រាជធានីភ្នំពេញ ៖ បុរសម្នាក់ស្រវឹងបើកបររ៉ឺម៉កម៉ូតូកង់បីដឹកមិត្តភក្តិឆ្លងផ្លូវរង្វង់មូលកួចកាណុងមិនប្រយ័ត្នជ្រុលទៅប៉ះរថយន្តស៊េរីទំនើបមួយគ្រឿង បណ្តាលអោយរងការខូចខាតតិចតួចបន្ទាប់មកភាគីទាំង២ចរចាគ្នាអស់ជាង២ម៉ោងទើបត្រូវគ្នា ។
ហេតុការណ៍នេះបានកើតឡើងកាលពីវេលាម៉ោង៩និង២០នាទីយប់ថ្ងៃទី៣១ ខែមីនា ឆ្នាំ២០១៩ តាមបណ្តោយផ្លូវទំនប់៧០ នៅចំណុចរង្វង់មូលកួចកាណុង ស្ថិតនៅក្នុងសង្កាត់ ស្រះចក ខណ្ឌដូនពេញ ។
តាមប្រភពពីសាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញបុរសមិនស្គាល់អត្តសញ្ញាណចំនួន២នាក់ ក្នុងនោះបុរសម្នាក់ជាអ្នករួមដំណើរ និងបុរសម្នាក់ទៀតជាអ្នកបើកបររ៉ឺម៉កម៉ូតូកង់បីបានបើកបរយ៉ាងលឿន និងបើកបរក្នុងស្ថានភាពស្រវឹង បានធ្វើដំណើរតាមបណ្តោយផ្លូវ៩៣ផ្សារតូច ក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើនេះ ស្រាប់តែជ្រុលទៅប៉ះរថយន្ត TRAILBEAZER ពណ៌ស ពាក់ស្លាកលេខ ភ្នំពេញ ២AV-៦៨៩៤ កំពុងបើកបរតាមបណ្តោយផ្លូវជាតិលេខ៦ក្នុងទិសដៅពីកើតទៅលិចបណ្តាលអោយរថយន្តរងការខូចខាតរបកថ្នាំចំទ្វារខាងស្តាំ និងក្រពឹតក្បាលរថយន្តចំពីមុខតិចតួច រីឯរ៉ឺម៉កម៉ូតូកង់បីវិញរងការខូចខាតវៀចដំបូលម៉ូតូ ចំណែកអ្នកបើកបររ៉ឺម៉កម៉ូតូកង់បីបានរបួសចំជើងខាងឆ្វេង ។
ប្រភពដដែលបានបន្តថា ភ្លាមៗនោះដែរ បានបង្កអោយមានការកកស្ទះចរាចរណ៍ ទើបសមត្ថកិច្ចអោយរថយន្តអែបចូលខាងដើម្បីចរចាគ្នាអស់រយៈពេលជិត២ម៉ោង ដោយសារតែខាងអ្នកបើកបររ៉ឺម៉កម៉ូតូកង់បីគាត់គ្មានលុយសងនោះ ក៏បោះកាបូបលុយចេញមកក្រៅអោយសមត្ថកិច្ចឆែក រួចបានដេកនៅចិញ្ចើមផ្លូវរង់ចាំប្រពន្ធមកដោះស្រាយជំនួស ។
ក្រោយពេលកើតហេតុ ភាគីខាងម្ចាស់រថយន្តគាត់មិនចង់មានរឿងរ៉ាវច្រើនគ្រាន់តែអោយប្រពន្ធរបស់អ្នកបើកបររ៉ឺម៉កម៉ូតូកង់បីសុំទោស និងទទួលកំហុស រួចសងសំណងតិចតួចដើម្បីបញ្ចប់រឿងនៅនឹងកន្លែងកើតហេតុតែម្តង ៕
ចែករំលែកព័តមាននេះ