ខេត្តព្រៃវែង ៖ លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងប្រាប់ឱ្យដឹងកាលពីព្រឹកថ្ងៃទី២៧ មីនា ថា បន្ទាប់ពីបើកការស៊ើបអង្កេតស្រាវជ្រាវយ៉ាងក្តៅគគុករយៈពេលប៉ុន្មានថ្ងៃនេះ សមត្ថកិច្ចបានឃាត់ខ្លួន និងបញ្ជូនជនសង្ស័យចំនួន៥នាក់ដែលជាប់ពាក់ពន្ធ័ក្នុងករណីផ្ទុះអាវុធ បណ្តាលឱ្យបុរសម្នាក់ស្លាប់កាលពីម៉ោង១១នាទីយប់ថ្ងៃទី២៣ មីនា នៅចំណុចភូមិគោកសណ្ដែក ឃុំរក្សជ័យ ស្រុកបាភ្នំ ខេត្តព្រៃវែង ទៅកាន់អយ្យការអមសាលាដំបូងខេត្តព្រៃវែងហើយ នៅព្រឹកថ្ងៃទី២៧ មីនានេះ។
ចំពោះដើមចមដែលបណ្តាលអោយកើតមានរឿងហេតុរហូតឈានដល់ការផ្ទុះអាវុធបណ្តាលអោយមានមនុស្សស្លាប់ម្នាក់នេះ ត្រូវបានសមត្ថកិច្ចបញ្ជាក់ថា តាមពិតជនរងគ្រោះឈ្មោះ យ៉ន រ៉ាវុធ គឺជាម្ចាស់រថយន្តមួយគ្រឿងម៉ាកព្រូស ប៉ុន្តែជនរងគ្រោះបានយករថយន្តនោះទៅដាក់បញ្ចាំ ក្រោយមកក៏បានខ្ចីប្រាក់៣០០០ដុល្លារពីឈ្មោះ សេង ឈិន យកទៅលស់រថយន្តរបស់ខ្លួនមកវិញ ហើយក៏ព្រមព្រៀងគ្នាជាមួយឈ្មោះ សេង ឈិន ដោយយករថយន្តម៉ាកព្រូសនេះជួលអោយជនជាតិចិនបានរយៈពេល៣ខែ ដោយក្នុង១ខែទទួលបានប្រាក់ចំនួន៤៥០ដុល្លារ ហើយចែកជា២ បានម្នាក់២២៥ដុល្លារ។
ប្រភពដដែលបានបន្តថា លុះដល់ថ្ងៃកើតហេតុ ដោយសាររថយន្តនោះខូច និងដោយមានការខ្វែងគំនិតគ្នា បន្ទាប់មកជនរងគ្រោះបានយករថយន្តនោះទៅជួសជុល ហើយជនរងគ្រោះបើករថយន្តមកផ្ទះនៅស្រុកបាភ្នំ ដោយមិនបានប្រាប់ឈ្មោះ សេង ឈិន នោះទេ ទើបឈ្មោះ សេង ឈិន ស្រាវជ្រាវរករថយន្តតាមរយៈប្រព័ន្ធ GPS និងបានពឹងពាក់អោយបក្ខពួកខ្លួនជួយប្តឹងសមត្ថកិច្ច ដោយចោទថា ចោរលួចរថយន្តតែម្តង។
ប្រភពដដែលបានបន្តអោយដឹងទៀតថា នៅក្នុងប្រតិបត្តិការណ៍បង្ក្រាបជនសង្ស័យលួចរថយន្តខាងលើ តាមរយៈការប្តឹងរបស់ជនខាងលើ សមត្ថកិច្ចបានផ្ទុះអាវុធចំនួន១០គ្រាប់ គឺបាញ់ដោយឈ្មោះ ជឹម រតនៈ នាយផ្នែកអន្តោប្រវេសន៍ ស្រុកព្រះស្តេច និងឈ្មោះ ជឹម វិន ជាមន្ត្រីប៉ុស្តិ៍កំពង់សឹង្ហ ក្នុងនោះគ្រាប់កាំភ្លើង៥គ្រាប់ បានត្រូវចំជនរងគ្រោះ យ៉ន រ៉ាវុធ ដែលកំពុងបើករថយន្ត បណ្តាលអោយស្លាប់។
ដោយយោងតាមអង្គហេតុខាងលើនេះ សមត្ថកិច្ចបានចាត់វិធានការតាមនីតិវិធី ដោយបានបញ្ជូនឈ្មោះ ជឹម រតនៈ និងឈ្មោះ ជឹម វិន ជាអ្នកបាញ់ទៅតុលាការដោយជាប់ចោទពីបទ ផ្ទុះអាវុធ បណ្តាលអោយស្លាប់មនុស្ស និងក្រុមអ្នកប្តឹងចំនួន៣នាក់ គឺ១-ឈ្មោះ សេង ឈិន ២-ឈ្មោះផាន់ សុឌី និង៣-ឈ្មោះភាព ផានី ទៅតុលាការ ដោយជាប់ចោទពីបទផ្តល់សក្ខីកម្ម មិនពិត។
ដោយឡែកមេប៉ុស្តិ៍កំពង់សឹង្ហលោក ជា ឡាឌីន ដែលដឹកនាំកម្លាំងដោយអត្តនោម័តិ ត្រូវពិន័យដោយដកតំណែងជាមេប៉ុស្តិ៍ និងលុបឈ្មោះចេញពីក្របខណ្ឌនគរបាលជាតិនិងស្ថិតនៅក្រោមការស្រាវជ្រាវបន្ត។ រីឯមនុស្សចំនួន៤នាក់ ដែលរួមមាន អ្នករួមដំណើរជាមួយជនរងគ្រោះឈ្មោះ វ៉ាន់ ខេមរិន្ទ, អ្នកបើកបររថយន្តអោយជនដែលផ្ទុះអាវុធ និងមនុស្សចំនួន២នាក់ដែលរួមដំណើរជាមួយអ្នកដើមបណ្តឹង ត្រូវបានសមត្ថកិច្ចដោះលែង តែធ្វើកិច្ចសន្យាអោយត្រឡប់មកធ្វើជាសាក្សីវិញ ពេលណាដែលសមត្ថកិច្ចត្រូវការ។
គួរបញ្ជាក់ផងដែរថា រហូតមកដល់ម៉ោង៥ល្ងាចថ្ងៃទី២៧ មីនានេះ អយ្យការអមសាលាដំបូងខេត្តព្រៃវែង នៅមិនទាន់បានបញ្ចប់ការសាកសួរជនសង្ស័យទាំង៥នាក់នោះទេ៕
គួររំលឹកថា ដេញស្ទាក់រថយន្តបាញ់៥គ្រាប់ ស្លាប់ម្នាក់ អ្នកបាញ់កំពុងភ្នែក.សហើយពេលនេះ
ចែករំលែកព័តមាននេះ