ខេត្តកំពង់ឆ្នាំង ៖ សំណុំរឿងលោកមេប៉ុស្តិ៍នគរបាលរដ្ឋបាល ឃុំជៀប និងកូន រួមទាំងមិត្តភក្តិ ព្រួតគ្នាវាយកាប់ និងចាក់ប៉ងសម្លាប់ទៅលើជនរងគ្រោះ កាលពីពេលកន្លងទៅថ្មីៗនេះនៅមិនទាន់ចប់នៅឡើយទេ ខណៈដែលកូនប្រុសរបស់មេប៉ុស្តិ៍…
ខេត្តកំពង់ឆ្នាំង ៖ សំណុំរឿងលោកមេប៉ុស្តិ៍នគរបាលរដ្ឋបាល ឃុំជៀប និងកូន រួមទាំងមិត្តភក្តិ ព្រួតគ្នាវាយកាប់ និងចាក់ប៉ងសម្លាប់ទៅលើជនរងគ្រោះ កាលពីពេលកន្លងទៅថ្មីៗនេះនៅមិនទាន់ចប់នៅឡើយទេ ខណៈដែលកូនប្រុសរបស់មេប៉ុស្តិ៍ និងមិត្តភក្តិម្នាក់ទៀតត្រូវបានតុលាការសម្រេចឃុំខ្លួនដាក់ពន្ធនាគាររួចហើយ កាលពីថ្ងៃសៅរ៍ចុងសប្តាហ៍កន្លងទៅនេះ ។
ចំណែកលោកមេប៉ុស្តិ៍រដ្ឋបាលឃុំជៀប ក៏កំពុងតែបញ្ឈរជើងនៅស្នងការដ្ឋាននគរបាលខេត្ត ដែរ ព្រោះសមត្ថកិច្ចកំពុងស្រាវជ្រាវយ៉ាងយកចិត្តទុកដាក់បំផុត ។ គេមិនដឹងថា វាសនាលោកមេប៉ុស្តិ៍រូបនោះអាចនឹងជាប់ពន្ធនាគារដូចកូនរបស់គាត់ដែរឬទេ ? បើទោះបីគាត់បានឆ្លើយបដិសេធថា គាត់មិនបានវាយទៅលើជនរងគ្រោះយ៉ាងណាក្តី ប៉ុន្តែតាមអង្គហេតុត្រូវបានគេនិយាយថា លោកមេប៉ុស្តិ៍អាចនឹងក្លាយជាសហការី ដែលនាំឲ្យមានអំពើហិង្សាបណ្ដាលឱ្យជនរងគ្រោះរងរបួសជាទម្ងន់ ។
កាលពីថ្ងៃសៅរ៍ចុងសប្ដាហ៍កន្លងទៅនេះភ្នាក់ងារយើងបានព្យាយាមទៅភូមិឃុំកន្លែងកើតហេតុ ដើម្បីរកសាក្សីបំភ្លឺក្នុងនោះយុវជនឈ្មោះ ឈួន កំសាន្ត ជាសាក្សីបាននិយាយថា នៅយប់នោះឈ្មោះ ស៊ិន វុទ្ធី ជាជនរងគ្រោះបានទៅសួរនាំលោក ជៀម វិចិត្រ មេប៉ុស្តិ៍ឃុំជៀបថា ខាងណាកាន់ដំបង ហើយក៏ត្រូវលោកមេប៉ុស្តិ៍រដ្ឋបាលឃុំជៀបស្ទុះយកកាំភ្លើងអាការមកបុកស្មាមុខខាងឆ្វេងជនរងគ្រោះ បណ្តាលអោយដួលទៅដី ភ្លាមនោះជនរងគ្រោះបានស្ទុះងើបឡើងរត់គេចខ្លួនទៅមួយសារ ។
ក្រោយមកមិនអស់ចិត្តជនរងគ្រោះបានត្រឡប់ទៅវិញ និងបានសួរទៅប្រជាការពារថា ម៉េចមិនជួយឃាត់ផង តែត្រូវប្រជាការពារថា មិនបានឃើញស្រាប់តែពេលនោះលោក ជៀម វិចិត្រ បានច្របាច់ពិលឃើញជនរងគ្រោះបានស្ទុះដេញចាប់មួយសារទៀត រួមជាមួយកូនប្រុស និងបក្សពួករត់ដេញតាមពីក្រោយផង ។ យុវជនឈ្មោះ សាក់ ស៊ីនិត ក៏បានបញ្ជាក់ថា រូបគេពិតជាបានឃើញលោកមេប៉ុស្តិ៍យកកាំភ្លើងអាការបុកស្មាជនរងគ្រោះ បណ្តាលអោយដួលមែន ។
