ប្រទេសថៃ៖ ភ្នាក់ងារសារពត៌មាន Bangkok Post បានឲ្យដឹងកាលពីថ្ងៃទី២៨ មីនា កន្លងមកថា ក្រុមប្រឹក្សាអភិវឌ្ឍន៍ពាណិជ្ជកម្មហុងកុង (HKTDC) គិតថាប្រទេសថៃគឺជាស្ពានឆ្លងចូលអាស៊ាន ហើយកំពុងតែជំរុញកម្មវិធីជាច្រើនដើម្បីបង្កើនការវិនិយោគលើឧស្សាហកម្ម និងក្រុមហ៊ុនបង្កើតថ្មីក្នុងប្រទេសថៃ។
លោក Sunny Chau ដែលជាប្រធាន HKTDC សម្រាប់ប្រទេសថៃនិងអាស៊ីអាគ្នេយ៍បាននិយាយថា វិនិយោគិនហុងកុងវិនិយោគប្រមាណ ១៥.៦ប៊ីលានដុល្លារកាលពីឆ្នាំ ២០១៧ ដែលមួយចំណែកត្រូវបានវេរពីប្រទេសដទៃទៀត និងមានការផ្តោតសំខាន់លើវិស័យផលិតកម្មនិងការដឹកជញ្ជូន។
លោក Chau បាននិយាយថា «ពួកយើងបានប្តូរទីតាំងការិយាល័យធំក្នុងតំបន់របស់យើងមកកាន់ប្រទេសថៃកាលពីឆ្នាំ ២០០៦ ហើយតាំងពីពេលនោះមកការធ្វើពាណិជ្ជកម្មរបស់ពួកយើងបានកើនឡើង ៣.៦ដងបើទោះជាមានឧបសគ្គច្រើនពិតមែនក្តី»។
ក្នុងពេលថ្មីៗនេះ ហុងកុងបានបើកការិយាល័យសេដ្ឋកិច្ចនិងពាណិជ្ជកម្មថ្មីមួយក្នុង Sathorn Square ក្នុងទីក្រុងបាងកកដើម្បីពង្រឹងទំនាក់ទំនងជាមួយនឹងប្រទេសថៃ។
ក្នុងនាមជាវិនិយោគិនដ៏សកម្មមួយរបស់ប្រទេសថៃ ហុងកុងកំពុងតែចាប់ដៃគូជាមួយនឹងកម្មវិធីវិនិយោគថៃជាច្រើនដែលរួមមាន InnoSpace Thailand, Thai Access to International Markets និង SME Idolជាដើម។
InnoSpace គឺជាក្រុមហ៊ុនសហការរវាងវិស័យសាធារណៈនិងឯកជនដែលផ្តល់ថវិកាសម្រាប់ក្រុមហ៊ុនបច្ចេកវិទ្យាថ្មីៗក្នុងប្រទេសថៃ។ កម្មវិធីនេះយកគំរូតាមកម្មវិធីCyberport របស់ហុងកុងបន្ទាប់ពីលោកឧប្បនាយករដ្ឋមន្ត្រី Somkid Jatusripitak ធ្វើទស្សនៈកិច្ចទៅកាន់ហុងកុង និងបាននាំយកគំនិតនេះមកកាន់ប្រទេសថៃវិញ។
Cyberport បានសម្របសម្រួលក្រុមហ៊ុនបង្កើតថ្មីធំៗពីរក្នុងហុងកុង និងជួយដល់ក្រុមហ៊ុនបង្កើតថ្មីដែលសរុបមានតម្លៃច្រើនជាង១ប៊ីលានដុល្លារទៅទៀត។
លោក Chau មិនគិតថាលទ្ធផលការបោះឆ្នោតអាចប៉ះពាល់ដល់គម្រោងវិនិយោគរវាងប្រទេសថៃនិងហុងកុងឡើយ និងបានកត់សម្គាល់ថាមានការវិនិយោគជាច្រើនពីវិស័យឯកជន។
លោកបានបន្ថែមថា «ទាក់ទិននឹងការនាំក្រុមហ៊ុនថៃទៅហុងកុង ពួកយើងមើលឃើញមានការលូតលាស់ច្រើនជាងគេក្នុងវិស័យអាហារ។ ពួកយើងបាននាំក្រុមហ៊ុនថៃចំនួន ៤៣ក្រុមហ៊ុនទៅកាន់ហុងកុង ដែលច្រើនជាងឆ្នាំ ២០១៧ដល់ទៅ ៥៣%»៕
ចែករំលែកព័តមាននេះ