ខេត្តកណ្តាល ៖ ប្រភពព័ត៌មានបានឱ្យដឹងថា កាលពីម៉ោងប្រហែលជាង៧យប់ ថ្ងៃទី២៩ ខែមីនា ឆ្នាំ២០១៩ កម្លាំងសមត្ថកិច្ចប៉ុស្តិ៍នគរបាលរដ្ឋបាលគគីរធំ ល្បាតក្នុងមូលដ្ឋានបង្ក្រាបបានមុខសញ្ញាចែកចាយ ជួញដូរគ្រឿងញៀនដ៏សកម្មម្នាក់ និងដកហូតបានវត្ថុតាងនូវថ្នាំញៀន1កញ្ចប់តូច ព្រមទាំងមធ្យោបាយម៉ូតូ១គ្រឿង នៅចំណុចផ្លូវកំពង់ដ ស្ថិតក្នុងភូមិកោះតេជោ ឃុំគគីរធំ ស្រុកកៀនស្វាយ ខេត្តកណ្តាល នាំយកមកប៉ុស្តិ៍ដើម្បីធ្វើការសាកសួរ។
ប្រភពដដែលបន្តថា បន្ទាប់មកក៏បានបញ្ជូនជនសង្ស័យជាមុខសញ្ញារួមជាមួយវត្ថុតាងថ្នាំញៀន១កញ្ចប់តូចទៅកាន់អធិការដ្ឋានស្រុកភ្លាមៗទាំងយប់នៅថ្ងៃដដែល។ ពេលបញ្ជូនជនសង្ស័យទៅដល់អធិការស្រុកមិនទាន់បានមួយចំអិនកំពិសផង ស្រាប់តែនគរបាលស្រុកដោះលែងជនសង្ស័យជាមុខសញ្ញាជួញដូរថ្នាំញៀនដ៏សកម្មនោះមកវិញទាំងយប់។ ហើយបើតាមប្រភពនៃការដោះលែងជនសង្ស័យជាមុខសញ្ញាជួញដូរគ្រឿងញៀនម្នាក់នេះមកវិញ ដោយថ្នូរនឹងទឹកប្រាក់ចំនួន១៣០០ដុល្លារផងដែរ។
ប្រភពបានបញ្ជាក់បន្ថែមទៀតថា ជនសង្ស័យជាមុខសញ្ញាចែកចាយគ្រឿងញៀនដែលសមត្ថកិច្ចនគរបាលចាប់បញ្ជូនទៅដល់ស្រុកបានតែមួយចំអិនកំពិសដោះលែងមកវិញនោះ មានឈ្មោះ ស្រី រតនៈ (ហៅម៉ាប់) ភេទប្រុស អាយុ២៥ឆ្នាំ មានទីលំនៅភូមិកោះតេជោ ឃុំគគីរធំ ស្រុកកៀនស្វាយ ខេត្តកណ្តាល។
ពាក់ព័ន្ធបញ្ហាចោទប្រកាន់នេះដែរ ភ្នាក់ងារកោះសន្តិភាពយើងក៏បានព្យាយាមទៅសូមការបំភ្លឺពីលោកព្រុំ សំណាង អធិការនគរបាលស្រុកកៀនស្វាយច្រើនដង ទម្រាំបានបំភ្លឺថា ពិតជាបានដោះលែងមែន ដោយសារបងរបស់ជនសង្ស័យមកសុំធានាយកទៅដាក់មណ្ឌលកែប្រែ។ លោកបន្តថា អត់បានទាមទារប្រាក់ទេ។ ប៉ុន្តែឆ្ងល់ដែរ អ្នកស្រុកនិយាយតៗគ្នាថា អស់លុយ១៣០០ដុល្លារ ពិតជារឿងពិបាកយល់មែន។
ព័ត៌មានពិស្តារមានផ្សាយជូននៅលើកាសែតកោះសន្តិភាព
ចែករំលែកព័តមាននេះ