ខេត្តរតនគីរី ៖ ឪពុកនិងកូនប្រុសយកម៉ាស៊ីនត្រង់ស៊ីន័រកាត់ដើមឈើក្នុងព្រៃចំការរបស់ខ្លួន បណ្តាលឱ្យដើមឈើរលំសង្កត់ស្លាប់ឪពុកយ៉ាងអាណោចអាធម័នៅនឹងកន្លែងកើតហេតុ ចំណែកកូនប្រុសរងរបួសធ្ងន់ ។
ហេតុការណ៍ខាងលើនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១ ខែមេសា ឆ្នាំ២០១៩ ក្នុងចំការរបស់ជនរងគ្រោះ ស្ថិតនៅភូមិប៉ាជន់ ឃុំឯកភាព ស្រុកអូជុំ ។
ជនរងគ្រោះទាំង២នាក់ខាងលើ ក្នុងនោះឪពុកឈ្មោះយ៉ូត ប៉ូញ អាយុ៣៨ឆ្នាំ ជាជនជាតិដើមភាគីតិចទំពួន មុខរបរកសិករ បានស្លាប់នៅកន្លែងកើតហេតុ និងជនរងគ្រោះត្រូវជាកូនឈ្មោះឡេង ភី ភេទប្រុស អាយុ១៨ឆ្នាំ ជាជនជាតិដើមភាគិតិចទំពួន បានរងរបួសធ្ងន់ ។ ជនរងគ្រោះទាំង២នាក់រស់នៅភូមិឃុំកើតហេតុខាងលើ។
បើតាមការរៀបរាប់របស់ជនរងគ្រោះឈ្មោះឡេង ភី ត្រូវជាកូន ដែលបានឃើញហេតុការផ្ទាល់បានអោយដឹងថា នៅមុនពេលកើតហេតុ គាត់និងឪពុកបានចូលទៅក្នុងព្រៃចម្ការ ហើយឪពុករបស់គាត់បានយកម៉ាស៊ីនត្រង់ស៊ីន័រកាត់ដើមឈើដួលអស់៣ទៅ៤ដើម ហើយបន្តទៅកាត់ដើមឈើធំមួយដើមទៀត ពេលឪពុករបស់គាត់កំពុងតែកាត់ជិតដាច់ទៅហើយ ស្រាប់តែដើមឈើធំនោះរលំសង្កត់ចំក បណ្ដាលអោយឪពុករបស់គាត់ស្លាប់ភ្លាមៗនៅកន្លែងកើតហេតុតែម្ដង ចំណែកគាត់បានរងរបួសធ្ងន់។
សមត្ថកិច្ចមូលដ្ឋានបានបញ្ជាក់ថា បន្ទាប់ពីកើតហេតុ សមត្ថកិច្ចបានចុះទៅធ្វើការត្រួតពិនិត្យសពជនរងគ្រោះដល់កន្លេងកើតហេតុ ជាលទ្ធផលរកឃើញថា ជនរងគ្រោះពិតជាបានស្លាប់ដោយសារដើមឈើរលំសង្កត់ពីលើប្រាកដមែន គ្មានរឿងឃាតកម្មកើតឡើងនោះទេ ។
បន្ទាប់ពីពិនិត្យរួច សមត្ថកិច្ចបានប្រគល់សពជនរងគ្រោះអោយក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