ខេត្តកំពង់ឆ្នាំង ៖ ស្ត្រីម្នាក់បានស្លាប់នៅនឹងកន្លែងកើតហេតុ ចំណែកបុរសជាប្តីបានរងរបួសជាទម្ងន់ក្នុងហេតុការណ៍គ្រោះថ្នាក់ចរាចរណ៍មួយបានកើតឡើងរវាងរថយន្តមួយគ្រឿងបុកជាមួយម៉ូតូមួយគ្រឿងកាលពីវេលាម៉ោង៥និង៣០នាទីល្ងាចថ្ងៃទី១ ខែមេសា ឆ្នាំ២០១៩ នៅលើផ្លូវជាតិលេខ៥ ត្រង់ចន្លោះគីឡូម៉ែត្រលេខ៧២ និងលេខ៧៣ ស្ថិតក្នុងភូមិអូរសណ្តាន់ ឃុំទឹកហូត ស្រុករលាប្អៀរ ។
តាមប្រភពសមត្ថកិច្ចនគរបាលនៅកន្លែងកើតហេតុបានឲ្យដឹងថា ម៉ូតូមួយគ្រឿងជិះគ្នា២នាក់ប្តីប្រពន្ធម៉ាកហុងដា ធុនសេ125 ពណ៌ខ្មៅ ពាក់ស្លាកលេខ កំពង់ឆ្នាំង ១F-៣១០៨ បើកបរដោយបុរសជាប្តីឈ្មោះឆាយ សុខគីន អាយុ៣៦ឆ្នាំ បានរងរបួសធ្ងន់ ចំណែកអ្នករួមដំណើរជាប្រពន្ធឈ្មោះរិត អាយុ២៤ឆ្នាំ បានស្លាប់នៅនឹងកន្លែង ។ ប្ដីប្រពន្ធទាំងពីរនាក់មានទីលំនៅភូមិពារាជ្យ ឃុំសេដ្ឋី ស្រុកសាមគ្គីមានជ័យ ។
តាមប្រភពពីសមត្ថកិច្ចនគរបាលនៅកន្លែងកើតហេតុបានបន្តឲ្យដឹងថា មុនពេលកើតហេតុ ជនរងគ្រោះទាំងពីរនាក់ប្ដីប្រពន្ធជិះម៉ូតូម៉ាកហុងដា ធ្វើដំណើរពីទិសខាងជើងទៅត្បូង លុះមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿងម៉ាកហ៊ីយ៉ាន់ដាយ ពណ៌ត្រេអុី បានបើកមកពីក្រោយបុកម៉ូតូជនរងគ្រោះពេញទំហឹង បណ្ដាលឲ្យស្ត្រីជាប្រពន្ធស្លាប់ភ្លាមៗនៅនឹងកន្លែង ចំណែកបុរសជាប្តីបានរងរបួសធ្ងន់ ។
ក្រោយពេលកើតហេតុ អ្នកបើកបររថយន្តបង្កបានរត់គេចខ្លួនដែរ ប៉ុន្តែត្រូវសមត្ថកិច្ចតាមចាប់បាននិងកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់។ ដោយឡែកសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី ចំណែកឯបុរសជាប្តីត្រូវបានដឹកទៅសង្គ្រោះនៅមន្ទីរពេទ្យផងដែរ៕
ចែករំលែកព័តមាននេះ