ប្រទេសថៃ ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃទី៣០ ខែមីនា កន្លងមកថា បើទោះជាវិស័យឯកជនកំពុងតែព្រួយបារម្ភថា លទ្ធផលបោះឆ្នោតអាចនឹងប៉ះពាល់ដល់ការលូតលាស់សេដ្ឋកិច្ចពិតមែនក្តី ធនាគារជាតិរបស់ប្រទេសថៃនៅបន្តសុទិដ្ឋិនិយមថា ការវិនិយោគ និងការចំណាយក្នុងស្រុកដែលជាកត្តាជំរុញដល់ការលូតលាស់យ៉ាងសំខាន់នៅបន្តរឹងមាំនៅឡើយ ។
លោក Don Nakornthab ដែលជាប្រធាននាយកដ្ឋានសេដ្ឋកិច្ចនិងគោលនយោបាយនៅធនាគារជាតិខាងលើបាននិយាយថា រដ្ឋាភិបាលបច្ចុប្បន្ននៅតែមានអំណាចពេញលេញ ដូច្នេះនយោបាយមិនអាចប៉ះពាល់ដល់ការលូតលាស់ទេ។
លោកបានបន្តថា ការវិនិយោគរបស់រដ្ឋាភិបាលលើគម្រោងធំៗដូចជាច្រករបៀងសេដ្ឋកិច្ចខាងកើតនឹងបន្តកើតមានឡើងប្រសិនបើរដ្ឋាភិបាលថ្មីអាចដំណើរការបាន។ លោកបានបន្ថែមថា ការវិនិយោគ និងការចំណាយក្នុងស្រុកបន្តមានភាពរឹងមាំក្នុងរយៈពេល២ខែដំបូងនាឆ្នាំនេះ ហើយពួកវាក៏មានទស្សនៈវិស័យល្អផងដែរ។
កាលពីខែកុម្ភៈ ការចំណាយឯកជនបន្តកើនឡើងគ្រប់វិស័យបើធៀនបនឹងឆ្នាំមុន។ អំណាចទឹកប្រាក់បន្តមានភាពរឹងមាំល្អព្រោះតែប្រាក់ចំណូលក្នុងវិស័យកសិកម្ម និងវិស័យផ្សេងៗ ស្របទៅនឹងកំណើនជំនឿទុកចិត្តរបស់អតិថិជនដែលបានកើនឡើងខ្ពស់ជាងមុនផងដែរ ។
ការវិនិយោគឯកជនបានធ្លាក់ចុះបន្តិចកាលពីខែកុម្ភបើធៀបនឹងឆ្នាំមុន ដែលភាគច្រើនមកពីការធ្លាក់ចុះនៃចំនួនតំបន់ដែលអនុញ្ញាតឲ្យមានការសាងសង់ ប៉ុន្តែការវិនិយោគក្នុងវិស័យម៉ាស៊ីននិងឧបករណ៍បានបន្តកើនឡើង ។
យ៉ាងណាក្តី ភាពមិនប្រាកដប្រជាផ្នែកនយោបាយក្នុងកំឡុងពេលផ្លាស់ប្តូរដ្ឋាភិបាលអាចនឹងប៉ះពាល់ដល់ការវិនិយោគរបស់ក្រុមហ៊ុនរដ្ឋាភិបាលប្រមាណ ១០% ។ លោក Don បានឲ្យដឹងថាធនាគារជាតិគិតថារដ្ឋាភិបាលថ្មីនឹងត្រូវបានបង្កើតឡើងនៅខែកក្កដា ។
លើសពីនេះទៅទៀត លោកបានបន្តថាការនាំចេញអាចនឹងធ្លាក់ចុះក្នុងត្រីមាសទីមួយព្រោះតែអត្រាឆ្នាំមុនមានកម្រិតខ្ពស់ និងមកពីជម្លោះពាណិជ្ជកម្មរវាងសហរដ្ឋអាមេរិកនិងប្រទេសចិនផងដែរ ។
ប៉ុន្តែលោកបានបន្តថាការនាំចេញអាចនឹងកើនឡើងវិញក្នុងឆមាសទី២ព្រោះភាពតានតឹងពាណិជ្ជកម្មរវាងសេដ្ឋកិច្ចធំៗទាំងពីរអាចនឹងត្រូវបានកាត់បន្ថយខណៈដែលការចរចារវាងភាគីទាំងពីរកំពុងតែជិតត្រូវបានបញ្ចប់ ហើយវិធានការជំរុញរបស់ប្រទេសដទៃទៀតអាចនឹងជួយដល់ការធ្វើពាណិជ្ជកម្មជុំវិញពិភពលោកដែរ ៕
ចែករំលែកព័តមាននេះ