រាជធានីភ្នំពេញ ៖ ឯកអគ្គរដ្ឋទូតតែងតាំងថ្មីនៃសាធារណរដ្ឋអ៊ីស្លង់បានអះអាងថា ប្រមុខដឹកនាំអ៊ីស្លង់អាចនឹងបង្កើតអគ្គកុងស៊ុលកិត្តិយសនៅរាជធានីភ្នំពេញ ដើម្បីសម្របសម្រួលទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ ។ ការចង់បង្កើតអគ្គកុងស៊ុលនេះ ធ្វើឡើងខណៈដែលលោក Gunnar Snorri Gunnarsson ឯកអគ្គរដ្ឋទូតតែងតាំងថ្មីនៃសាធារណរដ្ឋអ៊ីស្លង់ចូលជូនសារតាំង និងសម្តែងការគួរសមសម្តេចវិបុល សេនា ភក្តីសាយ ឈុំ ប្រមុខរដ្ឋស្តីទី នាព្រឹកថ្ងៃទី២៧ ខែមីនា នៅវិមានព្រឹទ្ធសភា ។
លោកទូតក៏បានសម្តែងនូវសេចក្តីសោមនស្សរីករាយ និងវាយតម្លៃខ្ពស់ចំពោះការរីកចម្រើនរបស់ប្រទេសកម្ពុជា ។ លោកមានសេចក្តីសង្ឃឹមយ៉ាងមុតមាំថា តាមរយៈបេសកកម្មការទូតរបស់លោកនឹងពូនជ្រុំទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរអ៊ីស្លង់ – កម្ពុជា ឱ្យកាន់តែរីកចម្រើនថែមទៀត ។ ជាមួយគ្នានោះដែរ លោកទូតបានគូសបញ្ជាក់ឲ្យដឹងថា ប្រទេសកម្ពុជា គឺជាគោលដៅទេសចរណ៍របស់ប្រជាជនអ៊ីស្លង់ ហើយនាពេលអនាគត លោកសង្ឃឹមថា នឹងមានអ្នកទេសចរអ៊ីស្លង់មកកាន់ប្រទេសកម្ពុជាកាន់តែច្រើនថែមទៀត ។ ប្រទេសអ៊ីស្លង់ គឺជាប្រទេសតូចដែលមិនមានស្ថានតំណាងប្រចាំប្រទេសច្រើនទេ ។ ហេតុដូចនេះប្រទេសអ៊ីស្លង់មានសំណូមពរអាចនឹងបង្កើតអគ្គកុងស៊ុលកិត្តិយសនៅរាជធានីភ្នំពេញ ដើម្បីសម្របសម្រួលទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ ។
តាមរយៈលោកឯកអគ្គរដ្ឋទូតសម្តេចវិបុលសេនាភក្តីសាយ ឈុំ បានពាំនាំនូវព្រះរាជបណ្តាំ សួរសុខទុក្ខសេចក្តីគោរព និងសេចក្តីនឹករលឹកអំពីព្រះករុណា ព្រះបាទសម្តេចព្រះបរមនាថ នរោត្តមសីហមុនីព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តមមុនីនាថសីហនុ និងថ្នាក់ដឹកនាំកំពូលជាតិនៃព្រះរាជាណាចក្រកម្ពុជាជូនចំពោះលោកប្រធានាធិបតី និងថ្នាក់ដឹកនាំកំពូលគ្រប់លំដាប់ថ្នាក់នៃសាធារណរដ្ឋអ៊ីស្លង់ ។
ក្នុងព្រះបរមនាមព្រះករុណាព្រះបាទសម្តេចព្រះបរមនាថនរោត្តមសីហមុនីព្រះមហាក្សត្រនៃព្រះរាជាណាចក្រកម្ពុជាក្នុងនាមព្រឹទ្ធសភារដ្ឋសភារាជរដ្ឋាភិបាលកម្ពុជា និងខ្លួនខ្ញុំផ្ទាល់សម្តេចវិបុលសេនាភក្តី សាយ ឈុំ ប្រមុខរដ្ឋស្តីទីនៃព្រះរាជាណាចក្រកម្ពុជាបានសម្តែងនូវការស្វាគមន៍ដ៏កក់ក្តៅជាទីបំផុតដែលឯកឧត្តមប្រធានាធិបតីនៃសាធារណរដ្ឋអ៊ីស្លង់តែងតាំងលោកជាឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋអ៊ីស្លង់ប្រចាំព្រះរាជាណាចក្រកម្ពុជា ។
សម្តេចប្រមុខរដ្ឋក៏មានជំនឿជឿជាក់ថា ក្នុងឋានៈជាឯកអគ្គរដ្ឋទូតនៃសាធារណរដ្ឋអ៊ីស្លង់ ប្រចាំព្រះរាជាណាចក្រកម្ពុជាលោកនឹងបន្តខិតខំជំរុញឱ្យមានការផ្លាស់ប្តូរទៅវិញទៅមកលើគ្រប់វិស័យឱ្យកាន់តែទូលំទូលាយ ដើម្បីជាគុណប្រយោជន៍សម្រាប់ប្រជាជន និងប្រទេសទាំងពីរ ។ សម្តេចវិបុលសេនាភក្តីសាយ ឈុំ បានសម្តែងនូវសេចក្តីរីករាយដោយបានមើលឃើញទំនាក់ទំនង និងកិច្ចសហប្រតិបត្តិការរវាងប្រជាជន និងប្រទេសទាំងពីរមានការរីកចម្រើនជាបន្តបន្ទាប់ ។
សម្តេចវិបុលសេនាភក្តីសាយឈុំ បានបញ្ជាក់ថា ព្រឹទ្ធសភា រដ្ឋសភា រាជរដ្ឋាភិបាលក្រសួង ស្ថាប័នជាតិនៃព្រះរាជាណាចក្រកម្ពុជាត្រៀមខ្លួនជានិច្ច ដើម្បីធ្វើកិច្ចសហប្រតិបត្តិការដ៏ជិតស្និទ្ធជាមួយនឹងលោកឯកអគ្គរដ្ឋទូត ដើម្បីលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការឈានឡើងកម្រិតថ្មីមួយទៀត ដើម្បីផលប្រយោជន៍ដ៏ធំធេងសម្រាប់ប្រជាជន និងប្រទេសទាំងពីរទៅវិញទៅមក៕
ចែករំលែកព័តមាននេះ