ខេត្តកំពង់ឆ្នាំង ៖ ប្រជាពលរដ្ឋក្នុងខេត្ត ជាពិសេសអ្នកក្រុងកំពង់ឆ្នាំង បានត្អូញត្អែរអំពីការលំបាកខ្វះខាតទឹកស្អាតប្រើប្រាស់ ដោយសារតែក្រុមហ៊ុន អានកូ ដែលជាអ្នកផលិតទឹកស្អាត គ្មានលទ្ធភាពផ្ដល់ទឹកឲ្យប្រជាពលរដ្ឋប្រើប្រាស់បានគ្រប់គ្រាន់ ក្នុងរយៈពេលចុងក្រោយនេះ…
ខេត្តកំពង់ឆ្នាំង ៖ ប្រជាពលរដ្ឋក្នុងខេត្ត ជាពិសេសអ្នកក្រុងកំពង់ឆ្នាំង បានត្អូញត្អែរអំពីការលំបាកខ្វះខាតទឹកស្អាតប្រើប្រាស់ ដោយសារតែក្រុមហ៊ុន អានកូ ដែលជាអ្នកផលិតទឹកស្អាត គ្មានលទ្ធភាពផ្ដល់ទឹកឲ្យប្រជាពលរដ្ឋប្រើប្រាស់បានគ្រប់គ្រាន់ ក្នុងរយៈពេលចុងក្រោយនេះ ព្រោះតែក្រុមហ៊ុនផលិតទឹកស្អាតមួយនេះពឹងផ្អែកតែលើអគ្គិសនីទាំងស្រុង លុះដល់ភ្លើងដាច់ ទឹកក៏ដាច់ដែរ ធ្វើឱ្យប្រជាពលរដ្ឋរអ៊ូថា ៖ ឱ្យតែភ្លើងដាច់ ទឹកគឺដាច់ដែរ យ៉ាប់ណាស់ ។
ប្រជាពលរដ្ឋបានចោទទៅក្រុមហ៊ុនថា អសមត្ថភាព គ្រាន់តែម៉ាស៊ីនភ្លើងមួយសម្រាប់ផលិតទឹកស្អាតឲ្យប្រជាពលរដ្ឋក៏មិនហ៊ានទិញដែរ ។ ជារៀងរាល់ថ្ងៃពឹងលើតែអគ្គិសនី បើអគ្គិសនីគ្មាន ទឹកក៏គ្មានដែរ ។ជារៀងរាល់ថ្ងៃ បើភ្លើងដាច់ព្រឹក ទឹកក៏អត់ពេលព្រឹក បើភ្លើងដាច់ល្ងាច ទឹកក៏អត់ពេលល្ងាច ហើយតំបន់ខ្លះដាច់២ថ្ងៃក៏មាន។ ប្រជាពលរដ្ឋបានសំណូមពរដល់លោកអភិបាលខេត្ត ជាពិសេសម្ចាស់ក្រុមហ៊ុនផលិតទឹកស្អាត សូមមេត្តាទិញម៉ាស៊ីនភ្លើងយកមកផលិតទឹកស្អាតជូនប្រជាពលរដ្ឋផង ព្រោះក្រុមហ៊ុនក៏ចំណេញប្រាក់ពីប្រជាពលរដ្ឋមួយខេត្តកំពង់ឆ្នាំង មិនស្ទើរដែរ ក្នុង១ខែៗ ។ សូមកុំខ្ចីដង្ហើមគេដកបែបនេះ ស្លាប់ប្រជាពលរដ្ឋ អស់ហើយ នៅកន្លែងណា ក៏គេនិយាយពីបញ្ហាទឹកនេះដែរ ព្រោះយ៉ាប់ពេក ….។
ជុំវិញបញ្ហានេះ លោក វង្ស វិសាល ប្រធានមន្ទីរឧស្សាហកម្ម និងសិប្បកម្ម បាននិយាយប្រាប់ភ្នាក់ងារយើងនៅរសៀលថ្ងៃទី០១ ខែមេសា នេះថា ខាងក្រុមហ៊ុនបានរកជួលម៉ាស៊ីនភ្លើងដែរ តែមិនបាន ហើយកន្លងទៅនេះក្រុមហ៊ុនបានកុំម្ម៉ង់ទិញម៉ាស៊ីនភ្លើងពីបរទេសរួចហើយ កាលពីមួយសប្តាហ៍មុន ហើយប្រហែលជាជាង៦ សប្តាហ៍ទៀត ម៉ាស៊ីនភ្លើងនឹងមកដល់ ក្រុមហ៊ុននឹងដំណើរការដោយខ្លួនឯង ។ លោកបានបញ្ជាក់ថា នៅស្រុកខ្មែរមិនមានម៉ាស៊ីនភ្លើងណាដែលអាចមានលទ្ធភាពអូសម៉ូទ័របូមទឹកសម្រាប់ផលិតទឹកស្អាតនោះបានឡើយ។
ជាងនេះទៅទៀតលោកបានបញ្ជាក់ថា ក្រុមហ៊ុនបានជូនដំណឹងដល់ប្រជាពលរដ្ឋហើយថា ថ្ងៃគូ ក្រុមហ៊ុនបើកទឹកឱ្យប្រជាពលករដ្ឋក្នុងក្រុងកំពង់ឆ្នាំង ចំណែកថ្ងៃសេសបើកឱ្យប៉ែកខាងព្រៃខ្មែរ និងខាងពង្រជាដើម ។ សូមប្រជាពលរដ្ឋត្រៀមនៅពេលមានទឹកត្រូវបើកដាក់ ពាង ឬអាង ទុកសម្រាប់ប្រើប្រាស់ពេលទឹកដាច់ ។
ទោះយ៉ាងនេះក្តី ចាប់តាំងពីភ្លើងដាច់ ទឹកក៏ដាច់តាម មកដល់ពេលនេះ មិនឃើញខាងក្រុមហ៊ុនជូនដំណឹង ដល់ប្រជាពលរដ្ឋពីការដាក់វេនគ្នាប្រើទឹកស្អាតរបស់ក្រុមហ៊ុននោះទេ ទើបតែឮលោកប្រធានមន្ទីរឧស្សាហកម្ម និងសិប្បកម្មប្រាប់នៅពេលនេះ ។ ហេតុនេះសូមបងប្អូនអ្នកខេត្តកំពង់ឆ្នាំង ជ្រាបជាព័ត៌មាន និងសូមប្រុងប្រយ័ត្នត្រូវត្រៀមទឹកទុកគ្រប់ពេលដែលក្រុមហ៊ុន បើកឱ្យម្តងៗ៕
ចែករំលែកព័តមាននេះ