រាជធានីភ្នំពេញ ៖ យុវជន២នាក់ត្រូវបានយុវជនមួយក្រុមជិះម៉ូតូដេញវាយ និងចាក់ចំនួន២ដែកឆាប បណ្តាលឱ្យរងរបួសធ្ងន់ម្នាក់ និងស្រាលម្នាក់ ហើយសមត្ថកិច្ចបានធ្វើឃាត់ខ្លួនយុវជនបង្កចំនួន២នាក់យកទៅសាកសួរ ។ ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង៨និង៤០នាទីយប់ថ្ងៃទី២ ខែមេសា…
រាជធានីភ្នំពេញ ៖ យុវជន២នាក់ត្រូវបានយុវជនមួយក្រុមជិះម៉ូតូដេញវាយ និងចាក់ចំនួន២ដែកឆាប បណ្តាលឱ្យរងរបួសធ្ងន់ម្នាក់ និងស្រាលម្នាក់ ហើយសមត្ថកិច្ចបានធ្វើឃាត់ខ្លួនយុវជនបង្កចំនួន២នាក់យកទៅសាកសួរ ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោង៨និង៤០នាទីយប់ថ្ងៃទី២ ខែមេសា ឆ្នាំ២០១៩ នៅតាមបណ្ដោយផ្លូវជាតិលេខ៤ មុខបុរីញ៉ូវថោន ដែលស្ថិតនៅភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ ។
ពាក់ព័ន្ធនឹងករណីខាងលើនេះ គេមិនដឹងថាមូលហេតុផ្តើមចេញពីរឿងអ្វីនោះទេ ។
ជនរងគ្រោះទាំង២នាក់ខាងលើ ក្នុងនោះម្នាក់ឈ្មោះ រ៉េត សារីម ភេទប្រុស អាយុ១៨ឆ្នាំ មុខរបរនៅផ្ទះ ស្នាក់នៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ មានស្រុកកំណើតនៅស្រុកបាទី ខេត្តតាកែវ និងម្នាក់ទៀតឈ្មោះ អែម ផានិត ភេទប្រុស អាយុ១៩ឆ្នាំ ស្នាក់នៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ មានស្រុកកំណើតនៅស្រុកត្រាំកក់ ខេត្តតាកែវ។ ជនរងគ្រោះទាំង២នាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១GD-៩២០៥ ។
ចំណែកជនសង្ស័យទាំង២នាក់ដែលត្រូវសមត្ថកិច្ចឃាត់ខ្លួន ក្នុងនោះម្នាក់ឈ្មោះ សាញ់ សុខណា ភេទប្រុស អាយុ២១ឆ្នាំ មុខរបរកម្មកររោងចក្រ រស់នៅសង្កាត់កំបូល ខណ្ឌពោធិ៍សែនជ័យ និងម្នាក់ទៀតឈ្មោះ ចេក ជិនចាវ ភេទប្រុស អាយុ២០ឆ្នាំ មុខរបរកម្មកររោងចក្រ ស្នាក់ភូមិភូមិស្ងួនពេជ្រ សង្កាត់កន្ទោក ខណ្ឌពោធិ៍សែនជ័យ ។
តាមប្រភពព័ត៌មានពីជនរងគ្រោះដែលរងរបួសស្រាលបាននិយាយថា នៅមុនពេលកើតហេតុ ពួកគាត់មានគ្នា២នាក់បានជិះម៉ូតូមួយគ្រឿងឌុបគ្នាទៅផ្ទះមិត្តភ័ក្ដិម្នាក់ទៀត នៅម្តុំផ្សារបែកចាន លុះជិះម៉ូតូមកដល់ចំណុចមុខបុរីពិភពថ្មីកំបូល ស្រាប់តែមានជនសង្ស័យមួយក្រុមមានគ្នាចំនួន៦នាក់ជិះម៉ូតូចំនួន៣គ្រឿង ក្នុងនោះមួយគ្រឿងម៉ាកស៊ុយហ្ស៊ុយគីលេត និង២គ្រឿងទៀតម៉ាកសង់បិច បានបើកម៉ូតូដេញពួកគាត់ ធ្វើឲ្យពួកគាត់ភ័យរត់ចូលពួនមួយកន្លែង លុះមិនឃើញភាគីបង្ក ពួកគាត់ក៏បាននាំគ្នាត្រឡប់មកផ្ទះវិញ ។
ប្រភពដដែលបានបន្តថា លុះពេលពួកគាត់បើកម៉ូតូមកដល់ចំណុចកើតហេតុ នៅមុខបុរីញ៉ូវថោន ផ្សារអូរដឹម ស្រាប់តែឃើញភាគីបង្កជិះម៉ាកសង់បិចចំនួន២គ្រឿងដេញតាមវាយ និងចាក់ពួកគាត់ បណ្តាលឲ្យរងរបួសធ្ងន់ម្នាក់ និងស្រាលម្នាក់ ហើយភាគីបង្កដែលជិះម៉ូតូម៉ាកសង់បិចចំនួន២គ្រឿងនោះបាននាំគ្នាគេចខ្លួនបាត់ តែចៃដន្យនៅពេលនោះដែរ ស្រាប់តែកំលាំងអន្តរាគមន៍ខណ្ឌពោធិ៍សែនជ័យបានប្រទះឃើញភាគីបង្កចំនួន២នាក់ជិះម៉ូតូមួយគ្រឿងម៉ាកស៊ុយហ្សុ៊យគីឡែត ហើយក៏ចាប់ឃាត់ខ្លួនបាន២នាក់ភ្លាមៗផងដែរ។
ប្រភពដដែលបានបន្តទៀតថា បន្ទាប់ពីកើតហេតុ ជនរងគ្រោះទាំង២នាក់បាននាំគ្នាទៅព្យាបាលនៅមន្ទីរពេទ្យឯកជនជិតកន្លែងកើតហេតុដែរ តែមន្ទីរពេទ្យឯកជននោះមិនហ៊ានទទួលឡើយ ទើបជនរងគ្រោះម្នាក់ដែលរងរបួសធ្ងន់ ត្រូវបានបងប្អូនបញ្ជូនទៅសង្គ្រោះមន្ទីរពេទ្យព្រះកុសុមៈភ្លាមៗផងដែរ ។
ក្រោយពេលកើតហេតុ កំលាំងប៉ុស្តិ៍ចោមចៅទី៣បានចុះទៅទទួលពាក្យបណ្តឹងពីជនរងគ្រោះនៅមន្ទីរពេទ្យព្រះកុសុមៈភ្លាមៗផងដែរ ទើបកសាងសំណុំរឿង និងបញ្ជូនជនបង្កទាំង២នាក់ខាងលើទៅផ្នែកជំនាញព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមនីតិវិធីជាបន្តទៀត ៕
ចែករំលែកព័តមាននេះ