រាជធានីភ្នំពេញ ៖ ស្របពេលពិភពលោកបានផ្លាស់ប្តូរអាកាសធាតុ ដែលធ្វើឲ្យកំដៅក្នុងបរិយាកាសកើនឡើងមិនឈប់ ជាក់ស្តែងនៅប្រទេសកម្ពុជា ក៏កំពុងប្រឈមមុខនឹងអាកាសធាតុក្តៅខ្លាំង ហើយកម្តៅអាចហក់ឡើងដល់ ៤២ អង្សាសេ ជាខែមេសា…
រាជធានីភ្នំពេញ ៖ ស្របពេលពិភពលោកបានផ្លាស់ប្តូរអាកាសធាតុ ដែលធ្វើឲ្យកំដៅក្នុងបរិយាកាសកើនឡើងមិនឈប់ ជាក់ស្តែងនៅប្រទេសកម្ពុជា ក៏កំពុងប្រឈមមុខនឹងអាកាសធាតុក្តៅខ្លាំង ហើយកម្តៅអាចហក់ឡើងដល់ ៤២ អង្សាសេ ជាខែមេសា និងឧសភា ខាងមុខនេះ ការសាងសង់លំនៅដ្ឋានសំរាប់រស់នៅក៏ត្រូវមានការផ្លាស់ប្តូរដើម្បីកាត់បន្ថយកំដៅក្នុងគេហដ្ឋាន និងទទួលបានបរិយាកាសក្នុងលំនៅដ្ឋានកាន់តែមានផាសុខភាពក្នុងការរស់នៅ។
ចំណោទមួយដែលត្រូវចោទសួរនោះ គឺថា អាកាសធាតុក្តៅ តើត្រូវសាងសង់ផ្ទះបែបណា ដើម្បីកាត់បន្ថយកម្តៅក្នុងគេហដ្ឋាន ? លោកសាស្ត្រាចារ្យ ទួស សាភឿន អគ្គលេខាធិការរងនៃគណស្ថាបត្យករកម្ពុជា និងជាស្ថាបត្យករកម្រិតអាស៊ាន បានមានប្រសាសន៍ឲ្យដឹង ថា ការសាងសង់លំនៅដ្ឋាន ពិសេសបុរី ឬសំណង់ផ្ទះល្វែង អ្នកដើរតួសំខាន់ជាងគេដំបូងគឺអ្នករៀបចំប្លង់មេ (Master Plan) របស់គម្រោងតែម្តង ព្រោះគម្រោងមួយងាប់ ឬ រស់គឺអ្នករៀបចំ Master Plan នេះហើយ ដែលជាអ្នកកំណត់បរិយាកាសក្នុងតំបន់ ឬលំនៅដ្ឋានថាមានផាសុខភាព ឬអត់ ។ លោកបន្តថា ដូចគ្នានឹងការសាងសង់សណ្ឋាគារដែរ ក្រសួងទេសចរណ៍បានចេញសេចក្តីណែនាំទាក់ទងនិយាមកំណត់ការសាងសង់ ដោយជំរុញឲ្យមានការដាំដើមឈើ និងមានគំលាតអាគារពីមួយទៅមួយតាមស្តង់ដាបច្ចេកទេសផងដែរ។
លោកសាស្ត្រាចារ្យ ទួស សាភឿន មានប្រសាសន៍បន្តថា «ដើម្បីឲ្យលំនៅដ្ឋានមានផាសុខភាព និងផ្តល់បរិយាកាសរស់នៅមានភាពមនោរម្យ ម្ចាស់បុរីត្រូវទុក ១៥ ទៅ៣០ភាគរយនៃបរិវេណបុរី សំរាប់ដាំដើមឈើ និងគម្លាតពីលំនៅដ្ឋាន១ ទៅ១ តាមស្តង់ដាបច្ចេកទេស។ ដូច្នេះ ស្ថាបត្យករ និងអ្នកឌីហ្សាញមួយចំនួន តែងតែក្បត់សម្តីគ្រូ ឬ មិនធ្វើតាមការណែនាំរបស់ក្រសួងឡើយ » ។ លោកសាស្ត្រាចារ្យ បន្តថា អ្នកសាងសង់លំនៅដ្ឋានឯកជន គួរទុកដីទនេរនៅមុខផ្ទះចន្លោះ ៦ទៅ ៨ម៉ែត្រ សល់ក្រោយផ្ទះនិងចំហៀងផ្ទះឲ្យបានពី២ ទៅ៣ម៉ែត្រ មានដាំដើមឈើក្នុងបរិវេណផ្ទះ ។
