រាជធានីភ្នំពេញ ៖ អាងហែលទឹកពហុកីឡដ្ឋានជាតិអូឡាំពិក គ្រោងបញ្ចប់ការជួសជុល សាងសង់ នៅចុងខែឧសភា ឆ្នាំ២០១៩ ខាងមុខនេះ ដើម្បីឱ្យអត្តពលិកកម្ពុជាហ្វឹកហាត់ត្រៀមខ្លួនដណ្ដើមយកមេដាយជូនជាតិក្នុងព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជានឹងធ្វើម្ចាស់ផ្ទះ ។
ពាក់ព័ន្ធនឹងដំណើរការជួសជុលអាងហែលទឹកនេះ កាលពីថ្ងៃអាទិត្យទី៣១ មីនា លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធកីឡាហែលទឹកកម្ពុជា បានអញ្ជើញចុះពិនិត្យមើលវឌ្ឍនភាពការងារជួសជុល និងសាងសង់អាងហែលទឹកនេះដោយមានការអញ្ជើញចូលរួមពីសំណាក់ថ្នាក់ដឹកនាំក្រសួង និងសហព័ន្ធជាច្រើនរូបផងដែរ។
ថ្លែងនៅក្នុងឱកាសចុះពិនិត្យមើលការសាងសង់នោះ លោកទេសរដ្ឋមន្ត្រីស៊ុន ចាន់ថុល បានគូសបញ្ជាក់ពីការខិតខំប្រឹងប្រែងក្នុងការស្វែងរកប្រភពថវិកាពីសប្បុរសជន និងក្រុមហ៊ុនឯកជននានា ដើម្បីកសាងអាងហែលទឹកឱ្យបានច្រើនកន្លែងទៀត ក្នុងគោលបំណងដើម្បីអភិវឌ្ឍវិស័យកីឡាហែលទឹកនៅកម្ពុជា ឱ្យមានការរីកចម្រើន និងដើម្បីស្វែងរកមេដាយជូនជាតិឱ្យបានច្រើនក្នុងព្រឹត្តិការណ៍កីឡាស៊ីហ្គេម
ដែលកម្ពុជានឹងធ្វើជាម្ចាស់ផ្ទះ នៅឆ្នាំ២០២៣ ខាងមុខនេះ ។
លោកទេសរដ្ឋមន្ត្រី បានបន្ថែមទៀតថា ការថែទាំជួសជុលអាងហែលទឹកនេះ គម្រោងចំណាយរយៈពេលពី៧ទៅ៨ខែ ហើយកីឡាករ-កីឡាការិនីដែលកំពុងទទួលការហ្វឹកហាត់បច្ចុប្បន្នទាំងអស់ត្រូវទៅហ្វឹក ហាត់នៅកន្លែងថ្មីជាបណ្តោះអាសន្នសិន រង់ចាំការជួសជុល និងសាងសង់បានបញ្ចប់ជាស្ថាពរ។
ជាមួយគ្នានេះផងដែរលោកទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់សប្បុរសជន ក៏ដូចជាក្រុមហ៊ុនឯកជននានាដែលបានជួយឧបត្ថម្ភគាំទ្រដល់ការជួសជុលថែទាំអាងហែលទឹកក្នុងពហុកីឡដ្ឋានជាតិនេះឱ្យមានភាពល្អប្រសើរឡើងវិញប្រកបដោយលក្ខណៈស្តង់ដារអន្តរជាតិ និងដែលបានចូលរួមចំណែកអភិវឌ្ឍវិស័យកីឡានៅកម្ពុជា។
សូមបញ្ជាក់ថា បច្ចុប្បន្ន ការជួសជុល និងសាងសង់អាងហែលទឹក និងអាងលោត សម្រេចបានប្រមាណជា៥៥ភាគរយហើយ ដែលការថែទាំជួសជុល និងសាងសង់អាងហែលទឹកនេះ គម្រោងចំណាយរយៈពេលពី៧ទៅ៨ខែ ដោយចាប់ដំណើរការជួសជុល និងសាងសង់ពីខែវិច្ឆិកា ឆ្នាំ២០១៨ ហើយគ្រោងបញ្ចប់នៅចុងខែឧសភា ឆ្នាំ២០១៩ ដើម្បីដាក់ឱ្យដំណើរការឡើងវិញ សម្រាប់ឱ្យកីឡាករ-កីឡាការិនីកម្ពុជា ធ្វើការហ្វឹកហាត់ ក្នុងការត្រៀមខ្លួនក្នុងព្រឹត្តិការណ៍កីឡាស៊ីហ្គេម ដែលកម្ពុជានឹងធ្វើម្ចាស់ផ្ទះនៅឆ្នាំ២០២៣ ខាងមុខ៕
ចែករំលែកព័តមាននេះ