ខេត្តកំពង់ឆ្នាំង ៖ គ្រោងខ្លោងទ្វារនិមិត្តសញ្ញាឆ្នាំង ដែលគេធ្វើឡើងសំរាប់អបអរសាទរក្នុងពិធីបុណ្យទន្លេ បានបាក់មួយផ្ទាំងទៀតហើយ បន្ទាប់ពីមានខ្យល់និងភ្លៀង ហើយបណ្ដាលឲ្យរថយន្តមួយគ្រឿងរងការខូចខាតបែកកញ្ចក់ ។ ហេតុការណ៍នេះដែលបានកើតឡើងនៅវេលាម៉ោង២និង ១០នាទីរសៀលថ្ងៃទី៣១ ខែមិនា នៅតាមផ្លូវ ពីផ្សារលើទៅផ្សារក្រោម ស្ថិតនៅក្នុងភូមិផ្សារលើ សង្កាត់កំពង់ឆ្នាំង ក្រុងកំពង់ឆ្នាំង ។
លោក ឆាយ ខេមរ័ត្ន អធិការនគរបាលក្រុងកំពង់ឆ្នាំង ដែលបានដឹកនាំកម្លាំងចុះរុះរើ គ្រោងខ្លោងទ្វារនិមិត្តសញ្ញាឆ្នាំងនៅកន្លែងកើតហេតុខាងលើ បានឲ្យដឹងថា នៅមុនពេលកើតហេតុ មិនសូវជាមានភ្លៀងនិងខ្យល់ខ្លាំងប៉ុន្មានទេ ប៉ុន្តែខ្យល់បានបោកបក់ចំគ្រោងខ្លោងទ្វារដែលកាត់ទទឹងផ្លូវចុះពីផ្សារលើទៅផ្សារក្រោម បណ្តាលឲ្យរលំរាបដល់ដីតែម្ដង ។
ក្នុងហេតុការណ៍នោះគ្រោងខ្លោងទ្វារនិមិត្តសញ្ញាឆ្នាំងបានបាក់បណ្តាលឱ្យសង្កត់លើរថយន្តមួយគ្រឿង ពណ៌ស ពាក់ស្លាកលេខ ០I- ៧០៨៨ បណ្តាលឱ្យបែកកញ្ចក់ និងក្រពឹតផ្នែកខាងមុខ ជាមួយគ្នានោះក៏មានមនុស្សម្នាក់រងរបួសស្រាលផងដែរ ។
លោកអធិការនគរបាលបានបញ្ជាក់ថា គ្រោងខ្លោងទ្វារនិមិត្តសញ្ញាឆ្នាំងបានសង្កត់ជាប់លើរថយន្តទៅមុខមិនរួច ហើយក៏បានប្រជាពលរដ្ឋជួយលើកដើម្បីយករថយន្តនោះចេញ ។ បន្ទាប់មក លោកបានដឹកនាំកម្លាំងរុះរើគ្រោងខ្លោងទ្វារនោះចេញ ដោយប្រើម៉ូទ័រឆាបកាត់ផ្តាច់ជាកង់ៗ ដើម្បីយកចេញ និងសម្រួលចរាចរឡើងវិញ ហើយគ្រោងឆ្អឹងគ្រោងខ្លោងទ្វារទាំងនេះនឹងត្រូវយកទៅទុកអោយរដ្ឋបាលសាលាខេត្តចាត់ការបន្ត។
ដោយឡែក សាក្សីនៅកន្លែងកើតហេតុបាននិយាយឲ្យដឹងថា គ្រោងខ្លោងទ្វារនៅកន្លែងកើតហេតុ មានសភាពល្អធម្មតាមទេ ប៉ុន្តែកាលពីថ្ងៃទី៣០ ខែមីនា គឺឃើញមានក្រុមជាងភ្លើងឡើងទៅដោះភ្លើងចេញ បណ្ដាលឱ្យទន់វេចគ្រោងខ្លោងទ្វារនោះ និងគ្មានភាពរឹងមាំនោះទេ ទើបធ្វើអោយខ្យល់បោកបណ្តាលឱ្យបាក់សង្កត់លើរថយន្ត ដែលកំពុងធ្វើពីដំណើរបែបនេះតែម្តង ។
សូមបញ្ជាក់ថា នេះជាគ្រោងខ្លោងទ្វារនិមិត្តសញ្ញាឆ្នាំងលើកទី២ហើយដែលបានបាក់រលំរាបដល់ដីបែបនេះហើយបណ្តាលឱ្យសង្កត់ពីលើរថយន្តមួយគ្រឿងរងការខូចខាត ដោយលើកទីមួយគឺបានកើតឡើងនៅផ្លូវជាតិលេខ៥ ត្រង់ចំណុចទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ដែលបង្កឡើងដោយរថយន្តមួយគ្រឿងបុក សំណាងល្អហើយ តែបើប៉ះចំម៉ូតូ ឬអ្នកថ្មើរជើងវិញអាចនឹងមានអ្នករងរបួសធ្ងន់ និងស្រាលច្រើនជាងនេះ៕
ចែករំលែកព័តមាននេះ