបើកជាចំហនោះទេ ប៉ុន្តែបន្ទាប់ពីយើងបានផ្សាយ ទើបឃើញលិខិតនោះចេញតាមក្រោយទៅវិញ។
លិខិតជូនដំណឹងស្ដីពីការបែងចែកទឹកនេះ ធ្វើឡើងនៅថ្ងៃទី២៩ ខែមីនាឆ្នាំ ២០១៩ ដែលចុះហត្ថលេខដោយប្រធានសាខាក្រុមហ៊ុនអានកូ លោក អាន វណ្ណៈច័ន្ទ ។
ដូចអ្វីដែលបានស្រង់សំដីរបស់លោក វង្ស វិសាល ប្រធានមន្ទីរឧស្សាហកម្ម និងសិប្បកម្មខេត្ត មកជម្រាបជូនរួចហើយថា ក្នុងរយៈពេល៥ទៅ៦សប្តាហ៍ទៀត ទើបម៉ាស៊ីនភ្លើងដែលក្រុមហ៊ុនកុំម៉ង់ទិញពីក្រៅប្រទេស បានមកដល់ខេត្តកំពង់ឆ្នាំង ហើយនឹងដំណើរការផលិតទឹកស្អាត ២៤ម៉ោងដោយខ្លួនឡើងវិញ។
ប៉ុន្តែយ៉ាងនេះក្តីរយៈពេលជាង១ខែកន្លះ ឬរយៈពេលយូរជាងនេះ ព្រោះទម្រាំតែរៀបចំតម្លើងរួច ប្រជាពលរដ្ឋក្នុងខេត្តកំពង់ឆ្នាំងនៅតែជួបការលំបាកក្នុងការប្រើប្រាស់ទឹកស្អាតដដែល រយៈពេលនេះប្រជាពលរដ្ឋមានតែម្ចាស់ការ បើកទឹកទុកជាប្រចាំតែប៉ុណ្ណោះដើម្បីទប់ទល់ស្ថានភាពគ្មានទឹកប្រើប្រាស់នេះ៕
ចែករំលែកព័តមាននេះ