រាជធានីភ្នំពេញ ៖ ទំនាក់ទំនងកម្ពុជានាពេលនេះបានឈានដល់ចំណុចកំពូល ជាមួយនឹងកំណើននៃអ្នកវិនិយោគិនចិន និងទេសចរណ៍ចិន មកកម្ពុជា ជាក់ស្តែងឆ្នាំ ២០១៨ កន្លងទៅ ភ្ញៀវទេសចរចិនឈរលំដាប់ទី១ ក្នុងចំណោមភ្ញៀវទេសចរជាង៦លាននាក់ដែលមកទស្សានកម្ពុជា ។
ថ្មីៗនេះទៀតសោត តបតាមការអញ្ជើញរបស់ប្រធានតំបន់រដ្ឋបាលពិសេសម៉ាកាវ ដោយមានការចូលរួមក្នុងវេទិកានានានៅប្រទេស ចិន អស់រយ់ៈពេល ៥ ថ្ងៃមក នៅថ្ងៃទី ៣០ ខែ មីនា ឆ្នាំ២០១៩នេះ ឯកឧត្តម យន្ត មីន អភិបាល នៃ គណៈអភិបាលខេត្ត ព្រះសីហនុ បានត្រលប់មកដល់ប្រទេសកម្ពុជាវិញហើយ ជាមួយនឹងព័ត៌មានដែលថាចិនចាប់អារម្មណ៍កម្ពុជាកាន់តែខ្លាំងលើវិស័យទេសចរណ៍ ក៏ដូចជាការចង់បង្កើតការហោះហើរត្រង់ពីបណ្តាខេត្តមួយចំនួនរបស់ប្រទេសចិន មកកាន់ខេត្តមាត់សមុទ្រផងដែរ ។
ថ្លែងទៅកាន់ក្រុមអ្នកសារព័ត៌មាននៅឯព្រលានយន្តហោះអន្តរជាតិភ្នំពេញ លោក យន្ត មីន បានឱ្យដឹងនៅថ្ងៃទី ៣០ ខែមីនា នេះថា «រដ្ឋបាលខេត្តព្រះសីហនុបានទៅចូលរួមក្នុងកិច្ចប្រជុំរដ្ឋបាលខេត្តរបស់ប្រទេសអាស៊ាន នៅឯម៉ាកាវ និង កោះ ហៃណាន់ ព្រមទាំងបានធ្វើការចូលរួមនៅតាមតំបន់អភិវឌ្ឍន៍មួយចំនួនទៀត ។ ឆ្លៀតឱកាសនោះ រដ្ឋបាលខេត្តព្រះសីហនុ ក៏បានបង្ហាញអំពីសក្តានុពលដ៏ល្អរបស់កម្ពុជា ជាពិសេសខេត្ត ព្រះសីហនុ ព្រមទាំងបានអំពាវនាវដល់វិនិយោគិនចិនឱ្យមកបណ្តាក់ទុនវិនិយោគនៅកម្ពុជាផងដែរ ។ អ្នកវិនិយោគចិន នៃកោះហៃណាន់ និងម៉ាកាវបានចាប់អារម្មណ៍អំពីសក្តានុពលវិនិយោគនៅកម្ពុជា និង បានសន្យាថានឹងរកពេលវេលាសមស្របមកសិក្សាស្វែងយល់ពីឱកាសវិនិយោគនៅកម្ពុជាជាពិសេសលើ វិស័យទេសចរណ៍ និងឧស្សាហកម្ម នៅក្នុងខេត្តព្រះសីហនុ » ។
កិច្ចប្រជុំនេះធ្វើឡើងក្នុងគោលបំណងដើម្បីសិក្សាស្វែងយល់បទពិសោធន៍នៃការអភិវឌ្ឍខេត្តពីគ្នាទៅវិញទៅមក ការពង្រឹងមិត្តភាព និងសាមគ្គីភាពរវាងគ្នានិងគ្នា។ រដ្ឋបាលខេត្តព្រះសីហនុ បានចូលរួមក្នុងវេទិកាសន្ទនា ស្តីពីការលើកកម្ពស់ការតភ្ជាប់ អាស៊ាន-ចិន ដើម្បី សេដ្ឋកិច្ច និង កិច្ចសហប្រតិបត្តិការវប្បធម៌ប្រកបដោយនិតន្តរភាព ។ ដោយឡែក រដ្ឋបាល ខេត្តព្រះសីហនុ បន្តពង្រឹង និង ពង្រីកកិច្ចសហប្រតិបត្តិការតាមរយៈខេត្ត-ក្រុងបងប្អូន ចូលរួមវេទិកាអន្តរជាតិនានា ផ្លាស់ប្តូរទស្សនកិច្ចសិក្សា ដកស្រង់បទពិសោធន៍គ្នាទៅវិញទៅមក ដោយកន្លងមកខេត្ត ព្រះសីហនុ បានចងសម្ព័ន្ធភាព ខេត្ត-ក្រុង បងប្អូន ជាមួយប្រទេស ចិន បានចំនួន ១៦ ខេត្ត ក្រុង ហើយ ។
រដ្ឋបាលខេត្តព្រះសីហនុ គាំទ្រចំពោះការអនុវត្តគោលនយោបាយ ខ្សែក្រវាត់មួយ ផ្លូវមួយ និង ផ្លូវសូត្រសមុទ្ទសតវត្សរ៍ទី ២១ របស់ប្រទេស ចិន ដែលបានធ្វើឱ្យទីផ្សារកម្ពុជា ជាពិសេសខេត្តព្រះសីហនុ ក្លាយជាទីចំណាប់អារម្មណ៍របស់អ្នកវិនិយោគ ចិន ទាំងវិស័យទេសចរណ៍ ពាណិជ្ជកម្ម សំណង់ និង ដឹកជញ្ជូន ។ រដ្ឋបាលខេត្ត ព្រះសីហនុ នឹងបន្តខិតខំសហប្រតិបត្តិការជាមួយ ហៃណាន លើវិស័យទេសចរណ៍ ដោយបង្កើតការហោះហើរត្រង់ពីព្រលានយន្តហោះ ហៃខូ ឬ ពី សាន់យ៉ា មកកាន់ព្រលានយន្តហោះអន្តរជាតិខេត្តព្រះ
សីហនុ ។
យោងតាមរបាយការណ៍របស់ក្រសួង ទេសចរណ៍កន្លងមកបានបង្ហាញឲ្យដឹងថា ចំនួនភ្ញៀវទេសចរមកកាន់កម្ពុជាក្នុងឆ្នាំ២០១៨ មានការកើនឡើង១១ភាគរយគឺស្មើនឹង ៦លាន២សែននាក់ ក្នុងនោះភ្ញៀវចិនមាន៣០ភាគរយ។ ខណៈភ្ញៀវទេសចរចិនមានកំណើន៧០ ភាគរយ បើធៀបទៅឆ្នាំ២០១៧ ។ ចំនួនភ្ញៀវទេសចរអន្តរជាតិដែលបានមកទស្សនាក្នុងប្រទេសកម្ពុជាក្នុងឆ្នាំ២០១៨ មានចំនួន ៦.២ លាននាក់ គឺកើនជាង១១ ភាគរយ បើធៀបនឹងឆ្នាំ២០១៧។ ភ្ញៀវទេសចរជនជាតិចិន ឈរលំដាប់មុខគេបង្អស់ ដែលមានចំនួនប្រមាណ១លាន៩សែននាក់ដែលជាការកើនឡើងជាង៧០ភាគរយ ។
ចែករំលែកព័តមាននេះ