ខេត្តកំពង់ស្ពឺ ៖ មន្ត្រីកងរាជអាវុធត្ថមួយរូបបានរងនូវការរិះគន់ថា អាងអំណាចខ្លួនជាមេបញ្ជាការរងស្រុកបានចាក់ដីលុបអូរដែលជាចរន្តទឹកហូរ ដើម្បីប្រជាពលរដ្ឋប្រើប្រាស់យកមកធ្វើជាកម្មសិទ្ធិរបស់ខ្លួនដោយគ្មានការខ្លាចរអាច្បាប់បន្តិចណាសោះ។ រហូតមកដល់ពេលនេះ ការចាក់ដីលុបអូរនៅតែបន្តចាក់រហូតបានប្រមាណជា១០០ម៉ែត្រហើយ បើទោះជាប្រធានគណៈបញ្ជាការឯកភាពស្រុក បានឱ្យជំនាញធនធានទឹកសាធារណការ និងលោកមេឃុំ ព្រមទាំងស្នៀនចុះទៅធ្វើកំណត់ហេតុផ្អាកការចាក់ដីនេះក៏ដោយ។
អូរដែលគេចាក់ដីលុបនេះ អ្នកភូមិហៅថាអូរព្រៃដើមលៀប ចំណុចគីឡូម៉ែត្រ៥៨ ផ្លូវជាតិលេខ៤ ស្ថិតក្នុងភូមិព្រៃស្តុក ឃុំមហាសាំង ស្រុកភ្នំស្រួច ខេត្តកំពង់ស្ពឺ ។ ចំណែកម្ចាស់គ្រឿងចក្រដែលចាក់ដីលុបអូរនេះ ត្រូវបានដឹងថា ជាមេបញ្ជាការរងកងរាជអាវុធហត្ថស្រុកភ្នំស្រួច ខេត្តកំពង់ស្ពឺ ឈ្មោះ ម៉ែន ភីរីណា។
បើតាមស្មៀនឃុំមហាសាំងលោកស៊ិន សាវឿន បានរៀបរាប់នៅរសៀលង្ងៃទី២៩ មីនា ២០១៩នេះថា កាលពីថ្ងៃទី១២ មីនា លោកមេឃុំ ព្រមទាំងជំនាញធនធានទឹក និងសាធារណការ ក្រោមការបញ្ជាពីប្រធានគណៈបញ្ជាការឯកភាពស្រុកបានចុះទៅពិនិត្យការចាក់ដីលុបអូរនៅចំណុចខាងលើ ។ ពេលនោះក្រុមការងាររកឃើញថា ការចាក់ដីនេះ គឺពុំមានច្បាប់អនុញ្ញាតិនោះទេ ខាងជំនាញបានធ្វើការពន្យល់ណែនាំដល់ម្ចាស់ដីសុំឱ្យផ្អាកការចាក់ដីនេះ រង់ចាំមានការអនុញ្ញាតិទើបចាក់បាន។
ក្នុងនាមលោកជាស្មៀនក៏បានកត់ត្រាតាមក្រុមការងារ ដើម្បីឱ្យម្ចាស់ផ្អាកការចាក់ដីនេះ ពេលនោះឈ្មោះរីណា ក៏សន្យាថានឹងឈប់ចាក់ ហើយលោកក៏ធ្វើរបាយការណ៍បញ្ជូនទៅស្រុកដើម្បីជ្រាប និងសុំមតិយោបល់។
តែទោះជាមានការឱ្យផ្អាកក្តី ក៏រហូតមកដល់ពេលនេះថ្ងៃទី២៩ មីនាទៅហើយ ម្ចាស់ដីនៅតែបន្តចាក់ដីលុបអូរដដែល ដោយគ្មានខ្លាចរអាខាងឃុំបន្តិចណាឡើយ។
ព័ត៌មានពិស្តារមានផ្សាយជូននៅកាសែតកោះសន្តិភាព
ចែករំលែកព័តមាននេះ