ខេត្តកំពង់ឆ្នាំង ៖ ផ្ទាំងប៉ាណូនិមិត្តសញ្ញាឆ្នាំង ដែលគេធ្វើឡើងសម្រាប់អបអរសាទរក្នុងពិធីបុណ្យទន្លេ បានបាក់មួយផ្ទាំងទៀតហើយ បន្ទាប់ពីមានខ្យល់និងភ្លៀង កាលពីវេលាម៉ោង២និង១០នាទីរសៀលថ្ងៃទី៣១ ខែមីនា នៅតាមផ្លូវពីផ្សារលើទៅផ្សារក្រោម ស្ថិតក្នុងភូមិផ្សារលើសង្កាត់កំពង់ឆ្នាំង…
ខេត្តកំពង់ឆ្នាំង ៖ ផ្ទាំងប៉ាណូនិមិត្តសញ្ញាឆ្នាំង ដែលគេធ្វើឡើងសម្រាប់អបអរសាទរក្នុងពិធីបុណ្យទន្លេ បានបាក់មួយផ្ទាំងទៀតហើយ បន្ទាប់ពីមានខ្យល់និងភ្លៀង កាលពីវេលាម៉ោង២និង១០នាទីរសៀលថ្ងៃទី៣១ ខែមីនា នៅតាមផ្លូវពីផ្សារលើទៅផ្សារក្រោម ស្ថិតក្នុងភូមិផ្សារលើសង្កាត់កំពង់ឆ្នាំង ក្រុងកំពង់ឆ្នាំង ។ ក្នុងហេតុការណ៍ខាងលើ បណ្ដាលឲ្យរថយន្តមួយគ្រឿងរងការខូចខាតបែកកញ្ចក់ និងរងរបួសមនុស្សម្នាក់ស្រាលផងដែរ ។
លោក ឆាយ ខេមរ័ត្ន អធិការនគរបាលក្រុងកំពង់ឆ្នាំង ដែលបានដឹកនាំកម្លាំងចុះរុះរើគ្រោងប៉ាណូនៅកន្លែងកើតហេតុខាងលើ បានឲ្យដឹងថា មុនពេលកើតហេតុ មិនសូវជាមានភ្លៀងនិងខ្យល់ប៉ុន្មានទេ ប៉ុន្តែខ្យល់បានបោកបក់ចំផ្ទាំងប៉ាណូមួយផ្ទាំង ដែលកាត់ទទឹងផ្លូវចុះពីផ្សារលើទៅផ្សារក្រោម បណ្តាលឲ្យរលំរាបដល់ដីតែម្ដង ។ ក្នុងហេតុការណ៍នោះ ផ្ទាំងប៉ាណូបានបាក់សង្កត់លើរថយន្តមួយគ្រឿងម៉ាកតូយូ៉តា២បាំង ពណ៌ស ពាក់ផ្លាកលេខ OI.៧០៨៨ បណ្តាលឱ្យបែកកញ្ចក់ និងក្រពឹតកាបូខាងមុខ ជាមួយគ្នានេះក៏មានមនុស្សម្នាក់រងរបួសស្រាលផងដែរ ។
លោកអធិការបញ្ជាក់ថា ផ្ទាំងប៉ាណូបានសង្កត់ជាប់លើរថយន្តទៅមុខមិនរួច ហើយក៏បានប្រជាពលរដ្ឋជួយលើកដើម្បីយករថយន្តនោះចេញ ។ បន្ទាប់មក លោកបានដឹកនាំកងកម្លាំងរុះរើគ្រោងនោះចេញ ដោយប្រើម៉ូទ័រឆាបកាត់ផ្តាច់ជាកង់ៗដើម្បីយកចេញ និងសម្រួលចរាចរណ៍ឡើងវិញ ហើយគ្រោងឆ្អឹងប៉ាណូយកទៅទុកឲ្យរដ្ឋបាលសាលាខេត្តចាត់ការបន្ត ។
ដោយឡែក សាក្សីនៅកន្លែងកើតហេតុបានឲ្យដឹងថា គ្រោងប៉ាណូនៅកន្លែងកើតហេតុមានសភាពល្អធម្មតាទេ ។ ប៉ុន្តែកាលពីថ្ងៃទី៣០ខែមីនា ឃើញមានក្រុមជាងភ្លើងឡើងទៅដោះភ្លើងចេញ បណ្ដាលឱ្យទន់វៀចគ្រោងប៉ាណូនោះ និងគ្មានភាពរឹងមាំទេ ទើបធ្វើឲ្យខ្យល់បោកបាក់សង្កត់លើរថយន្តដែលកំពុងធ្វើពីដំណើរបែបនេះ ។
សូមបញ្ជាក់ថា នេះជាផ្ទាំងប៉ាណូនិមិត្តសញ្ញាឆ្នាំងទី២ហើយដែលបានបាក់រលំរាបដល់ដីបែបនេះ ដែលទីមួយគឺកើតឡើងនៅផ្លូវជាតិលេខ៥ ត្រង់ចំណុចទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ដែលបង្កដោយរថយន្តបុក និងលើកទី២ នៅកន្លែងកើតហេតុខាងលើនេះ សំណាងហើយបើប៉ះចំម៉ូតូ ឬអ្នកថ្មើរជើងវិញអាចនឹងមានអ្នករងរបួសច្រើនជាងនេះ ៕
ចែករំលែកព័តមាននេះ