អគ្គលេខាធិការរងនៃគណស្ថាបត្យករកម្ពុជា និងជាស្ថាបត្យករកម្រិតអាស៊ានរូបនេះ បានប្រាប់ពីគន្លឹះសំខាន់ៗមួយចំនួនទៀតថា «ផ្ទះនិមួយៗ ពិសេសផ្ទះវីឡា គួរមានអាងទឹកនៅខាងមុខ ឬចំហៀងផ្ទះ និងត្រូវមានបំពង់ពន្លឺ ដែលអាចជួយកាត់បន្ថយការប្រើប្រាស់ថាមពលអគ្គិសនី និងធ្វើឲ្យមានខ្យល់ចូលក្នុងបរិវេណផ្ទះបានល្អ» ។ លោកបានលើកជាឧទាហរណ៍ជាក់ស្តែងថា លោកវីរស្ថាបត្យករវណ្ណ ម៉ូលីវណ្ណ នៅពេលសាងសង់ពហុកីឡាដ្ឋានអូរឡាំពិក លោកបានសាងសង់ឲ្យមានអាងទឹកព័ទ្ឋជុំវិញស្តាតនេះ ទើបបរិយាកាសក្នុងពហុកីឡាដ្ឋាននេះមានភាពត្រជាក់។ វាប្រៀបដីដូចជាសម្លក្តៅ នៅពេលយើងយកស្លាបព្រាទៅដួស ហើយផ្លុំ ដែលធ្វើឲ្យសម្លត្រជាក់អាចញុំាបាន ដូចគ្នានឹងការសាងសង់អាងទឹកជុំវិញផ្ទះ ពេលខ្យល់បក់មកប៉ះនឹងទឹក ធ្វើឲ្យខ្យល់ត្រជាក់ហើយនៅពេលបក់ចូលក្នុងផ្ទះ ធ្វើឲ្យបរិយាកាសក្នុងផ្ទះមានភាពត្រជាក់មនោរម្យ ។
យ៉ាងណាមិញ អតិថិជនភាគច្រើនបានបញ្ជាក់ថាសំណង់ផ្ទះល្វែងនៅភ្នំពេញមួយចំនួន គឺមានបរិយាកាសក្តៅខ្លាំង ដោយសារតែពុំមានលំហរ (space) គ្រប់គ្រាន់សម្រាប់ការដាំដើមឈើ ឬធ្វើជាសួនច្បារឡើយ ដូច្នេះហើយទើបពេលដាច់ភ្លើងម្តងៗ ជាពិសេសរយៈប្រហែល១ ខែនេះ គឺប្រជាពលរដ្ឋជីវភាពមធ្យមរស់នៅផ្ទះល្វែងកណ្តាលៗ ដែលមិនមានជាផ្ទះកែង នោះតែងមានបញ្ហាបរិយាកាសក្នុងផ្ទះក្តៅស្អុះស្អាបខ្លាំង ។ យោងតាមរបាយការណ៍របស់ក្រសួងដែនដី នគររូបនីយកម្ម និងសំណង់ប្រចាំខែមករា ឆ្នាំ ២០១៩ បានឲ្យដឹងថា សំណង់លំនៅឋានមានចំនួនសរុប ២៨២ គម្រោង មានផ្ទៃក្រឡាសរុបចំនួនប្រមាណជាង ១,៨៨៤ ម៉ែត្រការ៉េ និងមានទុនវិនិយោគ ៧១៣,៨ លានដុល្លារអាមេរិក ខណៈបណ្តុំលំនៅឋានមានលក្ខណៈបុរីនៅរាជធានីភ្នំពេញក្នុងខែមករានេះ មានចំនួន ៦ ទីតាំង ៕
ចែករំលែកព័តមាននេះ