ចំណែកឈ្មោះ ជួន វ៉ាន់ ក៏បានប្រាប់ថា ពេលជនរងគ្រោះរត់ទៅដល់ទីងងឹតស្រាប់តែឮផូសផោះជាសម្លេងវាយកាប់ចាក់ទៅលើជនរងគ្រោះគាត់បានស្រែកអោយគេជួយថា គេវាយអា វុទ្ឋីស្លាប់ហើយ បងប្អូនទៅជួយគ្នាផង ហើយក៏ឃើញឈ្មោះ វុទ្ឋី ច្រឡោតចេញពីទីងងឹត មានរបួសពេញខ្លួនទើបបងប្អូននាំគ្នាយកជនរងគ្រោះទៅសង្គ្រោះនៅមណ្ឌលសុខភាព និងបន្តទៅមន្ទីរពេទ្យខេត្ត ។
ដោយឡែកលោកទេព ម៉ៅ ជាឪពុកជនរងគ្រោះក៏សូមសំណូមពរដល់លោកស្នងការខេត្ត សូមមេត្តាជួយរកយុត្តិធម៌ជូនកូនគាត់ផង ។ ជុំវិញបញ្ហានេះលោកជៀម វិចិត្រ យើងមិនអាចសុំការបំភ្លឺបានទេ ប៉ុន្តែលោកប៉ុល វុទ្ឋី ស្នងការរងនគរបាលខេត្តបានប្រាប់ភ្នាក់ងារយើង កាលពីរសៀលថ្ងៃទី៣១ ខែមីនានេះថា ក្នុងចម្លើយរបស់លោក ជៀម វិចិត្រ នាយនគរបាលប៉ុស្តិ៍រដ្ឋបាលឃុំជៀបបានឆ្លើយថា គាត់មិនបានយកកាំភ្លើងវាយទៅលើជនរងគ្រោះទេ ។ នៅពេលកើតហេតុមានក្មេង២ក្រុមបានដេញវាយគ្នាគាត់បានចូលទៅឃាត់ ហើយក៏ត្រូវក្រុមក្មេងទាំងនោះរត់មកបុកគាត់ បណ្តាលអោយជ្រុះកាំភ្លើងពីដៃតែម្តង។
លោកស្នងការបានបញ្ជាក់ថា ក្នុងសំណុំរឿងនេះក្រោយការស្រាវជ្រាវតុលាការបានសម្រេចឃុំខ្លួនកូនប្រុសលោកមេប៉ុស្តិ៍ម្នាក់ និងមិត្តភក្តិកូនមេប៉ុស្តិ៍ម្នាក់ទៅ ។ ចំណែកលោកមេប៉ុស្តិ៍ កំពុងបញ្ឈរជើងនៅស្នងការដ្ឋាននៅឡើយ ព្រោះនៅស្រាវជ្រាវបន្តទៀត បើទោះបីពេលនេះលោកមេប៉ុស្តិ៍មានសាក្សីជាប្រជាការពារថាៈមិនបានវាយទៅលើជនរងគ្រោះក្តី តែលោកមេប៉ុស្តិ៍អាចជាសហការី ដែលនាំអោយមានហិង្សានេះកើតឡើង ហើយបើរកមិនឃើញទេ គាត់នឹងត្រូវអោយវិលត្រឡប់ទៅធ្វើការវិញ ប៉ុន្តែបើគាត់ពិតជាបានពាក់ព័ន្ធក្នុងរឿងនេះគាត់អាចនឹងត្រូវមានទោសជាមិនខាន ។
សូមរំលឹកថា នៅយប់ថ្ងៃទី២៣ ខែមីនាឆ្នាំ២០១៩ នៅក្នុងភូមិគោកពេញ ឃុំជៀប ស្រុកទឹកផុសមាន ពិធីបុណ្យបច្ច័យបួន ដោយមានការសម្ដែងល្ខោន និងរាំវង់ធុងបាស់ផងដែរ ។ នៅយប់នោះមានក្មេង២ក្រុមបានបង្កហឹង្សាដាក់គ្នា គឺក្រុមជនរងគ្រោះនៅភូមិទ័ព្ទតាឡាត់ និងក្រុមកូនលោកមេប៉ុស្តិ៍នៅភូមិគោកពេញ ៕
ចែករំលែកព័តមាននេះ