រាជធានីភ្នំពេញ ៖ បុរសម្នាក់ជាអ្នកជិតខាងគ្នាធ្លាប់មានទំនាស់ជាមួយចាស់ទុំយូរមកហើយស្រាប់តែឃើញក្មេងប្រុសអាយុ៦ឆ្នាំដើរកាត់មុខផ្ទះ ស្រាប់តែធាក់មួយជើងចំចង្កេះក្មេងខាងក្រោយ បណ្តាលឱ្យរងរបួសស្រាល បង្កឲ្យមានការឈ្លោះប្រកែកគ្នាផ្អើលពេញផ្លូវត្រូវសមត្ថកិច្ចឃាត់ខ្លួនយកទៅសួរនាំកាលពីម៉ោង9យប់ ថ្ងៃទី២៨ ខែមីនា ឆ្នាំ២០១៩ តាមបណ្តោយផ្លូវ៨០ នៅចំណុចម្តុំផែថ្ម ស្ថិតក្នុងភូមិ១៤ សង្កាត់ស្រះចក ខណ្ឌដូនពេញ ។
ក្មេងរងគ្រោះខាងលើឈ្មោះជា គឹមឆ័ង ភេទប្រុស អាយុ6ឆ្នាំ រីឯឪពុកក្មេងរងគ្រោះឈ្មោះជា ហេង អាយុ៣៥ឆ្នាំ ស្នាក់នៅផ្ទះលេខ៧២ ផ្លូវ១១០ សង្កាត់ផ្សារកណ្តាល១ ខណ្ឌដូនពេញ និងភាគីម្ខាងទៀតដែលជាអ្នកបង្កមានឈ្មោះ ចាន់ សុជឿន ភេទប្រុស អាយុ៣៣ឆ្នាំ មុខរបរអ្នកបើករថយន្ត ស្នាក់នៅផ្ទះ23Eo ផ្លូវ៨០ ភូមិ១៤ សង្កាត់ស្រះចក ខណ្ឌដូនពេញ។
តាមប្រភពពីឪពុកក្មេងរងគ្រោះនិយាយថា មុនកើតហេតុ គាត់បានប្រើកូនប្រុសរបស់គាត់ឱ្យយកផ្លែទាបយកទៅឱ្យលោកយាយដែលនៅជាប់ផ្ទះជនបង្កនោះ លុះកូនដើរត្រឡប់មកផ្ទះវិញ គាត់ជាឪពុកឆ្ងល់ថា ហេតុអីបានជាកូនគាត់យកដៃកាន់ខ្នងពីក្រោយ ទើបគាត់សួរហើយសួរទៀតកូនប្រុសព្រមនិយាយប្រាប់ថា មានពូម្នាក់វ៉ៃ ប៉ុន្តែរបួសស្រាល ។ ភ្លាមៗនោះ រូបគាត់ និងប្រពន្ធដើរទៅសួរនាំភាគីបង្ក ប៉ុន្តែភាគីបង្កចេញមកមួយគ្រួសារស្រែកឡូឡាជេរគេជេរឯងឡើងផ្អើលអ្នកភូមិ ហើយយកទឹកមកជះខាងផ្ទះរងគ្រោះទៀត ។ ភ្លាមៗនោះ សមត្ថកិច្ចប៉ុស្តិ៍ស្រះចកចូលទៅហាមឃាត់កុំឱ្យមានអំពើហិង្សាកើតឡើង ដោយយកភាគីទាំងសងខាងយកទៅប៉ុស្តិ៍ដើម្បីធ្វើការដោះស្រាយ ។
ប្រជាពលរដ្ឋរស់នៅម្តុំនោះនិយាយថា គ្រួសារបង្កនេះដើររករឿង និងកាងណាស់ ពីណាដែលឈ្លោះជាមួយគឺនាំគ្នាមួយគ្រួសារចេញមកឈ្លោះ ហើយមិនដែលលើកហេតុផលយកមកនិយាយនោះទេ ។ ប្រភពពីកន្លែងកើតហេតុឲ្យដឹងថា ភាគីបង្ក និងផ្ទះជីដូនរបស់ក្មេងរងគ្រោះធ្លាប់មានទំនាស់ជាមួយគ្នារហូតឡើងដល់តុលាការទៀតផង ។
បើតាមភាគីបង្កនិយាយថា ខ្លួនអាយុធំប៉ុននេះហើយ មិនដែលហ៊ានលើកដៃវ៉ៃក្មេងនោះទេ ទោះជាខឹងខ្លាំងប៉ុនណាក៏បានត្រឹមតែដេញឱ្យចេញតែប៉ុណ្ណោះ មិនបានវាយទៅលើក្មេងជាជនរងគ្រោះនោះទេ ។
ក្រោយពេលកើតហេតុ សមត្ថកិច្ចបានជួយសម្របសម្រួលឱ្យភាគីទាំងសងខាងត្រឡប់ទៅផ្ទះរៀងៗខ្លួន ចាំខាងឪពុកក្មេងរងគ្រោះគាត់រកសាក្សីបានចាំមកដាក់ពាក្យបណ្តឹងតាមក្រោយទៀត ៕
ចែករំលែកព័តមាននេះ